സൗദിയുടെ പുതിയ ഗതാഗത, ലോജിസ്റ്റിക്‌സ് നയം പ്രഖ്യാപിച്ചു കൊണ്ട് കഴിഞ്ഞ ദിവസമാണ് പുതിയ എയര്‍ലൈന്‍സ് ആരംഭിക്കുന്ന കാര്യം കിരീടാവകാശി പ്രഖ്യാപിച്ചത്. എന്നാല്‍ ഇതേക്കുറിച്ചുള്ള കൂടുതല്‍ വിവരങ്ങള്‍ സൗദി അധികൃതര്‍ പുറത്തുവിട്ടിട്ടില്ല.
യുഎഇയുമായും ഖത്തറുമായും മല്‍സരം
വ്യോമയാന രംഗത്തെ ഗള്‍ഫ് മേഖലയിലെ രണ്ട് ശക്തികളായ യുഎഇയുമായും ഖത്തറുമായും ഇക്കാര്യത്തില്‍ മല്‍സരിക്കാനുള്ള നീക്കമാണ് സൗദിയുടെ പ്രഖ്യാപനത്തിന് പിന്നിലെന്നാണ് വിലയിരുത്തപ്പെടുന്നത്. ദുബായ് കേന്ദ്രമായി പ്രവര്‍ത്തിക്കുന്ന എമിറേറ്റ്‌സ് എയര്‍ലൈന്‍സിനോടും ഖത്തര്‍ എയര്‍വെയ്‌സിനോടും മല്‍സരിക്കാന്‍ കെല്‍പ്പുള്ളതാണെങ്കില്‍ മാത്രമേ മേഖലയില്‍ പുതിയൊരു വിമാനക്കമ്പനിക്ക് പിടിച്ചു നില്‍ക്കാന്‍ സാധിക്കൂ. പുതിയ പ്രഖ്യാപനത്തിലൂടെ ഇതു തന്നെയാണ് കിരീടാവകാശി ലക്ഷ്യമിടുന്നതെന്നും വിലയിരുത്തപ്പെടുന്നു. ഇതോടൊപ്പം അന്താരാഷ്ട്ര യാത്രക്കാരുടെ ഒരു ട്രാന്‍സിറ്റ് കേന്ദ്രമായി റിയാദില്‍ പുതുതായി നിര്‍മിക്കാനുദ്ദേശിക്കുന്ന എയര്‍പോര്‍ട്ടിനെ ഇതുവഴി മാറ്റാനാവുമെന്ന കണക്കുകൂട്ടലിലാണ് സൗദി.
തീര്‍ഥാടന ടൂറിസത്തിന് സൗദിയ എയര്‍ലൈന്‍സ്
അന്താരാഷ്ട്ര വിനോദ സഞ്ചാരികളെ ആകര്‍ഷിക്കുന്ന വന്‍ പദ്ധതികള്‍ ആവിഷ്‌ക്കരിച്ചു കൊണ്ടിരിക്കുകയാണ് സൗദി. കിരീടാവകാശിയുടെ സ്വപ്‌ന പദ്ധതികളായ നിയോം സിറ്റി പദ്ധതിയും ചെങ്കടല്‍ വികസന പദ്ധതിയും ഇതിന്റെ ഭാഗമാണ്. പുതിയ എയര്‍ലൈന്‍സും എയര്‍പോര്‍ട്ടും ടൂറിസം വികസനത്തിന് കൂടുതല്‍ ഊന്നല്‍ നല്‍കിയുള്ളതായിരിക്കുമെന്നാണ് വിലയിരുത്തല്‍. കൊവിഡ് വ്യാപനത്തിന്റെ തൊട്ട് മുമ്പ് 40 ദശലക്ഷം അന്താരാഷ്ട്ര വിനോദ സഞ്ചാരികളായിരുന്നു സൗദിയിലെത്തിയിരുന്നത്. എന്നാല്‍ 2030ഓടെ ഇത് 100 ദശലക്ഷം ആയി ഉയര്‍ത്തുകയാണ് അധികൃതരുടെ ലക്ഷ്യം. അതേസമയം, സൗദിയുടെ നിലവിലുള്ള വിമാനക്കമ്പനിയായ സൗദിയ എയര്‍ലൈന്‍സിനെ തീര്‍ഥാടന ടൂറിസത്തിനായി ഉപയോഗിക്കാനും സൗദിക്ക് പദ്ധതിയുണ്ട്. നിലവില്‍ ആഭ്യന്തര സര്‍വീസുകളാണ് സൗദിയ പ്രധാനമായും നടത്തുന്നത്. ജിദ്ദ അന്താരാഷ്ട്ര വിമാനത്താവളം കേന്ദ്രമായി ഹജ്ജ്, ഉംറ തീര്‍ഥാടനത്തിന് കൂടുതല്‍ ഊന്നല്‍ നല്‍കിയുള്ള സര്‍വീസുകളാവും പുതിയ എയര്‍ലൈന്‍സ് വരുന്നതോടെ സൗദിയ ലക്ഷ്യംവയ്ക്കുക.
