ദുബായ്: യുഎഇക്കിത് അഭിമാന നിമിഷം. അറബ് മേഖലയില്‍ നിന്നുള്ള ആദ്യ ചൊവ്വാ ദൗത്യ പേടകമായ ഹോപ്പ് പ്രോബ് ചുവന്ന ഗ്രഹത്തിലെ അപൂര്‍വ പ്രതിഭാസത്തിന്റെ ചിത്രം ആദ്യമായി ക്യാമറയില്‍ പകര്‍ത്തി. ഇതുവരെ ശാസ്ത്രജ്ഞരുടെ ഭാവനയില്‍ മാത്രം തെളിഞ്ഞിരുന്ന ചൊവ്വയുടെ രാത്രികാല പ്രതിഭാസമായ ഡിസ്‌ക്രീറ്റ് അറോറയുടെ മികച്ച ചിത്രമാണ് ഹോപ്പ് പേടകം പകര്‍ത്തിയത്.

​ദൈവിക പ്രതിഭാസത്തിന്റെ ചിത്രം

യുഎ. വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ഷെയ്ഖ് മുഹമ്മദ് ബിന്‍ റാശിദ് അല്‍ മക്തൂം ട്വിറ്ററിലൂടെയാണ് പുതിയ നേട്ടം ലോകത്തെ അറിയിച്ചത്. ദൈവിക പ്രതിഭാസത്തിന്റെ കണ്ണഞ്ചിപ്പിക്കുന്ന ചിത്രമെന്നാണ് ഡിസ്‌ക്രീറ്റ് അറോറയുടെ ചിത്രത്തെ അദ്ദേഹം വിശേഷിപ്പിച്ചത്. മാനവ ചരിത്രത്തിലാദ്യമായി അറബ്-ഇസ്ലാമിക ലോകത്തെ ആദ്യ ചൊവ്വ ദൗത്യമായ അല്‍ അമല്‍ (ദി ഹോപ്പ്) പേടകം ചുവന്ന ഗ്രഹത്തിലെ പുതിയൊരു പ്രതിഭാസത്തിലേക്ക് വെളിച്ചം വീശിയിരിക്കുന്നു. ചൊവ്വയെ കുറിച്ചുള്ള കൂടുതല്‍ ശാസ്ത്രീയ പഠനങ്ങളിലേക്ക് വാതില്‍ തുറക്കുന്ന ചിത്രം മാനുഷ്യകത്തിനു വലിയ മുതല്‍ക്കൂട്ടാവുമെന്ന് പ്രതീക്ഷിക്കുന്നതായും അദ്ദേഹം അഭിപ്രായപ്പെട്ടു.

​ചൊവ്വയ്ക്കു ചുറ്റും പ്രകാശ വലയം

ഭൂമിയുടെ ഉത്തര ധ്രുവത്തില്‍ കാണപ്പെടുന്ന അറോറ പ്രതിഭാസത്തിന് സമാനമായ പ്രകാശ ദീപ്തിയുടെ ചിത്രമാണ് ഹോപ്പ് പേടകത്തിലെ എമിറേറ്റ്‌സ് മാര്‍സ് അള്‍ട്രാവയലറ്റ് സ്‌പെക്ട്രോമീറ്റര്‍ ചരിത്രത്തിലാദ്യമായി പകര്‍ത്തിയത്. ചൊവ്വയ്ക്കു ചുറ്റും പ്രകാശ വലയത്തിന്റെ മാതൃകയിലാണ് ഈ പ്രതിഭാസം ചിത്രത്തില്‍ തെളിഞ്ഞത്. സൗരോര്‍ജത്താല്‍ ചാര്‍ജ് ചെയ്യപ്പെടുന്ന കണങ്ങള്‍ അന്തരീക്ഷത്തില്‍ പറക്കുമ്പോള്‍ രൂപപ്പെടുന്ന ദീപ്തിയാണ് ഡിസ്‌ക്രീറ്റ് അറോറ. ചൊവ്വയുടെ ഉപരിതലം, അന്തരീക്ഷം, കാന്തിമ പ്രഭാവം, സൗര വികിരണം തുടങ്ങിയവയെ കുറിച്ചും അവ തമ്മിലുള്ള പരസ്പര ബന്ധത്തെ കുറിച്ചും കൂടുതല്‍ മനസിലാക്കാന്‍ ഈ ചിത്രം സഹായകമാകുമെന്ന് ഹോപ്പ് ദൗത്യത്തിന്റെ ശാസ്ത്രവിഭാഗം മേധാവി ഹിസ്സ അല്‍ മത്രൂഷി പറഞ്ഞു. സൂര്യനും ചൊവ്വയും തമ്മിലെ ബന്ധത്തെ കുറിച്ചുള്ള പഠന മേഖലയില്‍ വലിയ സാധ്യതകള്‍ തുറക്കുന്ന കണ്ടെത്തലാണിത്. ചൊവ്വയില്‍ അറോറ പ്രതിഭാസമുണ്ടാവാന്‍ സോളാര്‍ സ്‌റ്റോംസ് ആവശ്യമില്ലെന്ന സിദ്ധാത്തത്തിന് കരുത്ത് പകരുന്നതാണ് പുതിയ ചിത്രമെന്നും അവര്‍ അഭിപ്രായപ്പെട്ടു.

​യുഎഇക്കിത് അഭിമാന നിമിഷം

ഏഴു മാസത്തെ യാത്രയ്ക്കു ശേഷം ഈ വര്‍ഷം ഫെബ്രുവരി ഒന്‍പതിനായിരുന്നു യുഎഇയുടെ ചൊവ്വാ ദൗത്യമായ ഹോപ് പേടകം ചുവന്ന ഗ്രഹത്തിന്റെ ഭ്രമണപഥത്തില്‍ എത്തിച്ചേര്‍ന്നത്. പേടകം 687 ദിവസം ചൊവ്വയെ ഭ്രമണം ചെയ്യുമെന്നാണ് കരുതുന്നത്. ചൊവ്വയുടെ ഉപരിതലത്തെ കുറിച്ചുള്ള പഠനമാണ് ഹോപ്പ് പേടകം പ്രധാനമായും ലക്ഷ്യമിടുന്നത്. പേടകത്തില്‍ മൂന്ന് പ്രധാന ഘടകങ്ങളാണുള്ളത്. ചൊവ്വയുടെ അന്തരീക്ഷത്തെക്കുറിച്ചും താപനിലയെക്കുറിച്ചും പഠിക്കാനുള്ള ഇന്‍ഫ്രാറെഡ് സ്പെക്ട്രോമീറ്റര്‍, ഓസോണ്‍ പാളികളെക്കുറിച്ച് പഠിക്കാനുള്ള ഇമേജര്‍, ഓക്സിജന്റെയും ഹൈഡ്രജന്റെയും അളവ് മനസ്സിലാക്കാനുള്ള അള്‍ട്രാവയലറ്റ് സ്പെക്ട്രോമീറ്റര്‍ എന്നിവയാണവ. ഇതില്‍ അള്‍ട്രാവയലറ്റ് സ്പെക്ട്രോമീറ്ററാണ് പുതിയ ചിത്രം പകര്‍ത്തി താരമായത്. ചൊവ്വയിലെ അന്തരീക്ഷത്തെ കുറിച്ച് പഠനം നടത്തുക, 2117 ല്‍ ചൊവ്വയില്‍ മനുഷ്യന് താമസസ്ഥലം ഒരുക്കുക എന്നിവയാണ് ദൗത്യത്തിന്റെ പ്രധാനലക്ഷ്യം.