ലോകത്തിലെ തന്നെ ഏറ്റവും വലിയ പുരാവസ്തു മോഷണവും കള്ളക്കടത്തും നടക്കുന്ന രാജ്യങ്ങളിലൊന്ന് ഇന്ത്യയാണ്. ബ്രിട്ടീഷ് കോളനിയായി ഇന്ത്യ മാറിയ കാലം മുതല്‍ ഇത് രൂക്ഷമാണ്. ഇപ്പോഴും തുടരുന്നു. ഇന്ത്യ മാത്രമല്ല, ദരിദ്രമായ നിരവധി ആഫ്രിക്കന്‍ രാജ്യങ്ങളില്‍ നിന്നും യൂറോപ്പിലെ സമ്പന്ന രാജ്യങ്ങള്‍ കോളനി ഭരണകാലത്ത് ഒളിച്ചുകടത്തിയതും സൗജന്യമായി സമ്പാദിച്ചതുമായ വിഗ്രഹങ്ങളും പുരാവസ്‍തുക്കളും ഇപ്പോഴും സ്വന്തമായി സൂക്ഷിക്കുകയാണ്.
ഏറ്റവും മികച്ച ഉദാഹരണം, ബ്രിട്ടൺ കൈവശപ്പെടുത്തിയ കൊഹിനൂര്‍ എന്ന വജ്രമാണ്. 105 കാരറ്റ് മൂല്യമുള്ള കൊഹിനൂര്‍ 19-ാം നൂറ്റാണ്ടിലാണ് ബ്രിട്ടണില്‍ എത്തിയത്. മുഗള്‍ രാജാക്കന്മാരും ഇറാനിയന്‍ യോദ്ധാക്കളും അഫ്‍ഗാനിലെ ഭരണാധികാരികളും പഞ്ചാബിലെ മഹാരാജന്മാരും എല്ലാം കൊഹിനൂര്‍ കൈവശപ്പെടുത്തിയിരുന്നു – ബി.ബി.സി 2016ലെ ഒരു ലേഖനത്തില്‍ വിവരിക്കുന്നു.
ഇന്ന് ലണ്ടനില്‍ സൂക്ഷിച്ചിരിക്കുന്ന കൊഹിനൂര്‍, വിക്ടോറിയ രാജ്ഞിയുടെ രാജകീയ ആഭരണങ്ങളുടെ ഭാഗമാണ്. ഇന്ത്യ മാത്രമല്ല, പാകിസ്ഥാന്‍, ഇറാന്‍, അഫ്‍ഗാനിസ്ഥാന്‍ രാജ്യങ്ങളും കൊഹിനൂറിന് അവകാശം പറയുന്നുണ്ട്. പക്ഷേ, ഇന്ത്യയാണ് ഒന്നാമത്തെ കക്ഷിയെന്ന് വേണം കരുതാന്‍. 2016ല്‍ വജ്രം, ബ്രിട്ടൺ തട്ടിയെടുത്തത് അല്ലെന്നും അതുകൊണ്ട് തന്നെ അവകാശം വേണ്ടെന്നും ഇന്ത്യ സര്‍ക്കാര്‍ സുപ്രീംകോടതിയില്‍ നിലപാട് അറിയിച്ചിരുന്നു. ഇത് വന്‍ വിമര്‍ശനങ്ങള്‍ക്കും കാരണമായി, പിന്നാലെ സര്‍ക്കാര്‍ മലക്കംമറിഞ്ഞു.
കോളനികളിലെ കൊള്ള
കൊളോണിയല്‍ രാജ്യങ്ങള്‍ മോഷ്ടിച്ച പുരാവസ്തുക്കള് തിരികെ വേണം എന്നാവശ്യപ്പെട്ട് ലോകത്തിന്‍റെ വിവിധ ഭാഗങ്ങളില്‍ അവകാശപ്രവര്‍ത്തകര്‍ പ്രതിഷേധം നടത്തുന്നുണ്ട്. ബ്ലാക്ക് ലൈവ്‍സ്‍ മാറ്റര്‍ (Black Lives Matter) പ്രക്ഷോഭങ്ങളുടെ ചുവടുപിടിച്ച് നടക്കുന്ന സ്വത്വ പ്രസ്ഥാനങ്ങളിലാണ് ഇത് കൂടുതലും ശക്തമായത്.
