യുഎഇ ഉള്‍പ്പെടെ നാല് രാജ്യങ്ങളില്‍ നിന്നുള്ളവര്‍ക്ക് യാത്രാ വിലക്കുമായി സൗദി

ജിദ്ദ: യുഎഇ അടക്കമുള്ള നാല് രാജ്യങ്ങളില്‍ നിന്നുള്ളവര്‍ക്ക് യാത്രാ വിലക്ക് ഏര്‍പ്പെടുത്തി

സൗദി ആഭ്യന്തര മന്ത്രാലയം. എത്യോപ്യ, വിയറ്റ്‌നാം, അഫ്ഗാനിസ്ഥാന്‍ എന്നിവയാണ് യാത്രാ വിലക്കുള്ള മറ്റ് മൂന്നു രാജ്യങ്ങള്‍. അഫ്ഗാനിസ്താന്‍ ഒഴികെയുള്ള മൂന്ന് രാജ്യങ്ങളിലേക്ക് സൗദി പൗരന്മാര്‍ മുന്‍കൂര്‍ അനുമതി വാങ്ങാതെ യാത്ര ചെയ്യുന്നതും തടഞ്ഞിട്ടുണ്ട്.

ജൂലൈ നാലിന് ഞായറാഴ്ച രാത്രി 11 മണി മുതല്‍ വിലക്ക് പ്രാബല്യത്തില്‍ വരുമെന്ന് ആഭ്യന്തര മന്ത്രാലയത്തെ ഉദ്ധരിച്ച് പ്രാദേശിക മാധ്യമങ്ങള്‍ റിപ്പോര്‍ട്ട് ചെയ്തു. ഈ രാജ്യങ്ങളില്‍ കൊവിഡ് വ്യാപനം കൂടുന്നതും ജനിതക മാറ്റം വന്ന വൈറസിന്റെ സാന്നിധ്യവുമാണ് പുതിയ തീരുമാനത്തിന് പിന്നില്‍. ഇന്ത്യ ഉള്‍പ്പെടെയുള്ള രാജ്യങ്ങളില്‍ നിന്നുള്ളവര്‍ക്ക് നേരത്തേ തന്നെ യാത്രാ വിലക്ക് നിലവിലുണ്ട്. അതിനാല്‍ മലയാളികള്‍ ഉള്‍പ്പെടെ നൂറുകണക്കിന് പ്രവാസികള്‍ എതോപ്യ വഴിയാണ് സൗദിയിലേക്ക് എത്തുന്നത്.

Read More: ഖത്തര്‍ എയര്‍വെയ്‌സിനും എമിറേറ്റ്‌സിനുമൊപ്പം മല്‍സരിക്കാന്‍ സൗദിയുടെ പുതിയ എയര്‍ലൈന്‍സ്

അവിടെ 14 ദിവസം ക്വാറന്റൈനില്‍ കഴിഞ്ഞാണ് സൗദിയിലേക്ക് തിരിക്കുന്നത്. എത്യോപ്യയെ കൂടി നിരോധിത പട്ടികയില്‍ ഉള്‍പ്പെടുത്തിയതോടെ പ്രവാസികളുടെ മുമ്പിലുള്ള ആ വഴിയും അടഞ്ഞിരിക്കുകയാണ്. സൗദിയിലേക്ക് വരുന്നതിനായി എത്യോപയിലെത്തി ക്വാറന്റൈനില്‍ കഴിയുന്നവരുമുണ്ടെന്നാണ് വിവരം.

വിലക്കേര്‍പ്പെടുത്തിയ രാജ്യങ്ങളില്‍ 14 ദിവസത്തിനുള്ളില്‍ പ്രവേശിച്ചവര്‍ക്കും സൗദിയിലേക്കുള്ള യാത്രാ വിലക്ക് ബാധകമാവും. യാത്രാ വിലക്കില്ലാത്ത രാജ്യങ്ങളില്‍ 14 ദിവസം താമസിച്ച ശേഷം ഉപാധികളോടെ സൗദിയിലേക്ക് പ്രവേശനം അനുവദിക്കും. എന്നാല്‍ സൗദി പൗരന്മാര്‍ക്ക് വ്യവസ്ഥ ബാധകമല്ല. രാജ്യത്തെത്തുന്ന എല്ലാവവര്‍ക്കും ഹോട്ടല്‍ ക്വാറന്റൈന്‍ വ്യവസ്ഥ നടപ്പാക്കുകയും ചെയ്യും. യാത്ര വിലക്കിയിട്ടുള്ള രാജ്യങ്ങളുമായുള്ള വിമാന സര്‍വീസുകള്‍ നിര്‍ത്തിവെക്കുമെന്നും മന്ത്രാലയം അറിയിച്ചു. വിമാന വിലക്കും ഞായറാഴ്ച മുതല്‍ നിലവില്‍ വരും.