‘കിട്ടിയോ?’ ചോദ്യം ആവർത്തിക്കേണ്ട, ഇ. പി. പറഞ്ഞതിൽ എല്ലാമുണ്ട്!

സംഭവസ്ഥലത്തെത്തിയ മാധ്യമങ്ങൾ ദൃശ്യങ്ങൾ പകർത്തിയ ശേഷം തേടിയത് നേതാക്കളുടെ പ്രതികരണമായിരുന്നു. ഇവയിൽ കൗതുകമായത് ഇ. പി. ജയരാജനും പി. കെ. ശ്രീമതിയും നടത്തിയ പ്രതികരണങ്ങളാണ്. സ്ഥലത്തെത്തി നിരീക്ഷണം നടത്തിയ ഇ. പി., കണ്ണുംപൂട്ടി കോൺഗ്രസ്സിനുമേൽ കുറ്റം ചുമത്തുകയാണ് ചെയ്തത്. “എകെജി സെന്ററിനു നേരെ ആക്രമണമുണ്ടായാൽ വലിയ പ്രതിഷേധം ഉണ്ടാകും. ആ പ്രതിഷേധം സംഘർഷമാക്കി മാറ്റാനാണ് കോൺഗ്രസ് ശ്രമിക്കുന്നത്. അതിനുവേണ്ടിയാണ് ഇത്തരം ഭീകരപ്രവർത്തനങ്ങൾ സംഘടിപ്പിക്കുന്നത്,” ഇ. പി. പറഞ്ഞു. എന്നാൽ ഓരോ ദിവസം പിന്നിടുന്തോറും കോൺഗ്രസ്സിനു മേൽ താനുന്നയിച്ച ആരോപണത്തിൽ നിന്ന് ഇ. പി. ജയരാജൻ പിന്നോട്ടുപോയി. ഒടുവിൽ കുപ്രസിദ്ധ പിടികിട്ടാപ്പുള്ളി സുകുമാരക്കുറുപ്പിനെയും എകെജി സെന്ററിനു ബോംബേറിഞ്ഞയാളെയും ബന്ധപ്പെടുത്തി പ്രതികരണം നടത്തി തടിതപ്പുന്ന കാഴ്ചയാണ് കണ്ടത്. “സുകുമാരക്കുറുപ്പ് പോയിട്ട് എത്ര കാലമായി, ഇതുവരെ പിടിച്ചില്ലല്ലോ,” എന്നായിരുന്നു എകെജി സെന്റർ ആക്രമണത്തെ കുറിച്ചുള്ള മാധ്യമങ്ങളുടെ ചോദ്യത്തിന് ഇ. പി. നൽകിയ മറുപടി.

“വായിച്ചുകൊണ്ടിരിക്കുകയായിരുന്നു, ഒന്ന് അനങ്ങി. അത്രയും ഭീകരമായിരുന്നു, മഴക്കാലത്ത് ഇടിവെട്ടുന്ന ശബ്ദം പോലെയൊന്നുമല്ല, അതിഭയങ്കരമായ, കെട്ടിടം തകർന്നപോലൊരു ശബ്ദം കേട്ടു”- എന്നിങ്ങനെയായിരുന്നു ആക്രമണത്തെ പി. കെ. ശ്രീമതി വിശദീകരിച്ചത്. എറിഞ്ഞത് ബോംബോ, അതിൽ കൂടുതൽ ശക്തിയുള്ള എന്തോ ഒന്നായിരുന്നു എന്നു വ്യക്തമാക്കുന്ന രീതിയിലായിരുന്നു പി. കെ. ശ്രീമതിയുടെ വാക്കുകൾ. എന്നാൽ ഫൊറൻസിക് റിപ്പോർട്ട് വന്നപ്പോൾ കഥ മാറി. എറിഞ്ഞത് ഏറുപടക്കത്തിനു സമാനമായ വസ്തു. ബോംബെന്ന സിപിഎമ്മിൻറെ അവകാശവാദം തള്ളുന്നതായിരുന്നു ശാസ്ത്രീയ പരിശോധനാഫലം. എ. കെ. ജി. സെന്ററിനു നേരെയുണ്ടായ ആക്രമണം ആദ്യം കോൺഗ്രസിനു മേൽ കെട്ടിവെച്ചെങ്കിലും ഇപ്പോൾ ബൂമറാങ്ങായി സിപിഎമ്മിൻറെ നേരെ ആരോപണം എത്തിനിൽക്കുകയാണ്. ഇനി കേരള പോലീസിലേക്ക്.

കേരളത്തിലെ പോലീസിന്റെ കഴിവുകേട് എത്രത്തോളമെന്നു തെളിയിക്കുന്നതാണ് എ. കെ. ജി. സെന്റർ ആക്രമണക്കേസ്. സംസ്ഥാനം ഭരിക്കുന്ന ഒരു പാർട്ടിയുടെ ഓഫീസിനു നേരെ ആക്രമണമുണ്ടായി ഒരു മാസത്തോളമായിട്ടും ഒന്നും കണ്ടെത്താനായിട്ടില്ല എന്നത് വലിയ നാണക്കേടാണ്. ആകെ കിട്ടിയത്, അക്രമി എത്തിയത് ഹോണ്ട ഡിയോ സ്കൂട്ടറിലാണെന്നു മാത്രം!

ഷോറൂമുകൾ, പടക്കക്കടകൾ, സിസിടിവികൾ ഉൾപ്പെടെ കേന്ദ്രീകരിച്ചു പരിശോധന തകൃതിയായെങ്കിലും ഒരു തുമ്പുമില്ല. എകെജി സെന്റർ ആക്രമണക്കേസ് ഉത്തരമില്ലാത്ത ഒരു ചോദ്യമായി നിലനിൽക്കുമ്പോൾ പ്രതിപക്ഷത്തിനു പിന്നാലെ ജനങ്ങളും മറുചോദ്യം ചോദിക്കുന്നുണ്ട്. എറിഞ്ഞതു സിപിഎമ്മുകാർ തന്നെയാണോ? ഇതിനും ഉത്തരം തരാൻ അന്വേഷണ സംഘത്തിനു സാധിക്കില്ല. ഇനി അത്തരത്തിൽ സിപിഎമ്മുകാർ തന്നെയാണ് ഇത് ചെയ്തതെന്നു കണ്ടെത്തിയാൽ എങ്ങനെ പുറത്തുവിടാനാകും. പിറ്റേദിവസം തന്നെ പോലീസുകാർക്ക് ഇത് പിടികിട്ടിയോയെന്നും സംശയിക്കണം. പക്ഷേ എത്ര നാൾ ഇങ്ങനെ അന്വേഷിച്ചു നടക്കാനാകും. ഒരു മുൻകൂർ ജാമ്യമെന്ന പോലെയാണ് സുകുമാരക്കുറുപ്പിനെ പരാമർശിച്ചുള്ള ഇ. പി. ജയരാജന്റെ പ്രതികരണമെന്നാണ് മനസ്സിലാകുന്നത്. അതായത്, എത്ര തെരഞ്ഞാലും ആ അക്രമിയെ കിട്ടാൻ പോകുന്നില്ലെന്നു സാരം. ക്രൈം ബ്രാഞ്ചിനു കൈമാറിയ കേസിൽ ഇനി എന്തു സംഭവിക്കുമെന്നും കണ്ടറിയണം.