ആഫ്രിക്കയിലെ കോംഗോ, ഛാഡ്, അമേരിക്കയിലെ നേറ്റീവ് അമേരിക്കന്‍ പാരമ്പര്യ വസ്തുക്കളുടെ പ്രദര്‍ശനം തടയാന്‍ കഴിഞ്ഞ വര്‍ഷങ്ങളില്‍ പലപ്പോഴായി ആക്റ്റിവിസ്റ്റുകള്‍ ശ്രമിച്ചിട്ടുണ്ട്.ഫ്രാൻസ്, സ്പെയിൻ, പോര്‍ച്ചുഗല്‍, ജര്‍മ്മനി, വത്തിക്കാന്‍, യു.കെ എന്നിവിടങ്ങളില്‍ മ്യൂസിയങ്ങള്‍ കയ്യടക്കുമെന്നാണ് ഇത്തരം പ്രതിഷേധങ്ങളുടെ വക്താവായ മ്വസുലു ദിയബൻസാ (Mwazulu Diyabanza), 2021 ഫെബ്രുവരിയില്‍ ബ്രിട്ടീഷ് ദിനപത്രം, ദ് ഗാര്‍ഡിയനോട് പറഞ്ഞത്.
പഴയകാലത്ത് പിടിച്ചടക്കിയ വസ്‍തുക്കള്‍ തിരികെ നല്‍കേണ്ടത് ആവശ്യമാണെന്ന് ഇതിനോടകം പല യൂറോപ്യന്‍ രാജ്യങ്ങളും മനസിലാക്കിയിട്ടുമുണ്ട്. 2020ല്‍ യൂറോപ്യന്‍ രാജ്യമായ നെതര്‍ലൻഡ്‍സ്‍ തങ്ങള്‍ കൈവശപ്പെടുത്തിയ ഒരുലക്ഷം പുരാവസ്‍തുക്കളായ ശ്രീലങ്ക, ഇൻഡോനേഷ്യ രാജ്യങ്ങള്‍ക്ക് മടക്കി നല്‍കിയത്.
2017ല്‍ ഫ്രാൻസ് സമാനമായ ഒരു നിലപാട് എടുത്തിരുന്നു. അഞ്ച് വര്‍ഷത്തിനുള്ളില്‍ ആഫ്രിക്കന്‍ രാജ്യമായ ബര്‍ക്കിന ഫാസോയില്‍ നിന്ന് കൈവശപ്പെടുത്തിയ പുരാവസ്തുക്കള് പൂര്‍ണമായും തിരികെ നല്‍കുമെന്നാണ് ഫ്രാന്‍സിന്‍റെ ഉറപ്പ്. ഈജിപ്റ്റ്, നൈജീരിയ തുടങ്ങിയ ആഫ്രിക്കന്‍ രാജ്യങ്ങള്‍ വര്‍ഷങ്ങളായി സമാനമായ ആവശ്യം ഉയര്‍ത്തുന്നുണ്ട്. എന്നാല്‍ സാര്‍വത്രികമായി ഇതൊരു നയമായി പല യൂറോപ്യന്‍ സമ്പന്ന രാജ്യങ്ങളും അംഗീകരിക്കുന്നില്ല.
2020 അവസാനം ഐക്യരാഷ്ട്ര സംഘടനയുടെ സാംസ്‍കാരിക വിഭാഗം, യുനെസ്കോ ഒരു ക്യാംപെയ്‍ൻ പ്രഖ്യാപിച്ചിരുന്നു. കലയുടെ യഥാര്‍ഥ വില എന്ന പേരില്‍ ആരംഭിച്ച ക്യാംപെയ്‍ൻ ലോകത്തെ സാംസ്‍കാരിക പൈതൃകങ്ങള്‍ അപഹരിക്കുന്നതിന് എതിരെയായിരുന്നു. ഒരു രാജ്യത്തിന്‍റെ ആത്മാവിന് വിലയെന്ത്? എന്നതായിരുന്നു ക്യാംപെയ്‍ൻ വാചകം. പ്രതിവര്‍ഷം ലോകത്ത് 10 ബില്യൺ ഡോളര്‍ വിലമതിക്കുന്ന പുരാവസ്തു കൈമാറ്റം അനധികൃതമായി നടക്കുന്നുണ്ടെന്നാണ് യുനെസ്കോ പറയുന്നത്.
