നാല് അലേര്‍ട്ട് ലെവലുകള്‍ ഏതൊക്കെ?
ഗ്രീന്‍ ലെവല്‍: തുടര്‍ച്ചയായി 14 ദിവസം ശരാശരി ടെസ്റ്റ് പോസിറ്റിവിറ്റി റേറ്റ് രണ്ട് ശതമാനത്തില്‍ താഴെ.
യെല്ലോ ലെവല്‍: തുടര്‍ച്ചയായ ഏഴ് ദിവസത്തെ ടിപിആര്‍ ശരാശരി രണ്ടിനും അഞ്ചിനും ഇടയില്‍.
ഓറഞ്ച് ലെവല്‍: തുടര്‍ച്ചയായ നാല് ദിവസത്തെ ശരാശരി ടിപിആര്‍ അഞ്ചിനും എട്ടിനും ഇടയില്‍.
റെഡ് ലെവല്‍: തുടര്‍ച്ചയായ മൂന്ന് ദിവസത്തെ ശരാശരി ടിപിആര്‍ എട്ടിന് മുകളില്‍.
ഒരു ലെവലില്‍ നിന്ന് തൊട്ടു താഴെയുള്ള ലെവലിലേക്ക് മാറണമെങ്കില്‍ ഒരാഴ്ചയെങ്കിലും താഴത്തെ ലെവലില്‍ തുടരണം. അതായത് ടെസ്റ്റ് പോസിറ്റിവിറ്റി റേറ്റ് എട്ടില്‍ നിന്ന് ഏഴായി കുറഞ്ഞാല്‍ പിറ്റേ ദിവസം തന്നെ ചുവപ്പില്‍ നിന്ന് ഓറഞ്ചിലേക്ക് ലെവല്‍ മാറുകയില്ല. മറിച്ച് ഈ രീതിയില്‍ ഒരാഴ്ച തുടര്‍ന്നാല്‍ എട്ടാം ദിവസം മുതല്‍ ലെവല്‍ ഓറഞ്ചാവും. അതേസമയം, മുകളിലേക്ക് ലെവല്‍ മാറുന്നതിന് ഈ നിയമം ബാധകമല്ല. തൊട്ടുടനെയുള്ള ദിവസം തന്നെ മുകളിലേക്കുള്ള ലെവലിലേക്ക് മാറും. ഉദാഹരണമായി ടിപിആര്‍ ഏഴില്‍ നിന്ന് എട്ടായി ഉയര്‍ന്നാല്‍ ഓറഞ്ചില്‍ നിന്ന് റെഡ് ആവാന്‍ ഒരാഴ്ച കാത്തുനില്‍ക്കില്ല. പകരം അന്നേ ദിവസം തന്നെ റെഡിലേക്ക് ലെവല്‍ മാറും.
പുതിയ സംവിധാനം ഇന്ന് മുതല്‍ പ്രാബല്യത്തില്‍
പുതിയ സിഗ്നല്‍ സംവിധാനം ജൂലൈ രണ്ട് വെള്ളിയാഴ്ച മുതല്‍ നിലവില്‍ വരും. നിലവിലെ കൊവിഡ് ടെസ്റ്റ് പോസിറ്റിവിറ്റി റേറ്റ് പ്രകാരം യെല്ലോ വിഭാഗത്തിലാണ് ഇപ്പോള്‍ രാജ്യം ഉള്ളത്. ഈ കാറ്റഗറിയില്‍ ലഭിക്കുന്ന ഇളവുകള്‍ പ്രകാരം ഇന്നു മുതല്‍ വിവിധ മേഖലകള്‍ ഭാഗികമായി തുറക്കും. കൊവിഡ് വാക്സിന്‍ രണ്ട് ഡോസുകള്‍ സ്വീകരിച്ച ശേഷം 14 ദിവസം പൂര്‍ത്തിയായവര്‍ക്കും രോഗമുക്തി നേടിയവര്‍ക്കും ഈ രണ്ടു വിഭാഗത്തില്‍പ്പെട്ടവരുടെ കൂടെയുള്ള 12 വയസ്സില്‍ താഴെയുള്ളവര്‍ക്കും വ്യാപാര സ്ഥാപനങ്ങളിലും മറ്റും പ്രവേശനം അനുവദിക്കും. അതായത് ബിഎവയര്‍ ആപ്പിലെ ഗ്രീന്‍ സ്റ്റാറ്റസ് ഉള്ളവര്‍ക്കും കൂടെ വരുന്ന കുട്ടികള്‍ക്കും മാത്രമായിരിക്കും ഇവിടങ്ങളില്‍ പ്രവേശനം.
പ്രവേശനത്തിന് അനുമതി എവിടെയെല്ലാം?
