അനന്ത്നാഗിൽ പോലീസ് സംഘത്തിന് നേരെ ഭീകരർ വെടിയുതിർത്തു; പോലീസുകാരന് പരിക്ക്

അനന്ത്നാഗ്: ജമ്മു കശ്മീരിലെ അനന്ത്നാഗിൽ പോലീസ് സംഘത്തിന് നേരെ ഭീകരർ വെടിയുതിർത്തു. അനന്ത്നാഗ് ജില്ലയിലെ ലസിബാൽ പ്രദേശത്താണ് സംഭവം. വെടിവെയ്പ്പിൽ ഒരു പോലീസുകാരന് പരിക്കേറ്റു. വ്യാഴാഴ്ച രാത്രി 8.50 ഓടെയാണ് വെടിവെയ്പ്പ് ഉണ്ടായതെന്ന് വാർത്താ ഏജൻസിയായ എഎൻഐ റിപ്പോർട്ട് ചെയ്തു.



പട്രോളിംഗ് ഡ്യൂട്ടിയിലുണ്ടായിരുന്ന സംഘത്തിന് നേരെയാണ് വെടിവെപ്പ് നടന്നത്. തുടർന്ന് കൂടുതൽ പോലീസ് സംഘം സ്ഥലത്തെത്തി ഭീകരർക്കായി തിരച്ചിൽ നടത്തി.

Also Read : ജമ്മു കശ്മീർ വീണ്ടും കലുഷിതം; ലഷ്കര്‍ ഇ തയ്ബ കമാൻഡര്‍ ഏറ്റുമുട്ടലിൽ കൊല്ലപ്പെട്ടു



അതേസമയം പുൽവാമയിലെ രാജ്പോറയിൽ തീവ്രവാദികളും സുരക്ഷാ സേനയും തമ്മിൽ ഏറ്റുമുട്ടൽ നടക്കുകയാണെന്ന റിപ്പോർട്ടുകളും പുറത്തുവരുന്നുണ്ട്. ഇതുമായി ബന്ധപ്പെട്ട കൂടുതൽ റിപ്പോർട്ടുകളൊന്നും ലഭ്യമായിട്ടില്ല. സൈന്യവും ഭീകരരും തമ്മിൽ രാജ്പോറയിൽ ഏറ്റുമുട്ടൽ നടക്കുകയാണെന്ന് എഎൻഐയാണ് റിപ്പോർട്ട് ചെയ്തത്.

Also Read : ‘ലഭിച്ച വാഹനവും വസതിയും ഇഷ്ടമായില്ല’: ബിഹാറിൽ മന്ത്രി രാജിവച്ചു, ഉദ്യോഗസ്ഥർക്ക് വിമർശനം



ജമ്മു കശ്മീരിൽ കഴിഞ്ഞ കുറച്ചുദിവസങ്ങളായി സൈന്യവും ഭീകരരരും തമ്മിൽ ഏറ്റുമുട്ടൽ തുടരുകയാണ്. ബുധനാഴ് കുൽഗാമിൽ നടന്ന ഏറ്റുമുട്ടലിൽ സൈന്യം രണ്ട് ഭീകരരെ വധിച്ചിരുന്നു. ചൊവ്വാഴ്ച രാത്രി ശ്രീനഗറിൽ നടന്ന ഏറ്റുമുട്ടലിലും രണ്ട് ഭീകരരെ വധിച്ചിരുന്നു. ശ്രീനഗറിലെ പരിംപോറ പ്രദേശത്ത് ഉണ്ടായ ഏറ്റുമുട്ടലിനിടെ ലഷ്കർ ഇ തയ്ബ കമാൻഡര്‍ ഭീകരരെയാണ് കൊലപ്പെടുത്തിയത്. സ്ഥലത്ത് നിന്ന് രണ്ട് എകെ 47 റൈഫിളുകളും വെടിക്കോപ്പുകളും ഉൾപ്പെടെ കണ്ടെടുക്കുകയും ചെയ്തിരുന്നു.