ഹജ്ജ് സേവകര്‍ക്ക് ഇത്തവണ ഹജ്ജ് കര്‍മങ്ങള്‍ ചെയ്യാന്‍ അനുവാദമില്ല: സൗദി

റിയാദ്: ഹജ്ജ് തീര്‍ഥാടനവുമായി ബന്ധപ്പെട്ട വിവിധ സേവന ഏജന്‍സികളില്‍ ജോലി ചെയ്യുന്ന ജീവനക്കാര്‍ക്ക് ഇത്തവണ ഹജ്ജിന്റെ കര്‍മങ്ങളില്‍ പങ്കാളികളാവാന്‍ അനുവാദമുണ്ടായിരിക്കില്ലെന്ന് സൗദി അധികൃതര്‍ വ്യക്തമാക്കി. കൊവിഡ് നിയന്ത്രണത്തിന്റെ ഭാഗമായുള്ള പെരുമാറ്റച്ചട്ടങ്ങള്‍ കൃത്യമായി പാലിക്കുന്നതിന് സൗകര്യമൊരുക്കുന്നതിന്റെ ഭാഗമായാണ് നടപടിയെന്ന് ഔദ്യോഗിക വൃത്തങ്ങളെ ഉദ്ധരിച്ച് ഓണ്‍ലൈന്‍ സൗദി ദിനപ്പത്രമായ സബഖ് റിപ്പോര്‍ട്ട് ചെയ്തു. ഹജ്ജ് സേവകര്‍ക്ക് ഹജ്ജ് തീര്‍ഥാടനത്തിന് വിലക്കേര്‍പ്പെടുത്തുന്നത് ഇതാദ്യമായാണ്.



ഹജ്ജിന്റെ വിവിധ മേഖലകളില്‍ സേവനം ചെയ്യുന്ന ഏജന്‍സികള്‍ തങ്ങളുടെ കീഴിലെ ജീവനക്കാര്‍ക്ക് ഇതുമായി ബന്ധപ്പെട്ട നിര്‍ദ്ദേശങ്ങള്‍ നല്‍കണമെന്ന് ഹജ്ജ് ഉംറ കാര്യ മന്ത്രാലയം വൃത്തങ്ങള്‍ അറിയിച്ചു. കൊവിഡ് വ്യാപനം തടയുന്നതിന്റെ ഭാഗമായി സൗദിയില്‍ താമസിക്കുന്ന സ്വദേശികളും വിദേശികളും ഉള്‍പ്പെടെ 60,000 പേര്‍ക്ക് മാത്രമാണ് ഇത്തവണ ഹജ്ജിന് അനുവാദം നല്‍കിയിരിക്കുന്നത്. ഇവരെ സാമൂഹ്യ അകലം പാലിച്ച് ഹജ്ജിന്റെ വിവിധ കര്‍മങ്ങള്‍ നിര്‍വഹിക്കാന്‍ പാകത്തില്‍ വിവിധ ബാച്ചുകളായി തിരിച്ചാണ് ഇത്തവണ ഹജ്ജിന്റെ നടപടിക്രമങ്ങള്‍ സജ്ജീകരിച്ചിരിക്കുന്നത്.

Also Read: കുട്ടികള്‍ക്ക് ഹാനികരം; 1500 കളിപ്പാട്ടങ്ങള്‍ നിരോധിച്ച് ബഹ്‌റൈന്‍

ഹജ്ജ് സേവകര്‍ കൂടി തീര്‍ഥാടനത്തിന്റെ കര്‍മങ്ങള്‍ നിര്‍വഹിക്കാനെത്തുന്നത് ക്രമീകരണങ്ങള്‍ താളം തെറ്റിക്കുമെന്നതിനാലാണ് അവര്‍ക്ക് വിലക്കേര്‍പ്പെടുത്തിയതെന്നാണ് റിപ്പോര്‍ട്ട്. നിലവില്‍ വാക്‌സിന് എടുത്തവരും 18നും 65നും ഇടയില്‍ പ്രായമായവര്‍ക്കും മാത്രമാണ് ഹജ്ജ് ചെയ്യാന്‍ അനുമതിയുള്ളത്. ഹജ്ജിന് രജിസ്റ്റര്‍ ചെയ്ത ശേഷം പെര്‍മിറ്റ് ലഭിച്ചവരില്‍ രണ്ടാം ഡോസ് വാക്‌സിന്‍ എടുക്കാത്തവര്‍ എത്രയും വേഗം അത് സ്വീകരിക്കണമെന്ന് ഹജ്ജ് ഉംറ മന്ത്രാലയം കഴിഞ്ഞ ദിവസം വ്യക്തമാക്കിയിരിരുന്നു. ഹജ്ജ് തീര്‍ഥാടനം കൊവിഡ് വ്യാപനത്തിന് കാരണമാവുന്നില്ലെന്ന് ഉറപ്പുവരുത്താന്‍ വിപുലമായ നിയന്ത്രണ സംവിധാനങ്ങളാണ് മക്കയിലും മദീനയും അധികൃതര്‍ ഒരുക്കിയിരിക്കുന്നത്.