കുവൈറ്റ് സിറ്റി: നിയന്ത്രണങ്ങള്‍ ശക്തമായി തുടരുകയും വാക്‌സിനേഷന്‍ ക്യാംപയിന്‍ നല്ല രീതിയില്‍ പുരോഗമിക്കുകയും ചെയ്യുന്നതിനിടയിലും കുവൈറ്റില്‍ കൊവിഡ് വ്യാപനത്തിന് ശമനമില്ല. കൊവിഡ് ബാധിച്ച് ആശുപത്രികളില്‍ പ്രവേശിപ്പിക്കപ്പെടുന്നവരുടെ എണ്ണവും കൊവിഡ് മൂലമുള്ള മരണവും കൂടിവരുന്നതായാണ് റിപ്പോര്‍ട്ട്. ബുധനാഴ്ച മാത്രം 18 കൊവിഡ് മരണങ്ങളാണ് രാജ്യത്ത് റിപ്പോര്‍ട്ട് ചെയ്യപ്പെട്ടത്. കൊവിഡ് മഹാമാരി ആരംഭിച്ചതിന് ശേഷം ഒരു ദിവസം റിപ്പോര്‍ട്ട് ചെയ്യപ്പെടുന്ന ഏറ്റവും ഉയര്‍ന്ന പ്രതിദിന മരണ നിരക്കാണിത്. മരണപ്പെട്ട 18 പേരില്‍ 17 പേരും വാക്‌സിന്‍ കുത്തിവയ്പ്പ് തീരെ എടുക്കാത്തവരും ഒരാള്‍ ഒരു ഡോസ് മാത്രം വാക്‌സിന്‍ എടുത്തയാളുമാണ്.

​ഐസിയു പ്രവേശനവും ഏറ്റവും ഉയര്‍ന്ന നിരക്കില്‍

രാജ്യത്ത് കൊവിഡ് ബാധിച്ച് ആശുപത്രികളില്‍ പ്രവേശിപ്പിക്കപ്പെടുന്നവരുടെ എണ്ണത്തിലും വലിയ വര്‍ധനവുണ്ടായിട്ടുണ്ട്. ഇവരില്‍ തീവ്ര പരിചരണ വിഭാഗത്തില്‍ പ്രവേശിപ്പിക്കവരുടെ എണ്ണം 288 ആണ്. കൊവിഡ് വ്യാപനം സംഭവിച്ചതിന് ശേഷം ഇതിനു മുമ്പ് ഐസിയുവില്‍ ഇത്രയേറെ രോഗികളെ പ്രവേശിപ്പിക്കപ്പെട്ട സമയം ഉണ്ടായിട്ടില്ലെന്ന് പ്രാദേശിക മാധ്യമങ്ങള്‍ റിപ്പോര്‍ട്ട് ചെയ്തു. ജൂണ്‍ ആദ്യ വാരത്തിലെ കണക്കുകളുമായി തട്ടിച്ചുനോക്കുമ്പോള്‍ കൊവിഡ് കാരണം ആശുപത്രികളില്‍ പ്രവേശിപ്പിക്കപ്പെട്ടവരുടെ എണ്ണം 37 ശതമാനം കണ്ട് വര്‍ധിച്ചിട്ടുണ്ട്. ഐസിയുവില്‍ പ്രവേശിപ്പക്കപ്പെടുന്ന എണ്ണമാവട്ടെ 47 ശതമാനമാണ് വര്‍ധിച്ചത്.

​കൊവിഡ് വ്യാപനം കൂടുന്നു

കഴിഞ്ഞ ഏതാനും ആഴ്ചകളായി രാജ്യത്ത് കൊവിഡ് വ്യാപനത്തിന്റെ തോത് വര്‍ധിച്ചുവരുന്നതായാണ് കണക്കുകള്‍ വ്യക്തമാക്കുന്നത്. ബുധനാഴ്ച മാത്രം 1,718 പുതിയ കേസുകളാണ് കുവൈറ്റില്‍ റിപ്പോര്‍ട്ട് ചെയ്യപ്പെട്ടത്. ഇതില്‍ 33 ശതമാനം കേസുകളും അല്‍ അഹ്മദി ഗവര്‍ണറേറ്റിലാണ്. കഴിഞ്ഞയാഴ്ച 24 മണിക്കൂറിനിടയില്‍ 1935 പേര്‍ക്ക് കൊവിഡ് ബാധിച്ചതായി റിപ്പോര്‍ട്ടുകളുണ്ടായിരുന്നു. 2020 മാര്‍ച്ചില്‍ കൊവിഡ് വ്യാപനം തുടങ്ങിയതിന് ശേഷം ആദ്യമായാണ് കുവൈറ്റില്‍ പ്രതിദിന കേസുകള്‍ ഇത്രയേറെ വര്‍ധിക്കുന്നത്. രാജ്യത്ത് അതിവ്യാപന ശേഷിയുള്ള ഡെല്‍റ്റ വകഭേദത്തിന്റെ സാന്നിധ്യം കഴിഞ്ഞ മാസം കണ്ടെത്തിയിരുന്നു. ഇതേത്തുടര്‍ന്നാണ് രാജ്യത്ത് കൊവിഡ് കേസുകളുടെ എണ്ണം കൂടിയതെന്നാണ് വിലയിരുത്തപ്പെടുന്നത്.

