അശ്ലീല ഉള്ളടക്കങ്ങൾ ഒരാഴ്ചയ്ക്കുള്ളില്‍ നീക്കംചെയ്യണം; ട്വിറ്ററിനോട് ദേശീയ വനിത കമ്മീഷന്‍

ന്യൂഡല്‍ഹി: ട്വിറ്ററില്‍ പോസ്റ്റ് ചെയ്യപ്പെട്ട അശ്ലീല ഉള്ളടക്കങ്ങള്‍ ഏഴുദിവസത്തിനുള്ളിൽ നീക്കണമെന്ന് ദേശീയ വനിതാ കമ്മീഷൻ. അശ്ലീല ഉള്ളടക്കങ്ങൾ പൂർണ്ണമായും നീക്കം ചെയ്യണമെന്നും അതല്ലെങ്കിൽ നടപടികൾ നേരിടേണ്ടി വരുമെന്നുമാണ് വനിതാ കമ്മീഷൻ പത്രക്കുറിപ്പിൽ അറിയിച്ചത്. ഇത് സംബന്ധിച്ച് ട്വിറ്റര്‍ ഇന്ത്യ മേധാവിക്ക് ദേശീയ വനിതാ കമ്മീഷന്‍ രേഖ ശര്‍മ കത്ത് അയച്ചു.



ട്വിറ്ററിൽ പോസ്റ്റ് ചെയ്യപ്പെട്ട അശ്ലീല ഉള്ളടക്കങ്ങളും അസഭ്യമായ ഉള്ളടക്കങ്ങളും ഒരാഴ്ച്ക്കകം നീക്കം ചെയ്യണമെന്നാണ് വനിതാ കമ്മീഷൻ ആവശ്യപ്പെട്ടിരിക്കുന്നത്. വിഷയത്തില്‍ ട്വിറ്റർ സ്വീകരിച്ച നടപടികള്‍ സംബന്ധിച്ച് 10 ദിവസത്തിനകം മറുപടി നല്‍കാനും നിര്‍ദേശിച്ചിട്ടുണ്ടെന്ന് കമ്മീഷന്‍ ചെയർപേഴ്സൺ വ്യക്തമാക്കി.

Also Read : ‘പോയി ചത്തോ’ സ്‌കൂള്‍ ഫീസ് സംബന്ധിച്ച് പരാതിപ്പെട്ട രക്ഷിതാക്കളോട് മധ്യപ്രദേശ് വിദ്യാഭ്യാസമന്ത്രി



വിഷയവുമായി ബന്ധപ്പെട്ട് ഡല്‍ഹി പോലീസ് കമ്മീഷണര്‍ക്കും വനിതാ കമ്മീഷന്‍ കത്തയച്ചിട്ടുണ്ട്. ട്വിറ്ററിനെതിരേ നിയമനടപടി സ്വീകരിക്കണമെന്നാവശ്യപ്പെട്ടാണ് കത്ത്. ട്വിറ്ററിനെതിരേ നേരത്തെയും സമാനമായ പരാതികൾ ലഭിച്ചിട്ടുണ്ടെന്നും പോലീസ് കമ്മീഷണർക്ക് അയച്ച കത്തിൽ രേഖ ശർമ ചൂണ്ടിക്കാട്ടുന്നു.

നേരത്തെകുട്ടികളുടെ അശ്ലീല ദൃശ്യങ്ങളുടെ പേരിൽ ട്വിറ്ററിനെതിരെ പുതിയ കേസ് രജിസ്റ്റർ ചെയ്തിരുന്നു. ട്വിറ്ററിന് രാജ്യത്തെ നിയമപരിരക്ഷ നഷ്ടപ്പെട്ടശേഷം നേരിടേണ്ടിവരുന്ന നാലാമത്തെ കേസാണിത്. ഡൽഹി പോലീസ് സൈബർ സെല്ലാണു ട്വിറ്ററിനെതിരെ കേസ് രജിസ്റ്റർ ചെയ്തത്. എൻസിപിസിആറിന്‍റെ (നാഷനൽ കമ്മിഷൻ ഫോർ പ്രൊട്ടക്ഷൻ ഓഫ് ചൈൽഡ് റൈറ്റ്സ്) പരാതിയുടെ അടിസ്ഥാനത്തിലായിരുന്നു നടപടി.

Also Read : 500 ഓളം ഭീഷണി കോളുകള്‍; എഐഎഡിഎംകെ മുൻമന്ത്രിയുടെ പരാതിയിൽ ശശികലക്കെതിരെ കേസ്

ഇന്ത്യയുടെ ഭൂപടം തെറ്റായി നൽകിയതിൽ ട്വിറ്ററിനെതിരെ കേസ് രജിസ്റ്റർ ചെയ്തതിന് തൊട്ട് പിന്നാലെയാണ് അശ്ലീല ഉള്ളടക്കങ്ങളുടെ പേരിലും ട്വിറ്ററിന് രാജ്യത്ത് നിയമനടപടി നേരിടേണ്ടി വരുന്നത്.