ഔപചാരിക ഉദ്ഘാടനം സപ്തംബര്‍ 9ന്
സ്റ്റേഡിയത്തിന്റെ ഔപചാരിക ഉദ്ഘാടനം സപ്തംബര്‍ ഒന്‍പതിന് നടത്താനാണ് അധികൃതര്‍ പദ്ധതിയിട്ടിരിക്കുന്നത്. പ്രത്യേകമായി ഒരുക്കിയ ലുസൈല്‍ സൂപ്പര്‍ കപ്പ് മല്‍സരത്തിന്റെ ഭാഗമായുള്ള മല്‍സരം ഉദ്ഘാടനത്തിന്റെ ഭാഗമായി നടക്കും. സൗദി പ്രോ ലീഗ് ചാംപ്യന്‍മാരും ഈജിപ്ത് പ്രീമിയര്‍ ലീഗ് വിജയികളും തമ്മിലായിരിക്കും ഉദ്ഘാടന മല്‍സരം. മല്‍സര ശേഷം ലോകപ്രശസ്ത സംഗീതജ്ഞര്‍ നയിക്കുന്ന സംഗീത വിരുന്നും സംഘടിപ്പിക്കും. ഇതിന്റെ വിശദാംശങ്ങള്‍ പുറത്തുവിട്ടിട്ടില്ല. ഡിസംബര്‍ 18നാണ് ഇവിടെ ലോക കപ്പ് ഫൈനല്‍ മല്‍സരം അരങ്ങേറുക.
80,000 പേര്‍ക്ക് കളികാണാന്‍ സൗകര്യം
ഖത്തര്‍ ലോകകപ്പ് ഫൈനല്‍ മത്സരത്തിനായി ഒരുക്കിയ അതി മനോഹരമായ സ്റ്റേഡിയമാണ് ലുസൈല്‍. ദോഹയില്‍ നിന്ന് 15 കിലോമീറ്റര്‍ വടക്കുമാറി ലുസൈന്‍ സിറ്റിയില്‍ സ്ഥിതി ചെയ്യുന്ന സ്റ്റേഡിയത്തില്‍ 80000 പേര്‍ക്ക് കളി കാണാനുള്ള സൗകര്യമുണ്ട്. പശ്ചിമേഷ്യയിലെ തന്നെ ഏറ്റവും വലിയ ഫുട്ബോള്‍ സ്റ്റേഡിയം എന്ന ഖ്യാതിയും ലുസൈല്‍ സ്‌റ്റേഡിയത്തിനുണ്ട്. ലോകകപ്പിനൊരുക്കിയ എട്ട് സ്റ്റേഡിയങ്ങളില്‍ ഇനിയും ഉദ്ഘാടനം ചെയ്യപ്പെടാത്ത ഏക വേദി കൂടിയാണിത്. പരമ്പരാഗത അറബ് പാനപാത്രത്തില്‍ ഫനാര്‍ റാന്തലിന്റെ വെളിച്ചവും നിഴലും വീഴുന്ന ഡിസൈനിലാണ് ലുസൈല്‍ സ്റ്റേഡിയം പണി കഴിപ്പിച്ചിരിക്കുന്നത്. അറബ് ആതിഥ്യ മര്യാദകളുടെയും അറബ് സംസ്‌ക്കാരത്തിന്റെയും പ്രതീകമായാണ് ഈ ഡിസൈന്‍ വിലയിരുത്തപ്പെടുന്നത്.
കിക്കോഫിലേക്കുള്ള അവസാന നാഴികക്കല്ല്
നവംബറില്‍ നടക്കുന്ന ഫിഫ ലോകകപ്പിന് കിക്കോഫിലേക്കുള്ള അവസാനത്തെ നാഴികക്കല്ലാണ് ലുസൈല്‍ സ്റ്റേഡിയത്തിന്റെ ഉദ്ഘാടനമെന്ന് ലോകകപ്പിന്റെ പ്രാദേശിക സംഘാടകരായ സുപ്രിം കമ്മിറ്റി ഫോര്‍ ഡെലിവറി ആന്റ് ലെഗസിയുടെ സെക്രട്ടറി ജനറല്‍ ഹസന്‍ അല്‍ തവാദി പറഞ്ഞു. ഖത്തര്‍ ദേശീയ ദിനം കൂടിയായ ഡിസംബര്‍ 18ന് ലോകകപ്പ് ഫൈനല്‍ ഇവിടെ അരങ്ങേറുമ്പോള്‍ ഈ സ്‌പോര്‍ട്‌സ് വിസ്മയത്തിലേക്കായിരിക്കും ലോകത്തിന്റെ മുഴുവന്‍ ശ്രദ്ധയുമെന്നും അദ്ദേഹം അഭിപ്രായപ്പെട്ടു.