മാളുകള്‍, ഷോപ്പുകള്‍, റസ്റ്റോറന്റുകള്‍, കഫേകള്‍ (ഇന്‍ഡോര്‍, ഔട്ട്‌ഡോര്‍ സേവനങ്ങള്‍), സ്‌പോര്‍ട്‌സ് സെന്ററുകള്‍, ജിംനേഷ്യം, നീന്തല്‍ കുളങ്ങള്‍, വിനോദ പരിപാടികള്‍, അമ്യൂസ്‌മെന്റ് പാര്‍ക്കുകള്‍, ഇവന്റുകള്‍, കോണ്‍ഫറന്‍സുകള്‍, കായിക മത്സരങ്ങള്‍, മസാജ് സെന്ററുകള്‍, സ്പാകള്‍, ബാര്‍ബര്‍ ഷോപ്പുകള്‍, സലൂണുകള്‍, സിനിമ തിയറ്ററുകള്‍ (50 ശതമാനം ശേഷിയില്‍ മാത്രം പ്രവേശനം) എന്നിവിടങ്ങളിലാണ് പ്രവേശനം അനുവദിക്കുക. ഇതിനു പുറമെ, യെല്ലോ ലെവലില്‍ വാക്സിന്‍ എടുത്തവര്‍ക്കും അല്ലാത്തവര്‍ക്കും ചില മേഖലകളില്‍ ഇളവ് അനുവദിച്ചിട്ടുണ്ട്. വീടുകളില്‍ 30 പേരില്‍ കൂടാത്ത ചടങ്ങുകള്‍ നടത്തല്‍, പരിശീലന കേന്ദ്രങ്ങള്‍, സ്‌കൂളുകള്‍ എന്നിവിടങ്ങളിലെ പ്രവേശനം, മാളുകള്‍ക്ക് പുറത്തുള്ള ഷോപ്പുകളിലും സര്‍ക്കാര്‍ ഓഫിസുകളിലും പ്രവേശനം എന്നിവയ്ക്കായിരിക്കും അനുമതി. സര്‍ക്കാര്‍ സ്ഥാപനങ്ങളില്‍ 50 ശതമാനം ജീവനക്കാര്‍ക്ക് ഹാജരാവാം. ബാക്കിയുള്ളവര്‍ വര്‍ക്ക് അറ്റ് ഹോം സംവിധാനത്തില്‍ ജോലി ചെയ്യണം.
എല്ലാ ലെവലുകളിലും അനുവദിക്കപ്പെടുന്നവ
അതേസമയം, അവശ്യ സേവന വിഭാഗങ്ങളില്‍ പെട്ട സ്ഥാപനങ്ങള്‍ക്ക് എല്ലാ ലെവലുകളിലും തുറന്നു പ്രവര്‍ത്തിക്കാന്‍ അനുമതിയുണ്ടായിരിക്കുമെന്നും അധികൃതര്‍ അറിയിച്ചു. ഹൈപ്പര്‍-സൂപ്പര്‍ മാര്‍ക്കറ്റുകള്‍, പലചരക്കു കടകള്‍, മല്‍സ്യ-മാംസ-പച്ചക്കറി കടകള്‍, ബേക്കറികള്‍, പെട്രോള്‍, ഗ്യാസ് സ്‌റ്റേഷനുകള്‍, അടിയന്തര സ്വഭാവമുള്ള ആരോഗ്യ സ്ഥാപനങ്ങള്‍, ബാങ്കുകള്‍, മറ്റ് ധനകാര്യ സ്ഥാപനങ്ങള്‍, ഉപഭോക്താക്കളുമായി നേരിട്ട് ഇടപഴകാത്ത സ്ഥാപനങ്ങളുടെ അഡ്മിനിസ്‌ട്രേറ്റീവ് ഓഫീസുകള്‍, കയറ്റുമതി- ഇറക്കുമതി സ്ഥാപനങ്ങള്‍, ഓട്ടോമൊബൈല്‍ റിപ്പയറിംഗ് സ്ഥാപനങ്ങള്‍, സ്‌പെയര്‍പാര്‍ട്‌സ് കടകള്‍, ഫാക്ടറികള്‍, ടെലകോം ഓഫീസുകള്‍, ഫാര്‍മസികള്‍, നിര്‍മാണം- മെയിന്റനന്‍സ് മേഖലകളില്‍ പ്രവര്‍ത്തിക്കുന്ന സ്ഥാപനങ്ങള്‍ എന്നിവയ്ക്കാണ് എല്ലാ ലെവലുകളിലും പ്രവര്‍ത്തനാനുമതി ഉള്ളത്.
Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
ഏറ്റവും പുതിയ വാർത്തകൾ അതിവേഗം അറിയാൻ Samayam Malayalam ഫേസ്ബുക്ക് പേജ് ലൈക്ക് ചെയ്യൂ
Web Title : bahrain launches new alert level traffic light system as part of covid defense
Malayalam News from malayalam.samayam.com, TIL Network
