രക്തത്തിൽ ഹീമോഗ്ലോബിൻ കുറയാതെ നോക്കാം, ഇവ കഴിച്ചോളൂ

ആരോഗ്യകരമായ രക്താണുക്കളുടെ എണ്ണം നിങ്ങളുടെ മൊത്തത്തിലുള്ള ആരോഗ്യത്തിനും ക്ഷേമത്തിനും പ്രധാനമാണ്. ശരിയായി പ്രവർത്തിക്കാൻ നിങ്ങളുടെ ശരീരത്തിന് ആവശ്യമായ അളവിൽ ഓക്സിജൻ ലഭിക്കുന്നുണ്ടോ എന്ന് ചുവന്ന രക്താണുക്കളുടെ എണ്ണം സൂചിപ്പിക്കുന്നു. ചുവന്ന രക്താണുക്കളിലെ ഒരു പ്രോട്ടീനാണ് ഹീമോഗ്ലോബിൻ, ശരീരത്തിലുടനീളം ഓക്സിജൻ വഹിക്കുന്നതിനുള്ള ഉത്തരവാദിത്തം ഇതിനാണ്. ഈ പ്രോട്ടീൻ കോശങ്ങളിൽ നിന്നും പുറത്തേക്കും ശ്വാസകോശത്തിന്റെ അകത്തേക്കും കാർബൺ ഡൈ ഓക്സൈഡ് കൊണ്ടുപോകുന്നു. ഇത് ഒരു വ്യക്തി ശ്വസിക്കുമ്പോൾ കാർബൺ ഡൈ ഓക്സൈഡ് പുറത്തുവിടാൻ സഹായിക്കുന്നു. കുറഞ്ഞ ഹീമോഗ്ലോബിൻ നില നിങ്ങളുടെ ശരീരത്തെ ഈ നിർണായക പ്രവർത്തനങ്ങൾ ചെയ്യുന്നതിൽ നിന്ന് പിന്തിരിപ്പിക്കും. ഇത് മൂലം ക്ഷീണം, ബലഹീനത, നെഞ്ചുവേദന, ശ്വാസതടസ്സം, തലവേദന അല്ലെങ്കിൽ വിശപ്പില്ലായ്മ തുടങ്ങിയ പ്രശ്നങ്ങൾ ഉണ്ടാകുന്നതിന് കരണമാകുന്നു.



നിങ്ങൾക്ക് അത്തരം ലക്ഷണങ്ങൾ അനുഭവപ്പെടുകയാണെങ്കിൽ, ഡോക്ടറെ സമീപിക്കുന്നത് ശരിയായ സമീപനമാണ്. എന്നിരുന്നാലും, നിങ്ങളുടെ ശരീരത്തിലെ ഇരുമ്പ്, വിറ്റാമിൻ ബി 12 എന്നിവയുടെ നില ചില ഭക്ഷണങ്ങളിലൂടെ വർദ്ധിപ്പിക്കുന്നത് നിങ്ങളുടെ രക്തത്തിലെ ഹീമോഗ്ലോബിന്റെ അളവ് വർദ്ധിപ്പിക്കും. നിങ്ങളുടെ ഹീമോഗ്ലോബിൻ അളവ് വർദ്ധിപ്പിക്കാൻ സഹായിക്കുന്ന ഭക്ഷണങ്ങൾ ഇതാ

ഈ ഭക്ഷണങ്ങൾ നിങ്ങളുടെ ശരീരത്തിലെ ഇരുമ്പ്, ഫോളേറ്റ്, വിറ്റാമിൻ ബി 12 എന്നിവയുടെ അളവും ചുവന്ന രക്താണുക്കളുടെ എണ്ണവും വർദ്ധിപ്പിക്കുകയും ചെയ്യും:

1. ചീര



കുറഞ്ഞ കലോറിയും ഉയർന്ന അളവിൽ പോഷകങ്ങളും അടങ്ങിയ ചീര നിങ്ങളുടെ ഭക്ഷണത്തിൽ ഉൾപ്പെടുത്തേണ്ട ഒരു സൂപ്പർഫുഡ് ആണെന്ന് തന്നെ വിശേഷിപ്പിക്കാം. ചീരയിൽ ഇരുമ്പ് ധാരാളം അടങ്ങിയിട്ടുണ്ട്, കൂടാതെ, ഇരുമ്പ് ആഗിരണം വർദ്ധിപ്പിക്കുന്ന വിറ്റാമിൻ സിയും ഇതിലുണ്ട്. ഈ ഇലക്കറികളിൽ ആന്റിഓക്‌സിഡന്റുകൾ അടങ്ങിയിട്ടുണ്ട്, ഇത് വീക്കം കുറയ്ക്കുകയും ശരീരത്തിന്റെ പ്രതിരോധശേഷി വർദ്ധിപ്പിക്കുകയും ചെയ്യുന്നു.

