ഭാര്യയുമായി വഴക്കിട്ട് കുട്ടികള്‍ക്കുള്ള ഐസ് ക്രീമിൽ വിഷം കലക്കി നൽകി; ഒരു മരണം

മുംബൈ: ഭാര്യയുമായി വഴക്കിട്ടതിനെ തുടര്‍ന്ന് കുട്ടികള്‍ക്ക് വാങ്ങിയ ഐസ് ക്രീമിൽ എലിവിഷം കലക്കി നൽകി. ഇതേത്തുടര്‍ന്ന്, ഒരു കുട്ടി മരിക്കുകയും ചെയ്തു. മുംബൈയിലെ മാൻഖുര്‍ദ് പ്രദേശത്താണ് ഇത്തരത്തിൽ ഞെട്ടിക്കുന്ന സംഭവമുണ്ടായിരിക്കുന്നത്.



വിഷം കലര്‍ന്ന ഐസ് ക്രീം കഴിച്ച് ആറ് വയസ്സുള്ള ആൺകുട്ടിയാണ് മരിച്ചത്. ഇവരുടെ രണ്ട് സഹോദരങ്ങള്‍ ആശുപത്രിയിൽ ചികിത്സയിലാണ്.

ജൂൺ 25നാണ് ഇത്തരത്തിൽ സംഭവം നടക്കുന്നത്. ബുധനാഴ്ച സര്‍ക്കാര്‍ നിയന്ത്രിക്കുന്ന സിയോൺ ആശുപത്രിയിൽ വച്ച് കുട്ടി മരിച്ചതോടെയാണ് ഇത് പുറത്തുവരുന്നത്. ഡോക്ടര്‍മാര്‍ തന്നെ വിഷയം പോലീസിൽ അറിയിക്കുകയായിരുന്നു.

അലി നൗഷാദ് അന്‍സാരിയാണ് ഇത്തരത്തിൽ കൃത്യം നടത്തിയത്. മുംബൈയിലെ മൻഖുർദിലെ സതേ നഗറിൽ താമസിക്കുന്ന അൻസാരി ദിവസ വേതനക്കാരനായ കൂലിത്തൊഴിലാളിയാണ്. ഇയാള്‍ക്കെതിരെ കൊലപാതകത്തിനും കൊലപാതകശ്രമത്തിനും കേസെടുത്തിട്ടുണ്ട്.

ഭാര്യ നസിയ ബീഗവുമായി തര്‍ക്കമുണ്ടാകുകയായിരുന്നു. ഇവര്‍ക്ക് മൂന്ന് കുട്ടികളാണ് ഉണ്ടായിരുന്നത് രണ്ട് ആൺകുട്ടികളും ഒരു പെൺകുട്ടിയുമാണ്. ഇവര്‍ക്ക് ഐസ് ക്രീം വാങ്ങിത്തരാമെന്ന് പറഞ്ഞ് കൂട്ടിക്കൊണ്ട് പോകുകയുമായിരുന്നു. പക്ഷെ, അതിൽ അയാള്‍ എലിവിഷം നൽകുകയായിരുന്നു.

പണത്തെ ചൊല്ലിയാണ് തങ്ങള്‍ തമ്മിൽ തര്‍ക്കമുണ്ടായത് എന്ന് ഇയാളുടെ ഭാര്യ ബീഗം പോലീസിനോട് പറഞ്ഞു. ഇത്തരത്തിൽ ഇടക്കിടെ ഉണ്ടാകാറുണ്ടെന്നും അവര്‍ പറഞ്ഞു.

തുടര്‍ന്ന് ജൂൺ 25 ന് അവ‍ർ വീട്ടിൽ നിന്ന് ഇറങ്ങി സഹോദരിയോടൊപ്പം താമസിക്കാൻ പോയി. അന്നാണ് അൻസാരി മൂന്ന് കുട്ടികളെയും ഒരു ഐസ്ക്രീമിനായി പുറത്തു കൊണ്ടുപോയത്.

പിന്നീട്, കുട്ടികൾ വയറുവേദനയെന്ന് പറഞ്ഞ് പരാതി പറഞ്ഞതോടെ വീട്ടിലേക്ക് മടങ്ങിയ നാസിയ അവരെ സിയോൺ ആശുപത്രിയിലേക്ക് കൊണ്ടുപോയതായി പോലീസ് പറഞ്ഞു. ആദ്യം അബദ്ധവശാൽ എലി വിഷം കഴിച്ചതായി ഡോക്ടര്‍മാരോട് പറഞ്ഞു. എന്നാൽ, മകൻ മരിച്ചതോടെയാണ് വിഷയം പറഞ്ഞത്.

പോലീസ് ചികിത്സയിൽ കഴിയുന്ന കുട്ടികളുടേയും മൊഴിയെടുത്തിട്ടുണ്ട്.