കുറയാതെ കൊവിഡ്; കേരളം അടക്കം ഉയര്‍ന്ന കേസുകളുള്ള ആറ് സംസ്ഥാനങ്ങളിലേക്ക് കേന്ദ്ര സംഘം

ന്യൂഡൽഹി: രണ്ടാം തരംഗം അവസാനിച്ച് രാജ്യത്തെ കൊവിഡ് കേസുകള്‍ കുറയുകയാണെങ്കിലും ഏതാനും ചില സംസ്ഥാനങ്ങളില്‍ ഇപ്പോഴും കേസുകള്‍ ഉയര്‍ന്ന തന്നെ നിൽക്കുകയാണ്. ഉയര്‍ന്ന കേസുകള്‍ റിപ്പോര്‍ട്ട് ചെയ്യുന്ന സംസ്ഥാനത്തേക്ക് കേന്ദ്ര സംഘത്തെ അയച്ചു.



കേരളം, അരുണാചൽ പ്രദേശ്, ത്രിപുര, ഒഡീഷ, ഛത്തീസ്ഗഡ്, മണിപ്പൂര്‍ എന്നീ സംസ്ഥാനങ്ങളിലേക്കാണ് കേന്ദ്ര സംഘം എത്തുന്നത്.

Also Read : കേന്ദ്രമന്ത്രിസഭാ പുനസംഘടന ഉടൻ; സിന്ധ്യ, മോദി, സോനോവാള്‍ മന്ത്രിസ്ഥാനത്തേക്ക് 25 ഓളം പേര്‍; വിശദ വിവരങ്ങൾ

ഈ കേന്ദ്ര സംഘങ്ങള്‍ സംസ്ഥാന അധികാരികളുമായി സംവദിക്കുകയും കൊവിഡ് -19 കേസുകളിൽ വ്യാപനം തടയുന്നതിനെ നേരിടുന്ന വെല്ലുവിളികളെയും പ്രശ്നങ്ങളെയും കുറിച്ച് മനസ്സിലാക്കുകയും ചെയ്യും. നിയന്ത്രണ നടപടികൾ ശക്തിപ്പെടുത്തുന്നതിലെ തടസ്സങ്ങൾ നീക്കുകയാണ് സംഘങ്ങളുടെ പ്രധാന ലക്ഷ്യം.

സംഘം സംസ്ഥാനങ്ങളിലെ സ്ഥിതിഗതികൾ വിലയിരുത്തി പൊതുജനാരോഗ്യ പ്രവർത്തനങ്ങൾക്കുള്ള പരിഹാര നടപടികൾ അതത് സംസ്ഥാന സർക്കാരുകൾക്ക് നിര്‍ദ്ദേശിക്കുകയും ചെയ്യും. അതിന് പുറമെ, റിപ്പോർട്ടിന്റെ പകർപ്പ് കേന്ദ്ര ആരോഗ്യ മന്ത്രാലയത്തിനും സമർപ്പിക്കും.

ഇന്ന് രാജ്യത്ത് 853 മരണം റിപ്പോര്‍ട്ട് ചെയ്തു. ഇതോടെ ആകെ മരണം നാല് ലക്ഷം പിന്നിട്ടു. ലോകത്തിലെ തന്നെ ഏറ്റവുമധികം കൊവിഡ് മരണങ്ങള്‍ റിപ്പോര്‍ട്ട് ചെയ്ത മൂന്നാമത്തെ രാജ്യമായി ഇന്ത്യ മാറുകയും ചെയ്തു. ഇതുവരെ 4,00,312 മരണമാണ് രാജ്യത്ത് ഉണ്ടായിരിക്കുന്നത്. ബ്രസീലിൽ 5.2 ലക്ഷവവും അമേരിക്കയിൽ ഇത് 6.05 ലക്ഷവുമാണ്.

Also Read : കാനഡയിൽ ചൂട് കൂടുന്നു, ആക്കം കൂട്ടി കാട്ടുതീ; അഞ്ഞൂറോളം ആളുകള്‍ മരിച്ചു, 1000 പേരെ മാറ്റി പാര്‍പ്പിച്ചു



രാജ്യത്ത് കഴിഞ്ഞ 24 മണിക്കൂറിനിടെ 46,617 കൊവിഡ് കേസുകളാണ് സ്ഥിരീകരിച്ചത്. ഇതോടെ ആകെ കൊവിഡ് ബാധിതരുടെ എണ്ണം 3,04,58,251 ആയി ഉയർന്നിരിക്കുകയാണ്. 5,09,637 ആക്ടീവ് കൊവിഡ് കേസുകളാണ് നിലവിൽ രാജ്യത്തുള്ളത്. 2,95,48,302 പേർക്ക് രോഗമുക്തി ലഭിച്ചതായും ആരോഗ്യ മന്ത്രാലയം വ്യക്തമാക്കി. കഴിഞ്ഞദിവസം 59,384 പേരാണ് രോഗം ഭേദമായി ആശുപത്രി വിട്ടത്.