സീനിയോരിറ്റിയിൽ അനിൽ കാന്തിനെക്കാൾ മുന്നിൽ; ഡിജിപി പദവിയ്ക്കായി ബി സന്ധ്യ രംഗത്ത്

തിരുവനന്തപുരം: ഡിജിപിയായി അനിൽ കാന്ത് ഐപിഎസിനെ നിയമിച്ച സര്‍ക്കാര്‍ നടപടിയ്ക്കു പിന്നാലെ ഡിജിപി സ്ഥാനം ആവശ്യപ്പെട്ട് ഫയര്‍ ഫോഴ്സ് മേധാവി ബി സന്ധ്യ രംഗത്ത്. താൻ സീനിയോരിറ്റിയിൽ അനിൽ കാന്തിനെക്കാള്‍ മുന്നിലാണെന്നും ഡിജിപി പദവി അനുവദിക്കണമെന്നും ആവശ്യപ്പെട്ട് സന്ധ്യ കത്തു നല്‍കിയെന്നാണ് റിപ്പോര്‍ട്ട്.



Also Read: കൊവിഡ് ബാധിച്ച് മരിച്ചവരുടെ പേര് വിവരം പുറത്തു വിട്ട് ആരോഗ്യ വകുപ്പ്; ഡിസംബറിനു ശേഷം ആദ്യം

ലോക്നാഥ് ബെഹ്റ വിരമിച്ച ഒഴിവിൽ കഴിഞ്ഞ ദിവസമാണ് റോഡ് സുരക്ഷാ കമ്മീഷണര്‍ അനിൽ കാന്ത് ഐപിഎസിനെ സംസ്ഥാന സര്‍ക്കാര്‍ നിയമിച്ചത്. എന്നാൽ ഏഴു മാസം മാത്രമാണ് ഇദ്ദേഹത്തിന് സര്‍വീസിൽ ശേഷിക്കുന്നത്. പുതിയ പോലീസ് മേധാവിയെ തീരുമാനിക്കാനുള്ള മൂന്നംഗ ചുരുക്കപ്പട്ടികയിൽ അനിൽ കാന്തിനു പുറമെ ബി സന്ധ്യയും വിജിലൻസ് ഡയറക്ടര്‍ സുദേഷ് കുമാറും ഉണ്ടായിരുന്നു. ഇതിൽ എഡിജിപിയായിരുന്ന അനിൽ കാന്തിനെ ഡിജിപി പദവി നല്‍കി നിയമിക്കുകയായിരുന്നു. ഡിജിപി പദവിയിലെത്തുന്ന ദളിത് വിഭാഗത്തിൽ നിന്നുള്ള ആദ്യ ഉദ്യോഗസ്ഥനാണ് ഡൽഹി സ്വദേശിയായ അനിൽ കാന്ത്. ഈ നിയമനത്തിൽ തനിക്ക് പരാതിയില്ലെന്നും അനിൽ കാന്തിനെ സ്വാഗതം ചെയ്യുന്നുവെന്നും കഴിഞ്ഞ ദിവസം ബി സന്ധ്യ അറിയിക്കുകയും ചെയ്തിരുന്നു. അതേസമയം, നിലവിലെ പോലീസ് മേധാവിയെക്കാള്‍ സീനിയോരിറ്റിയുള്ള തനിക്ക് ഇതുവരെ ഡിജിപി പദവി ലഭിച്ചിട്ടില്ലെന്നാണ് ബി സന്ധ്യ ചൂണ്ടിക്കാട്ടുന്നത്.

Also Read: രണ്ട് മണിക്കൂറിനുള്ളിൽ റിപ്പോർട്ട് വേണം; കരാർ കമ്പനിയോട് പൊട്ടിത്തെറിച്ച് മുഹമ്മദ് റിയാസ്

സംസ്ഥാനത്ത് ഇതുവരെ വനിതകള്‍ ക്രമസമാധാന ചുമതലയുള്ള പോലീസ് മേധാവി സ്ഥാനത്തേയ്ക്ക് എത്തിയിട്ടില്ല. മുൻപ് ശ്രീലേഖ ഡിജിപി സ്ഥാനത്ത് എത്തിയിരുന്നെങ്കിലും അഗ്നിശമന സേനയുടെ ചുമതലയാണ് ഉണ്ടായിരുന്നത്.