പുതിയ വോട്ടര്‍ പട്ടിക പ്രസിദ്ധീകരിച്ചു
പാര്‍ലമെന്റും മന്ത്രിസഭയും തമ്മിലുള്ള രാഷ്ട്രീയ തര്‍ക്കങ്ങളെ തുടര്‍ന്ന് കഴിഞ്ഞ മാസമാണ് കുവൈറ്റ് അമീര്‍ ശെയ്ഖ് നവാഫ് അല്‍ അഹമ്മദ് അസ്സബാഹ് ദേശീയ അസംബ്ലി പിരിച്ചുവിട്ടത്. പുതിയ പാര്‍ലമെന്റ് അംഗങ്ങളെ തെരഞ്ഞെടുക്കാന്‍ സെപ്റ്റംബര്‍ 29നു വോട്ടെടുപ്പ് നടത്താന്‍ മന്ത്രിസഭ കഴിഞ്ഞ ആഴ്ച തീരുമാനിക്കുകയും ചെയ്തിരുന്നു. വോട്ടര്‍ പട്ടിക പുതുക്കുന്ന നടപടി പൂര്‍ത്തിയാകാത്ത സാഹചര്യത്തിലാണ് തെരഞ്ഞെടുപ്പിന്റെ ഔദ്യോഗിക വിജ്ഞാപനം വൈകിയത്. പുതുക്കിയ വോട്ടര്‍ പട്ടിക പ്രകാരം 29ന് തെരഞ്ഞെടുപ്പ് നടക്കുന്ന അമീരി ഉത്തരവ് ഔദ്യോഗിക ഗസറ്റില്‍ പ്രസിദ്ധീകരിച്ചതോടെ രാജ്യം തെരഞ്ഞെടുപ്പിനായുള്ള ഒരുക്കങ്ങള്‍ തുടങ്ങി.
ഇന്ന് മുതല്‍ നാമനിര്‍ദ്ദേശ പത്രിക സമര്‍പ്പിക്കാം
ഇന്ന് തിങ്കളാഴ്ച മുതല്‍ സ്ഥാനാര്‍ത്ഥികള്‍ നാമ നിര്‍ദ്ദേശ പത്രിക സമര്‍പ്പിക്കാമെന്ന് അധികൃതര്‍ അറിയിച്ചു. നാമനിര്‍ദേശം സമര്‍പ്പിക്കാനുള്ള അവസാന തിയ്യതി സെപ്റ്റംബര്‍ ഏഴാണ്. തെരഞ്ഞെടുപ്പ് തീയതിക്ക് ഏഴ് ദിവസം മുമ്പ് വരെ സ്ഥാനാര്‍ത്ഥികള്‍ക്ക് നാമനിര്‍ദേശ പത്രിക പിന്‍വലിക്കാന്‍ അവസരമുണ്ടാകും. തെരഞ്ഞെടുപ്പില്‍ എല്ലാവരുടെയും പങ്കാളിത്തം ഉറപ്പാക്കുന്നതിനായി വോട്ടെടുപ്പ് ദിനം പൊതു അവധി പ്രഖ്യാപിച്ചിട്ടുണ്ടെന്നും അധികൃതര്‍ അറിയിച്ചു. ദൈവ നിന്ദയ്‌ക്കോ പ്രവാചക നിന്ദയ്‌ക്കോ ശിക്ഷിക്കപ്പെട്ടവര്‍ക്കും ക്രിമിനല്‍ കുറ്റകൃത്യങ്ങളില്‍ ഏര്‍പ്പെട്ടതിന് ശിക്ഷിക്കപ്പെട്ടവര്‍ക്കും തെരഞ്ഞെടുപ്പില്‍ മല്‍സരിക്കാനാവില്ലെന്ന് തെരഞ്ഞെടുപ്പ് കാര്യ ജനറല്‍ ഡിപ്പാര്‍ട്ട്‌മെന്റ് തലവന്‍ കേണല്‍ സാലിഹ് അല്‍ ശാത്തി അറിയിച്ചു. കുവൈറ്റ് പൗരന്‍മാര്‍ക്കു മാത്രമേ പത്രിക സമര്‍പ്പിക്കാനാവൂ എന്നും അദ്ദേഹം വ്യക്തമാക്കി. നോമിനേഷന്‍ ഫയല്‍ ചെയ്യുന്നത് ഓരോ മണ്ഡലത്തിലും ഓരോ പോലിസ് സ്‌റ്റേഷനുകളില്‍ സംവിധാനം ഒരുക്കിയതായും അദ്ദേഹം പറഞ്ഞു.
വോട്ടര്‍മാരുടെ എണ്ണത്തില്‍ 40 ശതമാനം വര്‍ധന
തെരഞ്ഞെടുപ്പ് വകുപ്പ് പുറത്തിറക്കിയ വോട്ടര്‍ പട്ടിക പ്രകാരം 7,96000 വോട്ടര്‍മാരാണ് രാജ്യത്തുള്ളത്. 2020 ഡിസംബറിലെ തെരഞ്ഞെടുപ്പിനേക്കാള്‍ വോട്ടര്‍മാരുടെ എണ്ണത്തില്‍ 40 ശതമാനം വര്‍ധനയുണ്ട്. പുതിയ ഒട്ടേറെ പാര്‍പ്പിട മേഖലകള്‍ കൂടി നിയോജക മണ്ഡലങ്ങളിലേക്ക് ചേര്‍ത്തതാണ് വര്‍ദ്ധനവിന് കാരണം. ഒരു മണ്ഡലത്തില്‍ നിന്ന് പത്തു പേര്‍ എന്ന തോതില്‍ അഞ്ചു നിയോജക മണ്ഡലങ്ങളില്‍ നിന്നായി അമ്പതു പേരാണ് പാര്‍ലിമെന്റില്‍ ജനപ്രതിനിധികളായി എത്തുക.
നിര്‍ണായകമായ തെരഞ്ഞെടുപ്പില്‍ മത്സരിക്കുമെന്ന് മുന്‍ പാര്‍ലമെന്റ് അംഗങ്ങളില്‍ പലരും നേരത്തേ താല്‍പര്യം പ്രകടിപ്പിച്ചിട്ടുണ്ട്. പാര്‍ലമെന്റ് നിലവിലില്ലാത്ത സാഹചര്യത്തില്‍ നവംബറില്‍ നടക്കേണ്ട ബജറ്റ് നടപടിക്രമങ്ങള്‍ ഉള്‍പ്പെടെ തടസ്സപ്പെട്ടിരിക്കുകയാണ്.