100 കൗണ്ട് ഡൗണ്‍ ആഘോഷങ്ങള്‍ക്ക് തുടക്കം
അതിനിടെ, ലോകകപ്പ് 100 ദിന കൗണ്ട്ഡൗണ്‍ പരിപാടികളുടെ ഭാഗമായുള്ള ആഘോഷ പരിപാടികള്‍ക്ക് ഖത്തറില്‍ തുടക്കമായി. വിവിധ സംഘടനകളുടെയും സ്ഥാപനങ്ങളുടെയും നേതൃത്വത്തില്‍ വൈവിധ്യമാര്‍ന്ന പരിപാടികളാണ് ഇതിന്റെ ഭാഗമായി സംഘടിപ്പിച്ചിരിക്കുന്നത്. ഇതിന്റെ ഭാഗമായി രാജ്യത്തെ വിവിധ മാളുകളിലും ആഘോഷ പരിപാടികള്‍ക്ക് ഇന്ന് തുടക്കമാകും. ദോഹ ഫെസ്റ്റിവല്‍ സിറ്റി, മാള്‍ ഓഫ് ഖത്തര്‍, വെന്‍ഡോം മാള്‍ എന്നിവിടങ്ങളിലാണ് പരിപാടികള്‍ നടക്കുന്നത്. ഫെസ്റ്റിവല്‍ സിറ്റിയിലും വെന്‍ഡോം മാളിലും ഉച്ചയ്ക്ക് 12 മണി മുതലും മാള്‍ ഓഫ് ഖത്തറില്‍ ഒരു മണി മുതലുമാണ് വിവിധ പരിപാടികള്‍ക്ക് തുടക്കമാവുക.
ലോകകപ്പ് മത്സരം ഒരു ദിവസം നേരത്തേ
അതേസമയം, മുന്‍ നിശ്ചയിച്ചതിലും ഒരുദിവസം മുമ്പ് ഖത്തര്‍ ലോകകപ്പിന് തുടക്കമായേക്കുമെന്നും റിപ്പോര്‍ട്ടുകളുണ്ട്. അതിനുള്ള ആലോചനകള്‍ അന്തിമ ഘട്ടത്തിലാണ്. ലോകകപ്പിന്റെ ഉദ്ഘാടന മത്സരമായ ഖത്തര്‍- ഇക്വഡോര്‍ മത്സരം ഒരു ദിവസം നേരത്തെ നടത്താനാണ് നീക്കം. ലോകകപ്പ് ഫിക്‌സ്ചര്‍ പ്രകാരം നവംബര്‍ 21 ഖത്തര്‍ സമയം വൈകിട്ട് ഏഴ് മണിക്ക് അല്‍ ബൈത്ത് സ്റ്റേഡിയത്തിലാണ് ഖത്തര്‍- ഇക്വഡോര്‍ മത്സരം. ഈ മത്സരത്തിന് തൊട്ടുമുമ്പ് ഉദ്ഘാടന ചടങ്ങുകള്‍ നടത്താനായിരുന്നു തീരുമാനം. എന്നാല്‍ ഈ മത്സരത്തിന് മുമ്പ് രണ്ട് മത്സരങ്ങള്‍ നടക്കുന്നുണ്ട്. ഉച്ചയ്ക്ക് ഒരു മണിക്ക് സെനഗല്‍- നെതര്‍ലാന്റ്‌സ് മത്സരവും വൈകിട്ട് നാല് മണിക്ക് ഇംഗ്ലണ്ട് – ഇറാന്‍ മത്സരവും. ഇങ്ങനെ നേരത്തേ രണ്ട് മല്‍സരങ്ങള്‍ നടത്തുന്നത് ഉദ്ഘാടന ചടങ്ങുകളുടെ പ്രാധാന്യത്തെ കുറയ്ക്കുമെന്ന വിലയിരുത്തലിലാണ് ഫിഫയും ഖത്തറും. ഉദ്ഘാടന മത്സരം നവംബര്‍ 20 ലേക്ക് മാറ്റി ഈ പ്രശ്‌നം മറികടക്കാനാണ് അധികൃതര്‍ ആലോചിക്കുന്നത്. ഇക്കാര്യത്തില്‍ ഫിഫ കൗണ്‍സില്‍ ബ്യൂറോയാണ് അന്തിമ തീരുമാനം എടുക്കേണ്ടത്.