2. വിത്തുകൾ



ചെറുചന, മത്തങ്ങ, ചിയ തുടങ്ങിയ വിത്തുകളിൽ ആവശ്യമായ അളവിൽ മഗ്നീഷ്യം, ഇരുമ്പ്, ഫൈബർ, ഒമേഗ 3 ഫാറ്റി ആസിഡുകൾ എന്നിവ അടങ്ങിയിട്ടുണ്ട്, ഇത് ഉയർന്ന അളവിലുള്ള കൊളസ്ട്രോളിനെ ചെറുക്കാൻ സഹായിക്കും. ഉപാപചയ പ്രക്രിയകളിൽ ഉൽ‌പാദിപ്പിക്കുന്ന ദോഷകരമായ ഫ്രീ റാഡിക്കലുകളിൽ നിന്ന് വിത്തുകൾക്ക് നിങ്ങളുടെ കോശങ്ങളെ സംരക്ഷിക്കാനും കഴിയും.

ശീതീകരിച്ച ഭക്ഷണം പതിവായി കഴിക്കാറുണ്ടോ? സൂക്ഷിക്കണം

3. ബ്രൊക്കോളി



ഒരു ഊർജ്ജ ഭക്ഷണം എന്ന നിലയ്ക്ക് ബ്രൊക്കോളി നിങ്ങൾക്ക് ആവശ്യമായ അളവിൽ പോഷകങ്ങൾ പ്രദാനം ചെയ്യുന്നു. ഇതിൽ ഇരുമ്പ് അടങ്ങിയിട്ടുണ്ട്, കൂടാതെ, ഇതിലെ വിറ്റാമിൻ സി നിങ്ങളുടെ ശരീരത്തെ ഇരുമ്പ് നന്നായി ആഗിരണം ചെയ്യാൻ സഹായിക്കുന്നു. ഈ അത്ഭുതകരമായ പച്ചക്കറിയിൽ ഫൈബർ, പ്രോട്ടീൻ, കാൽസ്യം, സെലിനിയം, മഗ്നീഷ്യം എന്നിവയും അടങ്ങിയിട്ടുണ്ട്, അതിനാൽ വിളർച്ചയോട് പോരാടുവാനും പേശികൾ വളർത്തുവാനും അസ്ഥികളെ ശക്തിപ്പെടുന്നതിനും ബ്രൊക്കോളി ഏറ്റവും ആരോഗ്യകരമായ ഭക്ഷണമാണ്.

4. ഡാർക്ക് ചോക്ലേറ്റ്



ഡാർക്ക് ചോക്ലേറ്റിൽ ആന്റിഓക്‌സിഡന്റുകൾ, മഗ്നീഷ്യം, ഇരുമ്പ് എന്നിവയും അടങ്ങിയിട്ടുണ്ട്. ഇത് വീക്കം കുറയ്ക്കുന്നതിന് സഹായിക്കുന്നു, “മോശം” എൽഡിഎൽ കൊളസ്ട്രോൾ, രക്തസമ്മർദ്ദം എന്നിവ കുറയ്ക്കാനും ഇത് ഫലപ്രദമാണ്. ഹൃദ്രോഗത്തിനുള്ള അപകടസാധ്യത കുറയ്ക്കുന്നതിന് പോഷക സമ്പുഷ്ടവും രുചികരവുമായ ഈ വിഭവം സഹായകമാണ്.

5. മുട്ട



പ്രോട്ടീനുകൾ ധാരാളമായി അടങ്ങിയിരിക്കുന്നതിനൊപ്പം, വിറ്റാമിൻ ഡി, ഫോളേറ്റ്, അമിനോ ആസിഡുകൾ, വിറ്റാമിൻ ബി 12, ഇരുമ്പ് തുടങ്ങിയ ധാതുക്കളും മുട്ടയിൽ അടങ്ങിയിട്ടുണ്ട്. ഈ പോഷകങ്ങളുടെ സാന്നിധ്യം പേശികളുടെയും അസ്ഥികളുടെയും ശക്തി വർദ്ധിപ്പിക്കുന്നതിനും “നല്ല കൊളസ്ട്രോൾ” എന്നും അറിയപ്പെടുന്ന ഉയർന്ന സാന്ദ്രതയുള്ള ലിപ്പോപ്രോട്ടീന്റെ (എച്ച്ഡിഎൽ) അളവ് വർദ്ധിപ്പിക്കുന്നതിനും, കൂടാതെ ഹൃദ്രോഗ സാധ്യത കുറയ്ക്കുന്നതിനും സഹായിക്കുകയും ചെയ്യുന്നു.

അതിനാൽ, ഹീമോഗ്ലോബിൻ അളവ് കുറയുന്നതിന്റെ ലക്ഷണങ്ങളെക്കുറിച്ച് ജാഗ്രത പാലിക്കുക, നിങ്ങളുടെ രക്തത്തിലെ ഹീമോഗ്ലോബിന്റെ എണ്ണം വർദ്ധിപ്പിക്കുന്നതിന് ഈ ഭക്ഷണങ്ങൾ ഭക്ഷണക്രമത്തിൽ ചേർക്കുക.