ഇന്ത്യ തിരികെ പിടിച്ചതും ആവശ്യപ്പെടുന്നതും
ബ്രിട്ടൺ ആണ് ഇന്ത്യയിലെ പുരാവസ്‍തുക്കളില്‍ അധികവും കൈവശപ്പെടുത്തിയത്. കൊഹിനൂരിന് പുറമെ ടിപ്പു സുല്‍ത്താന്‍റെ മരത്തില്‍ തീര്‍ത്ത കടുവയുടെ പ്രതിമ എന്നിവ ഇന്ത്യ ആവശ്യപ്പെടുന്നതാണ്. ഇത് തിരികെ തരുന്ന കാര്യത്തില്‍ അവര്‍ക്ക് നയമില്ല. സ്ഥാപനങ്ങള്‍ സ്വയമേവ തിരികെ നല്‍കുന്നത് മാത്രമാണ് ഇതുവരെ പല രാജ്യങ്ങളിലും തിരികെയെത്തിയത്.
2020 ആദ്യം യു.കെയില്‍ നിന്ന് മൂന്ന് വിഗ്രഹങ്ങള്‍ ഇന്ത്യ തിരികെ വാങ്ങിയിരുന്നു. ഹിന്ദു ദൈവങ്ങളായ രാമൻ, സീത, ലക്ഷ്‍മണൻ എന്നിവരുടെ 15-ാം നൂറ്റാണ്ടിലെ പ്രതിമകളാണ് ഇവ. തമിഴ്‍നാട്ടിലെ വിജയനഗര സാമ്രാജ്യത്തിന്‍റെ ഭാഗമായിരുന്നു വിഗ്രഹങ്ങള്‍. മോഷ്ടിക്കപ്പെട്ടവയാണെന്ന് തിരിച്ചറിഞ്ഞ് ബ്രിട്ടീഷ് പോലീസ് മുഖാന്തിരം ഇത് തിരികെ എത്തിക്കുകയായിരുന്നു. നാല് വിഗ്രഹങ്ങള്‍കൂടെ 2019-20 ഇടയ്ക്ക് ബ്രിട്ടൺ തിരികെ ഏൽപ്പിച്ചു.
2016ല്‍ ആണ് ശ്രദ്ധേയമായ ഒരു കൈമാറ്റം യു.എസ് നടത്തിയത്. പ്രധാനമന്ത്രി നരേന്ദ്ര മോദി അമേരിക്ക സന്ദര്‍ശിച്ച സമയത്താണ് ഏകദേശം 100 ദശലക്ഷം ഡോളര്‍ വിലമതിക്കുന്ന 200 പുരാവസ്തുക്കള് യു.എസ് തിരികെ നല്‍കിയത്. ഇത് മുൻപ് ഒരു കള്ളക്കടത്ത് സംഘത്തെ യു.എസ് പിടികൂടിയതിന് ശേഷം ലഭിച്ച വസ്‍തുക്കളായിരുന്നു.
ന്യൂയോര്‍ക്കിലെ മെട്രോപൊളിറ്റൻ മ്യൂസിയത്തിന് ഉള്‍പ്പെടെ ഇന്ത്യന്‍ പുരാവസ്തുക്കള് കള്ളക്കടത്തിലൂടെ നല്‍കിയ സുഭാഷ് കപൂറിന്‍റെ ശേഖരത്തില്‍ നിന്നാണ് ഇവയില്‍ അധികവും യു.എസ് അധികൃതര്‍ പിടിച്ചെടുത്തത്. സുഭാഷ് പിടിയിലായതോടെ ന്യൂയോര്‍ക്ക് മെറ്റ് മ്യൂസിയം പല പുരാവസ്‍തുക്കളും തിരികെ നല്‍കിയിരുന്നു. ഏകദേശം 190ല്‍ അധികം പുരാവസ്തുക്കള് ഇന്ത്യ കഴിഞ്ഞ വര്‍ഷം മാത്രം തിരികെ പിടിച്ചിട്ടുണ്ടെന്നാണ് റിപ്പോര്‍ട്ടുകള്‍.