ബിസിനസില്‍ യുഎഇയുമായി മല്‍സരം
നിലവിലെ ഗള്‍ഫ് മേഖലയിലെ ബിസിനസ് ഹബ്ബാണ് പ്രധാനമായും യുഎഇയിലെ ദുബായ്. എന്നാല്‍ സൗദി തലസ്ഥാനമായ റിയാദിനെ മേഖലയിലെ മറ്റൊരു ബിസിനസ് കേന്ദ്രമായി വളര്‍ത്തിയെടുക്കുകയെന്നതും കിരീടാവകാശിയുടെ സ്വപ്‌ന പദ്ധതികളില്‍ പെട്ടതാണ്. രാജ്യത്തേക്ക് കൂടുതല്‍ വിദേശ കമ്പനികളെ ആകര്‍ഷിക്കുന്നതിന്റെ ഭാഗമായി വിവിധ പദ്ധതികള്‍ നടപ്പിലാക്കി വരികയാണ് സൗദി. 2024 മുതല്‍ സൗദിയില്‍ ഹെഡ്ക്വാര്‍ട്ടേഴ്‌സില്ലാത്ത കമ്പനികള്‍ക്ക് നിര്‍മാണ, ലോജിസ്റ്റിക്‌സ് കരാറുകള്‍ നല്‍കില്ലെന്ന് സൗദി നേരത്തേ വ്യക്തമാക്കിയിരുന്നു. ഇതിന്റെ അടിസ്ഥാനത്തില്‍ നിലവില്‍ ദുബായ് കേന്ദ്രമായി പ്രവര്‍ത്തിക്കുന്ന പല അന്താരാഷ്ട്ര കമ്പനികളും ആസ്ഥാനം റിയാദിലേക്ക് മാറ്റാനിരിക്കുകയാണെന്നാണ് റിപ്പോര്‍ട്ട്.
റിയാദില്‍ നിന്ന് ജിദ്ദയിലേക്ക് റെയില്‍
പുതിയ ട്രാന്‍സ്‌പോര്‍ട്ട് നയത്തിന്റെ ഭാഗമായി സൗദി തലസ്ഥാനമായ റിയാദിനെയും പടിഞ്ഞാറന്‍ തീരദേശ നഗരമായ ജിദ്ദയെയും പരസ്പരം ബന്ധിപ്പിക്കുന്ന പുതിയ റെയില്‍വേ ആരംഭിക്കാനും തീരുമാനമുണ്ടെന്ന് ഗതാഗത ലോജിസ്റ്റിസ് സര്‍വീസ് മന്ത്രി എന്‍ജിനീയര്‍ സാലിഹ് അല്‍ ജാസര്‍ അറിയിച്ചു. അതോടൊപ്പം സൗദിയുടെ കിഴക്കിനെയും പടിഞ്ഞാറിനെയും ബന്ധിപ്പിക്കുന്ന ലാന്റ് ബ്രിഡ്ജ് പദ്ധതിയും നിലവിലെ റോഡ് ശൃംഖലയുടെ വികസനവും പുതിയ നാഷനല്‍ സ്ട്രാറ്റജി ഓഫ് ട്രാന്‍സ്‌പോര്‍ട്ട് ആന്റ് ലോജിസ്റ്റിക്‌സിന്റെ ഭാഗമാണ്.
Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
ഏറ്റവും പുതിയ വാർത്തകൾ അതിവേഗം അറിയാൻ Samayam Malayalam ഫേസ്ബുക്ക് പേജ് ലൈക്ക് ചെയ്യൂ
Web Title : saudi airline’s new plan targets emirates and qatar airways
Malayalam News from malayalam.samayam.com, TIL Network
