വിവാഹം ചെയ്തയച്ചത് 15 വയസ് കൂടുതലുള്ള ആള്‍ക്ക്
വിദ്യാര്‍ഥിയായിരിക്കുമ്പോഴായിരുന്നു തന്നെക്കാള്‍ 15 വയസ്സ് കൂടുതലുള്ള ആളുമായി പിതാവും സഹോദരങ്ങളും ചേര്‍ന്ന് പെണ്‍കുട്ടിയെ വിവാഹം ചെയ്ത് അയച്ചത്. പെണ്‍കുട്ടിയുടെ എതിര്‍പ്പ് അവഗണിച്ച് നിര്‍ബന്ധ പൂര്‍വം ഭര്‍ത്താവിനോടൊപ്പം പറഞ്ഞയക്കുകയായിരുന്നു. ഇവരുടെ ബന്ധത്തില്‍ ഒരു കുട്ടിയും പിറന്നു. എന്നാല്‍ ഭര്‍ത്താവുമായി ഒന്നിച്ച് ജീവിക്കാനാവില്ലെന്ന് തീരുമാനിച്ച പെണ്‍കുട്ടി അധികം താമസിയാതെ സ്വന്തം വീട്ടിലേക്ക് അഭയം തേടി എത്തുകയായിരുന്നു. എന്നാല്‍ പെണ്‍കുട്ടിക്ക് സംരക്ഷണം നല്‍കേണ്ട കുടുംബം നിര്‍ബന്ധിച്ച് ഭര്‍തൃവീട്ടിലേക്ക് തിരിച്ചയക്കാനാണ് ശ്രമിച്ചത്. പെണ്‍കുട്ടി അതിന് വഴങ്ങാതായതോടെ വീട്ടിന്റെ ബേസ്മെന്റിലുള്ള മുറിയില്‍ ആരും അറിയാതെ പൂട്ടിയിടുകയായിരുന്നു. പിതാവിന്റെ നേതൃത്വത്തില്‍ സഹോദരങ്ങളുടെ പിന്തുണയോടെയായിരുന്നു ഇത്.
നേതൃത്വം നല്‍കിയ പിതാവ് ഈയിടെ മരണപ്പെട്ടു
ഇടക്കാലത്ത് വീട്ടു തടങ്കലില്‍ നിന്ന് യുവതി രക്ഷപ്പെട്ടെങ്കിലും താമസിയാതെ കുടുംബക്കാര്‍ ചേര്‍ന്ന് കണ്ടെത്തി തിരികെ കൊണ്ടുവരികയായിരുന്നുവെന്ന് പോലീസ് അറിയിച്ചു. പിന്നീട് രഹസ്യ വിവരത്തിന്റെ അടിസ്ഥാനത്തില്‍ പോലിസ് റെയ്ഡ് നടത്തി കുട്ടിയെ മോചിപ്പിക്കുകയായിരുന്നു. തുടര്‍ന്നാണ് കുറ്റകൃത്യത്തിന് കൂട്ടുനിന്ന സഹോദരങ്ങളായ അഞ്ചു പേരെ അറസ്റ്റ് ചെയ്തത്. മകളെ തടവിലിടാന്‍ നേതൃത്വം നല്‍കിയ പിതാവ് ഏതാനും മാസങ്ങള്‍ മുമ്പ് മരണപ്പെട്ടതായും പോലിസ് അറിയിച്ചു.
പഠിക്കാന്‍ മിടുക്കിയായിരുന്നു പെണ്‍കുട്ടി
പഠിക്കാന്‍ മിടുക്കിയായ കുട്ടിയായിരുന്നു അവളെന്നും വിവാഹം കഴിക്കാതെ പഠനം തുടരണമെന്നായിരുന്നു അവളുടെ ആഗ്രഹമെങ്കിലും കുടുംബക്കാര്‍ ചേര്‍ന്ന് നിര്‍ബന്ധിച്ച് വിവാഹം കഴിപ്പിക്കുകയായിരുന്നുവെന്നും സുഹൃത്തുക്കളെ ഉദ്ധരിച്ച് പ്രാദേശിക മാധ്യമങ്ങള്‍ റിപ്പോര്‍ട്ട് ചെയ്തു. പെണ്‍കുട്ടിയെ നിയമവിരുദ്ധമായി തടവിലിടുകയും സ്വാതന്ത്ര്യം ഹനിക്കുകയും ചെയ്ത കുറ്റത്തിന് അഞ്ചു പേര്‍ക്കെതിരായ നിയമനടപടികള്‍ കുവൈറ്റ് ക്രിമിനല്‍ കോടതിയില്‍ പുരോഗമിക്കുകയാണ്.
കുവൈറ്റില്‍ പ്രതിഷേധം ശക്തം
വിവാഹാഭ്യര്‍ഥന നിരസിച്ചതിന് കുവൈറ്റ് യുവതിയെ വാഹനത്തില്‍ തട്ടിക്കൊണ്ടുപോയി കൊലപ്പെടുത്തിയ സംഭവത്തിന്റെ നടുക്കം മാറുന്നതിനു മുമ്പാണ് മനസ്സാക്ഷിയെ ഞെട്ടിക്കുന്ന പുതിയ വാര്‍ത്ത പുറത്തുവരുന്നത്. യുവതിയെ തട്ടിക്കൊണ്ടുപോയി കൊന്ന സംഭവത്തിന് ശേഷം കുവൈറ്റില്‍ സ്ത്രീസുരക്ഷയുമായി ബന്ധപ്പെട്ട് സാമൂഹ്യ മാധ്യമങ്ങളില്‍ ഉള്‍പ്പെടെ ശക്തമായ ക്യാംപയിനാണ് നടന്നുവരുന്നത്. രാജ്യത്ത് സ്ത്രീകള്‍ അനുഭവിക്കുന്ന അരക്ഷിതത്വത്തിന്റെ ഉദാഹരമായാണ് പുതിയ സംഭവം ചൂണ്ടിക്കാണിക്കപ്പെടുന്നത്. സംഭവത്തില്‍ സോഷ്യല്‍ മീഡിയയില്‍ പ്രതിഷേധം ശക്തമാണ്.
Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
ഏറ്റവും പുതിയ വാർത്തകൾ അതിവേഗം അറിയാൻ Samayam Malayalam ഫേസ്ബുക്ക് പേജ് ലൈക്ക് ചെയ്യൂ
Web Title : five people have been arrested in kuwait for keeping a woman home for nine years
Malayalam News from malayalam.samayam.com, TIL Network
