റിയാദ്: ഗള്‍ഫ് മേഖലയിലെ താപനില കൂടിവരുന്നതായി റിപ്പോര്‍ട്ടുകള്‍. കുവൈറ്റിലെ ചില പ്രദേശങ്ങളില്‍ ലോകത്തിലെ ഏറ്റവും കൂടിയ താപനില റിപ്പോര്‍ട്ട് ചെയ്യപ്പെട്ടതിന് പിന്നാലെ സൗദിയിലും ചൂട് കൂടിവരുന്നതായി കണക്കുകള്‍ വ്യക്തമാക്കുന്നു. കഴിഞ്ഞ 30 വര്‍ഷത്തിനിടയിലെ ഏറ്റവും കൂടിയ ചൂടാണ് ഇക്കഴിഞ്ഞ മേയ് മാസം സൗദിയില്‍ രേഖപ്പെടുത്തിയതെന്ന് നാഷനല്‍ സെന്റര്‍ ഓഫ് മിറ്റീരിയോളജിയിലെ ക്ലൈമറ്റ് സര്‍വീസസ് വകുപ്പ് അറിയിച്ചു.

​ആഗസ്തില്‍ ചൂട് കൂടുമെന്ന് മുന്നറിയിപ്പ്

1991ന് ശേഷമുള്ള ഏറ്റവും കൂടിയ ചൂടാണ് കഴിഞ്ഞ മെയ് മാസം സൗദിയില്‍ രേഖപ്പെടുത്തിയത്. കഴിഞ്ഞ മൂന്ന് പതിറ്റാണ്ടിലെ മെയ് മാസത്തെ താപനില പരിശോധിച്ചാണ് ഈ കണ്ടെത്തലെന്ന് നാഷനല്‍ സെന്റര്‍ ഓഫ് മിറ്റീരിയോളജി ട്വിറ്ററില്‍ വ്യക്തമാക്കി. അതേസമയം, ഇത്തവണത്തെ ആഗ്‌സ്തില്‍ ചൂട് കൂടുമെന്നാണ് പ്രവചനം. ഈ വര്‍ഷത്തെ ഏറ്റവും കൂടിയ ചൂടായിരിക്കും അടുത്ത മാസം ഉണ്ടാവുകയെന്ന് നാഷനല്‍ സെന്റര്‍ വ്യക്തമാക്കി. 29.2 ഡിഗ്രി സെല്‍ഷ്യസിനും 43.6 ഡിഗ്രി സെല്‍ഷ്യസിനും ഇടയിലായിരിക്കും ആഗസ്തിലെ ശരാശരി താപനില.

​ഏറ്റവും കൂടിയ ചൂട് ജിദ്ദയില്‍

സൗദിയിലെ പടിഞ്ഞാറന്‍ നഗരമായ ജിദ്ദയിലാണ് ഏറ്റവും കൂടിയ താപനില രേഖപ്പെടുത്തിയതെന്ന് നാഷനല്‍ സെന്റര്‍ ഓഫ് മിറ്റീരിയോളജി വക്താവ് ഹുസൈന്‍ അല്‍ ഖഹ്ത്താനി അറിയിച്ചു. 2020ലെ കണക്കുകള്‍ പ്രകാരമാണിത്. 52.3 ഡിഗ്രി സെല്‍ഷ്യസായിരുന്നു കഴിഞ്ഞ വര്‍ഷത്തെ ജിദ്ദയിലെ കൂടിയ താപനില. ഇതോടെ ലോകത്തിലെ ഏറ്റവും ചൂടേറിയ രണ്ടാമത്തെ നഗരമായി ജിദ്ദ മാറിയിരുന്നു. പാകിസ്താനിലെ മൊഹന്‍ജൊദാരോ ആയിരുന്നു ഏറ്റവും ചൂട് കൂടിയ പ്രദേശം. 53.5 ഡിഗ്രിയായിരുന്നു കഴിഞ്ഞ വര്‍ഷത്തെ ഇവിടത്തെ ശരാശരി താപനില.