​വാക്‌സിനെടുക്കല്‍ പ്രധാനം

രാജ്യത്ത് കൊവിഡ് ബാധയുടെ രൂക്ഷത കുറയ്ക്കാന്‍ കൊവിഡ് വാക്‌സിനേഷന്‍ ശക്തിപ്പെടുത്തുകയാണ് ഏറ്റവും നല്ല മാര്‍ഗമെന്ന് ആരോഗ്യ മന്ത്രാലയം വക്താവ് ഡോ. അബ്ദുല്ല അല്‍ സമദ് അഭിപ്രായപ്പെട്ടു. കാരണം ഗുരുതര രോഗലക്ഷണങ്ങളുമായി ആശുപത്രികളില്‍ പ്രവേശിപ്പിക്കുന്നവരുടെയും മരണപ്പെടുന്നവരുടെയും ആളുകളില്‍ പൂര്‍ണമായി വാക്‌സിനേഷന്‍ ലഭിച്ചവര്‍ വളരെ കുറവാണ്. നിലവില്‍ രാജ്യത്ത് കൊവിഡ് മൂലം ആശുപത്രികളില്‍ പ്രവേശിപ്പിക്കപ്പെട്ട 1004 പേരില്‍ 95 ശതമാനവും വാക്‌സിന്‍ എടുക്കാത്തവരാണെന്നും അദ്ദേഹം വ്യക്തമാക്കി. ഐസിയുവില്‍ കഴിയുന്ന 288 രോഗികളാവട്ടെ, അവരില്‍ 93.5 ശതമാനവും ഒരു ഡോസ് വാക്‌സിന്‍ പോലും എടുക്കാത്തവരാണ്.

​അടിയന്തരമല്ലാത്ത ശസ്ത്രക്രിയകള്‍ മാറ്റി

അതിനിടെ, കൊവിഡ് വ്യാപനത്തിന്റെ പശ്ചാത്തലത്തില്‍ സ്വകാര്യ ആശുപത്രികളിലെ ശസ്ത്രക്രിയകള്‍ക്ക് കുവൈറ്റ് ആരോഗ്യമന്ത്രാലയം നിയന്ത്രണം ഏര്‍പ്പെടുത്തി. അടിയന്തര സ്വഭാവമില്ലാത്ത ശസ്ത്രക്രിയകള്‍ രണ്ടാഴ്ചത്തേക്ക് നിര്‍ത്തിവെക്കണമെന്ന് കാണിച്ച് ആരോഗ്യമന്ത്രാലയം ഹെല്‍ത്ത് ലൈസന്‍സിംഗ് വിഭാഗം മേധാവി ഡോ. സുആദ് അബല്‍ സ്വകാര്യ മേഖലയിലെ ഡോക്ടര്‍മാര്‍ക്കും മെഡിക്കല്‍ ഡയറക്ടര്‍മാര്‍ക്കും സര്‍ക്കുലര്‍ അയച്ചു. അടിയന്തര സ്വഭാവം ഇല്ലാത്ത സര്‍ജറികള്‍ ജൂലൈ നാല് മുതല്‍ രണ്ടാഴ്ചത്തേക്ക് നിര്‍ത്തിവെക്കാനാണ് നിര്‍ദേശം. അതേസമയം അടിയന്തര ശസ്ത്രക്രിയകള്‍ തുടരാമെന്നും സര്‍ക്കുലറില്‍ പറയുന്നു. രാജ്യത്ത് കഴിഞ്ഞ ഏതാനും ദിവസങ്ങളായി പ്രതിദിന കൊവിഡ് കേസുകളും ആശുപത്രി പ്രവേശനം വര്‍ധിച്ച സാഹചര്യത്തില്‍ പൊതുജനങ്ങളുടെ ആരോഗ്യ സുരക്ഷാ മുന്‍നിര്‍ത്തിയാണ് നടപടിയെന്ന് അധികൃതര്‍ വ്യക്തമാക്കി.