റോബർട്ട് ഗോൾവിറ്റ്‌സർ എന്ന യുവാവാണ് സ്റ്റോറന്‍റിലേക്ക് വിളിച്ച് ബോംബ് ഭീഷണി മുഴക്കിയത്. ജീവനക്കാരുടെ പരാതിയെത്തുടർന്ന് ഇയാളെ പോലീസ് അറസ്റ്റ് ചെയ്തു
ചിക്കൻ നഗ്ഗെറ്റിനൊപ്പം സോസ് ലഭിച്ചില്ല
(പ്രതീകാത്മക ചിത്രം)
അയോവയിലെ ഒരു മക്ഡൊണാൾഡ് ഔട്ട്ലറ്റിൽ ചിക്കൻ നഗ്ഗെറ്റിനൊപ്പം സോസ് ലഭിക്കാത്തതാണ് ഈ ഭീഷണിയുടെ പിന്നിലെ പ്രകോപനത്തിന് കാരണം. ഫാസ്റ്റ്ഫുഡ് ഭീമനായ മക്ഡൊണാൾഡ് ചിക്കൻ നഗ്ഗെറ്റുകൾ മക് നഗ്ഗെറ്റ് എന്ന പേരിലാണ് വിപണിയിൽ എത്തിക്കുന്നത്. റിപ്പോർട്ടുകൾ പ്രകാരം മക്ഡൊണാൾഡിന്‍റെ ഔട്ട്ലറ്റുകളിൽ നിന്നും ഏറ്റവും അധികം വിറ്റഴിയുന്ന വിഭവങ്ങളിൽ ഒന്ന് കൂടിയാണ് ഇത്. മക് നഗ്ഗെറ്റിന്‍റെ ഒരു കടുത്ത ആരാധകനാണ് തനിക്ക് നഗ്ഗെറ്റിനൊപ്പം സോസ് നൽകാത്തതിന്‍റെ പേരിൽ പ്രകോപിതനായത്.
റെസ്റ്റോറന്‍റ് ബോംബിട്ട് തകർക്കുമെന്ന് ഭീഷണി
(പ്രതീകാത്മക ചിത്രം)
മക്ഡൊണാൾഡിന്‍റെ ഔട്ട്ലറ്റിൽ നിന്നും ലഭിച്ച നഗ്ഗെറ്റിനൊപ്പം സോസ് ലഭിക്കാതെ വന്നതോടെയാണ് യുവാവ് പ്രകോപിതനായത്. ഓർഡർ ചെയ്യുമ്പോഴുള്ള പിശക് മൂലമോ, ജീവനക്കാരുടെ അശ്രദ്ധമൂലമോ ഭക്ഷണം ലഭിക്കുമ്പോൾ ഇത്തരം പ്രശ്നങ്ങളുണ്ടാകുന്നത് സ്വാഭാവിക കാര്യമാണ്. എന്നാൽ റോബർട്ട് ഗോൾവിറ്റ്‌സർ എന്നയാൾക്ക് ഇത് സഹിക്കാവുന്നതിലും അപ്പുറമായിരുന്നു. അതുകൊണ്ട് തന്നെ റെസ്റ്റോറന്‍റിലേക്ക് വിളിച്ച് ബോംബ് ഭീഷണി മുഴക്കുകയാണ് ഇയാൾ ചെയ്തത്. ഒപ്പം ജീവനക്കാരനെ കൈകാര്യം ചെയ്യുമെന്നും ഗോൾവിറ്റ്‌സർ പറഞ്ഞു.
ഒടുവിൽ പോലീസിന്‍റെ പിടിയിൽ
ബോംബ് ഭീഷണി വന്നതിന് പിന്നാലെ തന്നെ റെസ്റ്റോറന്‍റ് ജീവനക്കാർ പോലീസിനെ വിവരം അറിയിച്ചു. തുടർന്ന് ബോബ് ഭീഷണി മുഴക്കിയ ഗോൾവിറ്റസറെ പോലീസ് അറസ്റ്റും ചെയ്തു. താൻ ബോംബ് ഭീഷണി മുഴക്കിയിരുന്നെന്ന് ഇയൾ പോലീസിനോട് സമ്മതിച്ചു. അറസ്റ്റ് ചെയ്ത ഇദ്ദേഹത്തെ നിലവിൽ ജാമ്യത്തിൽ വിട്ടിരിക്കുകയാണ്. ചിക്കൻ നഗ്ഗെറ്റിന്‍റെ പേരിൽ നടക്കുന്ന ആദ്യ വിചിത്രമായ സംഭവമല്ല ഇതെന്നാണ് ടൈംസ് നൗ റിപ്പോർട്ട് ചെയ്യുന്നത്.
സൗജന്യമായി ചിക്കൻ നഗ്ഗെറ്റ് സ്വന്തമാക്കാൻ യാത്ര
കഴിഞ്ഞവർഷം യു‌എസിൽ കൊവിഡ് ലോക്ക് ഡൗൺ പ്രഖ്യാപിച്ചപ്പോൾ, ഒരാൾ ഒരു ദിവസത്തിനിടെ വെൻ‌ഡിസിന്‍റെ 11 റെസ്റ്റോറന്‍റുകളിലേക്ക് രണ്ടു തവണവീതം പോയി ചിക്കൻ നഗ്ഗെറ്റുകൾ സ്വന്തമാക്കിയിരുന്നു. വെൻ‌ഡിസിന്‍റെ ഡ്രൈവ് ത്രൂ ഔട്ട്‌ലറ്റുകൾ സന്ദർശിക്കുന്നവർക്ക് നാല് പീസ് സൗജന്യ ചിക്കൻ നഗ്ഗെറ്റുകൾ നൽകുന്ന ഓഫറിന്‍റെ ഭാഗമായിട്ടായിരുന്നു ഈ യാത്ര. ഒരു ഉപഭോക്താവിന് ഒരു പാക്കറ്റ് സൗജന്യ നഗ്ഗെറ്റുകൾ മാത്രമായിരുന്നു നൽകിയിരുന്നത്. ഈ ഓഫർ മുതലാക്കാനാണ് 11 ഔട്ട്ലെറ്റുകലിലേക്ക് ഇയാൾ പോയത്.
Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
ഏറ്റവും പുതിയ വാർത്തകൾ അതിവേഗം അറിയാൻ Samayam Malayalam ഫേസ്ബുക്ക് പേജ് ലൈക്ക് ചെയ്യൂ
Web Title : man issues threat to restaurant for not providing sauce in ankeny arrested
Malayalam News from malayalam.samayam.com, TIL Network