സംരക്ഷിക്കുന്നതിന്‍റെ മൂല്യം?
ഇന്ത്യയില്‍ നിന്ന് പുരാവസ്തുക്കളുടെ കള്ളക്കടത്ത് വര്‍ധിക്കുന്നതിന് പ്രധാനപ്പെട്ട ഒരു കാരണമായി ദാരിദ്ര്യമാണ് യുനെസ്കോ ചൂണ്ടിക്കാണിക്കുന്നത്. കൃത്യമായി ഇന്ത്യയില്‍ പുരാവസ്തുക്കള് പരിപാലിക്കുന്നില്ല, സംരക്ഷണം നല്‍കുന്നില്ല – ഗവേഷക സമ്യത ബാനര്‍ജി, യുനെസ്കോ വെബ്സൈറ്റില്‍ എഴുതുന്നു.
1977 മുതല്‍ 79വരെയുള്ള കാലത്ത് 3000 പുരാവസ്തുക്കള് ഇന്ത്യയില്‍ നിന്ന് പലരും കടത്തി. 1989വരെയുള്ള കണക്ക് അനുസരിച്ച് ഏകദേശം 50,000 പുരാവസ്തുക്കള് ഇന്ത്യയില്‍ നിന്ന് മോഷണം പോയിട്ടുണ്ട്. ഇത് യുനെസ്കോയുടെ കണക്കാണ്. സര്‍ക്കാര്‍ കണക്കുകള്‍ ലഭ്യമല്ല.
ദരിദ്രമായ പശ്ചാത്തലങ്ങളിലുള്ളവരാണ് മിക്കവാറും ഇന്ത്യയിലെ പുരാവസ്തു മൂല്യമുള്ള പ്രദേശങ്ങളില്‍ ജീവിക്കുന്നവര്‍. ഇവരാണ് മൂല്യമുള്ള പലതും കണ്ടെത്തുന്നത്. മിക്കപ്പോഴും കര്‍ഷകരും സാധാരണക്കാരുമായിരിക്കും ഇവര്‍. വസ്തുക്കളുടെ മൂല്യം ഇവര്‍ക്ക് അറിയില്ല. കള്ളക്കടത്ത് സംഘങ്ങളുടെ മധ്യവര്‍ത്തികളോടായിരിക്കും ഇവര്‍ കൈമാറ്റം നടത്തുന്നത്. ഇവരെ ബോധവല്‍ക്കാരിക്കാനുള്ള ശ്രമമാണ് വേണ്ടതെന്നും ബാനര്‍ജി ലേഖനത്തില്‍ എഴുതുന്നു.
ഇന്ത്യയില്‍ ആര്‍ക്കിയോളജിക്കല്‍ സര്‍വേ ഓഫ് ഇന്ത്യ(ASI)യാണ് പുരാവസ്തു സംരക്ഷണത്തിന്‍റെ ചുമതലയുള്ള ഏജൻസി. ബ്രിട്ടീഷ് ഭരണകാലം മുതല്‍ ഇത് നിലവിലുണ്ട്. രാജ്യത്തെ 3697 സംരക്ഷിത കേന്ദ്രങ്ങള്‍ എ.എസ്.ഐയുടെ കീഴിലാണ്. 48 മ്യൂസിയങ്ങളും ഇവര്‍ നിയന്ത്രിക്കുന്നു. രാജ്യത്തെ യുനസ്കോ അംഗീകൃത 27 ലോകപൈതൃക കേന്ദ്രങ്ങളും എ.എസ്.ഐ മേല്‍നോട്ടത്തിലാണ്.
****
Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
ഏറ്റവും പുതിയ വാർത്തകൾ അതിവേഗം അറിയാൻ Samayam Malayalam ഫേസ്ബുക്ക് പേജ് ലൈക്ക് ചെയ്യൂ
Web Title : india was looted of it’s stolen artifacts by colonizer british empire
Malayalam News from malayalam.samayam.com, TIL Network