​ജനങ്ങള്‍ ജാഗ്രത പാലിക്കണമെന്ന് മുന്നറിയിപ്പ്

ചൂട് ക്രമാതീതമായി കൂടിവരുന്ന സാഹചര്യത്തില്‍ ജനങ്ങള്‍ ജാഗ്രത പാലിക്കണമെന്ന് ഫാമിലി അഫയേഴ്‌സ് കൗണ്‍സില്‍ മുന്നറിയിപ്പ് നല്‍കി. കനത്ത ചൂടില്‍ നിന്ന് രക്ഷ നേടാന്‍ പ്രധാനമായും നാലു വഴികളാണ് അധികൃതര്‍ നിര്‍ദ്ദേശിക്കുന്നത്. വെള്ളം, ജ്യൂസ് തുടങ്ങിയവ ധാരാളമായി കഴിക്കുക, തല നല്ല രീതിയില്‍ വസ്ത്രം കൊണ്ട് മറയ്ക്കുക, ചൂട് ഉണ്ടാക്കുന്ന ഉപകരണങ്ങള്‍ ഉപയോഗിക്കുന്നത് പരമാവധി ഒഴിവാക്കുക, പുറത്തിറങ്ങുമ്പോള്‍ സണ്‍സ്‌ക്രീന്‍ ക്രീമുകള്‍ ഉപയോഗിക്കുക എന്നിവയാണ് നിര്‍ദ്ദേശങ്ങള്‍. അതേസമയം, വീടുകളില്‍ ചൂടിന്റെ ആഘാതം കുറയ്ക്കാന്‍ വീട്ടിനു ചുറ്റും സാധ്യമായ ഇടങ്ങളിലെല്ലാം മരങ്ങളും ചെടികളും നട്ടുപിടിപ്പിക്കണമന്നും അധികൃതര്‍ നിര്‍ദ്ദേശിച്ചു.

​തൊഴിലാളികളുടെ സുരക്ഷ ഉറപ്പുവരുത്തണം

അതേസമയം, രാജ്യത്ത് ചൂട് കൂടിവരുന്ന പശ്ചാത്തലത്തില്‍ പുറം ജോലികള്‍ ചെയ്യുന്ന തൊഴിലാളികളുടെ ആരോഗ്യ സുരക്ഷ ഉറപ്പുവരുത്തുന്ന കാര്യത്തില്‍ തൊഴിലുടമകള്‍ ജാഗ്രത പാലിക്കണമെന്ന് റിയാദിലെ ഡയരക്ടറേറ്റ് ഓഫ് ഹെല്‍ത്ത് അഫയേഴ്‌സ് മുന്നറിയിപ്പ് നല്‍കി. ചൂടുകാലത്തെ തൊഴില്‍ സമയക്രമം കൃത്യമായി പാലിക്കുന്നതിനോടൊപ്പം കനത്ത ചൂട് കാരണം ഉണ്ടാകുന്ന ആരോഗ്യ പ്രശ്‌നങ്ങള്‍ തടയുന്നതിനുള്ള മുന്‍കരുതലുകള്‍ കൈക്കൊള്ളണം. നിര്‍ജ്ജലീകരണം ഉണ്ടാവുന്നില്ലെന്ന് ഉറപ്പുവരുത്തണം. ക്ഷീണം. തലകറക്കം, തലവേദന, വര്‍ധിച്ച ഹൃദയമിടിപ്പ് തുടങ്ങിയവ അനുഭവപ്പെടുന്നവരെ ഉടന്‍ വിശ്രമ കേന്ദ്രത്തിലേക്ക് മാറ്റുകയും ആവശ്യമായ പ്രഥമ ശുശ്രൂഷ നല്‍കുകയും വേണം. തൊഴിലാളി ഛര്‍ദ്ദിക്കുകയോ ശാരീരിക അസ്വസ്ഥത ഒരു മണിക്കൂറിലേറെ നീണ്ടുനില്‍ക്കുകയോ ചെയ്യുന്ന പക്ഷം ഉടന്‍ വിദഗ്ധ ചികില്‍സ തേടണമെന്നും അധികൃതര്‍ അറിയിച്ചു.