Sumayya P | Samayam Malayalam | Updated: 01 Jul 2021, 03:15:06 PM
ജൂണ്‍ 16 മുതല്‍ 29 വരെയുള്ള ദിവസങ്ങളിലായിരുന്നു പരീക്ഷണാര്‍ഥം മരുന്ന് ഉപയോഗിച്ചതെന്ന് അധികൃതര്‍ അറിയിച്ചു
ആദ്യം അംഗീകാരം നല്‍കിയത് യുഎഇ
ഈ ചികിത്സാ രീതിക്ക് ആദ്യം അംഗീകാരം നല്‍കിയ രാജ്യമാണ് യുഎഇ. അബൂദാബി ആരോഗ്യ വകുപ്പും ദുബായ് ഹെല്‍ത്ത് അതോറിറ്റിയും സംയുക്തമായി രണ്ടാഴ്ചയ്ക്കിടയില്‍ നടത്തിയ പരീക്ഷണ ഉപയോഗത്തിന്റെ ഫലമാണ് അധികൃതര്‍ പുറത്തുവിട്ടത്. കൊവിഡ് രോഗം ഗുരുതരമായ ആരോഗ്യ പ്രശ്നങ്ങള് സൃഷ്ടിച്ച 658 പേരിലാണ് ഈ മരുന്ന് പരീക്ഷിച്ചത്. ജൂണ്‍ 16 മുതല്‍ 29 വരെയുള്ള ദിവസങ്ങളിലായിരുന്നു പരീക്ഷണാര്‍ഥം മരുന്ന് ഉപയോഗിച്ചതെന്ന് അധികൃതര്‍ അറിയിച്ചു. ഇവരില്‍ 46 ശതമാനം പേര്‍ യുഎഇ പൗരന്‍മാരും 54 ശതമാനം പേര്‍ പ്രവാസികളുമായിരുന്നു. രോഗികളില്‍ 59 ശതമാനം പേരും 50 വയസിന് മുകളിലുള്ളവരായിരുന്നു. എന്നു മാത്രമല്ല, അമിത വണ്ണം, കാന്‍സര്‍, വൃക്ക രോഗങ്ങള്‍, ശ്വാസകോശ സംബന്ധിയായ പ്രശ്നങ്ങള്, ഹൃദയ സംബന്ധമായ പ്രശ്നങ്ങള്, പ്രമേഹം, ഹൈപ്പര്‍ ടെന്‍ഷന്‍, അലര്‍ജി തുടങ്ങിയ രോഗങ്ങളുള്ളവരായിരുന്നു ഇവര്‍.
എന്താണ് സൊട്രോവിമാബ് ?
സാധാരണ ഗതിയില്‍ കൊവിഡ് ബാധ ഗുരുതരമായ ആരോഗ്യ സങ്കീര്‍ണതകള്‍ക്ക് കാരണമാവുന്ന റിസ്‌ക് ഗ്രൂപ്പില്‍ പെട്ട ഇവരില്‍ 97.3 ശതമാനം പേര്‍ക്കും അഞ്ച് മുതല്‍ ഏഴ് ദിവസത്തിനുള്ളില്‍ രോഗാവസ്ഥയില്‍ കാര്യമായ മാറ്റമുണ്ടായതായി ആരോഗ്യ മന്ത്രാലയം അറിയിച്ചു. ഒരു മാസം മുന്‍പാണ് സൊട്രാവിമാബ് ഉപയോഗിച്ചുള്ള കൊവിഡ് ചികിത്സക്ക് യുഎഇ അംഗീകാരം നല്‍കിയത്. ഒറ്റത്തവണ നല്‍കേണ്ട മോണോകുലാര്‍ ആന്റിബോഡിയാണ് സൊട്രോവിമാബ്. രക്താണുക്കളില്‍ ക്ലോണിംഗ് നടത്തി വേര്‍തിരിച്ചെടുക്കുന്ന ആന്റിബോഡി അടിയന്തരഘട്ടങ്ങളിലാണ് രോഗികളില്‍ പരീക്ഷിക്കുന്നത്.
പുതിയ ചികില്‍സാ രീതി 85 ശതമാനം ഫലപ്രദമെന്ന് അധികൃതര്‍
ഹെല്‍ത്ത് കെയര്‍ മേഖലയിലെ ലോകത്തിലെ മുന്‍നിര കമ്പനിയായ ജിഎസ്‌കെ വികസിപ്പിച്ചെടുത്ത സൊട്രോവിമാബ് എന്ന മരുന്നിന് യുഎസ് ഫുഡ് ആന്റ് ഡ്രഗ് അഡ്മിനിസ്ട്രേഷന്‍ അനുമതി നല്‍കിയിരുന്നു. കൊവിഡ് ബാധ ഗുരുതരമായ ആരോഗ്യ പ്രശ്നങ്ങള് സൃഷ്ടിക്കാനിടയുള്ള രോഗികളില്‍ വൈറസ് ബാധയുടെ തുടക്കത്തില്‍ തന്നെ ഈ മരുന്ന് നല്‍കിയാല്‍ മികച്ച ഫലം പ്രതീക്ഷിക്കാമെന്നാണ് കമ്പനിയുടെ അവകാശവാദം. മരണവും ഐസിയു വാസവും പരമാവധി ഒഴിവാക്കാനും ഇത് ഉപകരിക്കും. ഈ പുതിയ ചികില്‍സാ രീതി 85 ശതമാനം ഫലപ്രദമാണെന്ന് പരിശോധനകളില്‍ കണ്ടെത്തിയതായി അധികൃതര്‍ അറിയിച്ചു. പാര്‍ശ്വ ഫലങ്ങളൊന്നും ഉണ്ടാക്കാത്ത ഈ മരുന്ന് 12 വയസ്സിന് മുകളിലുള്ളവര്‍ക്കാണ് നല്‍കുന്നത്. നേരിയതോ ഇടത്തരമോ ആയ കൊവിഡ് രോഗ ലക്ഷണങ്ങള്‍ പ്രകടിപ്പിക്കുന്നവരും മറ്റ് ഗുരുതര ആരോഗ്യ പ്രശ്നങ്ങള് കാരണം രോഗം മൂര്‍ഛിക്കാന്‍ ഇടയുള്ളവരുമായ ആളുകള്‍ക്കാണ് ഈ മരുന്ന് നല്‍കുക.
ശ്വേതരക്താണുക്കള്‍ ക്ലോണ്‍ ചെയ്ത് നിര്‍മിക്കുന്ന മോണോക്ലോണല്‍ ആന്റി ബോഡിയായ സൊട്രോവിമാബ്, കൊവിഡിന്റെ ഇന്ത്യയില്‍ കാണപ്പെട്ട ഡെല്‍റ്റാ വകഭേദങ്ങള്‍ ഉള്‍പ്പെടെയുള്ളവ തടഞ്ഞുനിര്‍ത്താന്‍ പ്രാപ്തമാണെന്ന് ക്ലിനിക്കല്‍ ട്രയലുകളില്‍ കണ്ടെത്തിയിരുന്നു.
Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
ഏറ്റവും പുതിയ വാർത്തകൾ അതിവേഗം അറിയാൻ Samayam Malayalam ഫേസ്ബുക്ക് പേജ് ലൈക്ക് ചെയ്യൂ
Web Title : uae releases 2-week treatment results for new sotrovimab medicine
Malayalam News from malayalam.samayam.com, TIL Network
