അബുദാബി: ഉഭയകക്ഷി ബന്ധം ശക്തമാക്കുന്നതിന്റെ ഭാഗമായി അയ്യായിരത്തോളം ഇസ്രായേലി പൗരന്‍മാര്‍ക്ക് യുഎഇ ഭരണകൂടം പൗരത്വം നല്‍കിയതായി റിപ്പോര്‍ട്ട്. എമിറേറ്റ്‌സ് ലീക്ക്‌സിനെ ഉദ്ധരിച്ച് ജെറൂസലേം പോസ്റ്റ് ദിനപ്പത്രമാണ് ഇക്കാര്യം റിപ്പോര്‍ട്ട് ചെയ്തത്. കഴിഞ്ഞ മൂന്നു മാസത്തിനിടയിലാണ് ഇത്രയും പേര്‍ക്ക് പൗരത്വം അനുവദിച്ചതെന്ന് റിപ്പോര്‍ട്ടില്‍ പറയുന്നു. രാജ്യത്തെ വിസ നിയമങ്ങള്‍ കൂടുതല്‍ ലളിതമാക്കിക്കൊണ്ടുള്ള യുഎഇ ഭരണകൂടത്തിന്റെ തീരുമാനത്തെ തുടര്‍ന്നാണ് നടപടി.

​പുതിയ പൗരത്വം യാത്ര കൂടുതല്‍ എളുപ്പമാക്കും

കൊവിഡ് പ്രതിസന്ധിക്കിടയില്‍ രാജ്യത്തിന്റെ സമ്പദ് വ്യവസ്ഥയ്ക്ക് കൂടുതല്‍ ഉത്തേജനം നല്‍കുന്നതിന്റെ ഭാഗമായി സാമ്പത്തിക മേഖലയില്‍ പ്രവര്‍ത്തിക്കുന്നവര്‍ ഉള്‍പ്പെടെയുള്ള വിദേശികളായ പ്രമുഖര്‍ക്ക് പൗരത്വം അനുവദിക്കാനായിരുന്നു യുഎഇ മന്ത്രിസഭയുടെ തീരുമാനം. ഇതിന്റെ അടിസ്ഥാനത്തിലാണ് ഇസ്രായേലുമായുള്ള സാമ്പത്തിക സഹകരണം മെച്ചപ്പെടുത്തുകയെന്ന ലക്ഷ്യത്തോടെ പ്രമുഖ വ്യക്തികള്‍ക്ക് യുഎഇ സര്‍ക്കാര്‍ പൗരത്വം അനുവദിച്ചിരിക്കുന്നത്. ഇതുപ്രകാരം പൗരത്വം ലഭിച്ച ഇസ്രായേലി പൗരന്‍മാര്‍ക്ക് യുഎഇയിലേക്ക് വരുന്നതിന് ഏതെങ്കിലും രീതിയിലുള്ള വിസയുടെ ആവശ്യം വരില്ല. എന്നു മാത്രമല്ല, ഇസ്രായേലി പൗരന്‍മാര്‍ക്ക് പ്രവേശനത്തിന് സൗങ്കേതിക തടസ്സമുള്ള രാജ്യങ്ങളില്‍ യുഎഇ പാസ്‌പോര്‍ട്ട് ഉപയോഗിച്ച് യഥേഷ്ടം സഞ്ചരിക്കാനും ഇതോടെ സാധ്യമാവും.

​പൗരത്വം അബ്രഹാം കരാറിന്റെ തുടര്‍ച്ച

ഇസ്രായേലി പൗരത്വം നിലനിര്‍ത്താന്‍ അനുവദിച്ചു കൊണ്ടുതന്നെയാണ് ബിസിനസ് പ്രമുഖരും നിക്ഷേപകരും ഉള്‍പ്പെടെയുള്ളവര്‍ക്ക് യുഎഇ പൗരത്വം നല്‍കിയിരിക്കുന്നത്. കഴിഞ്ഞ വര്‍ഷം സപ്തംബറില്‍ ഡൊണാള്‍ഡ് ട്രംപ് യുഎസ് പ്രസിഡന്റായിരിക്കെയാണ് യുഎഇയും ബഹ്‌റൈനും ഇസ്രായേലുമായി സഹകരണ കരാറില്‍ ഒപ്പുവച്ചത്. പതിറ്റാണ്ടുകളായി ഇസ്രായേലുമായി അറബ് ലോകത്തിനുണ്ടായിരുന്ന ശത്രുത മാറ്റിവച്ചുകൊണ്ടായിരുന്നു അബ്രഹാം അക്കോഡ് എന്ന പേരിലുള്ള കരാറില്‍ ഇരു രാജ്യങ്ങളും ഒപ്പുവച്ചത്. ഇരുരാജ്യങ്ങളും തമ്മിലുള്ള ബന്ധം ശക്തിപ്പെടുത്തുന്നതിന്റെ ഭാഗമായി കഴിഞ്ഞ മാസം ഇസ്രായേല്‍ വിദേശകാര്യ മന്ത്രി യായെര്‍ ലാപിദ് യുഎഇ സന്ദര്‍ശിച്ചിരുന്നു. അബ്രഹാം കരാറിനു ശേഷം ഒരു അറബ് രാജ്യത്ത് ഇസ്രായേല്‍ മന്ത്രി നടത്തിയ ആദ്യ ഔദ്യോഗിക സന്ദര്‍ശനമായിരുന്നു ഇത്. ഇസ്രായേലിലെ ഭരണമാറ്റം ഉഭയകക്ഷി ബന്ധത്തെ ബാധിക്കില്ലെന്നും അവരുമായുള്ള ബന്ധം തുടരുമെന്നും യുഎഇ വിദേശകാര്യമന്ത്രി ശെയ്ഖ് അബ്ദുല്ല ബിന്‍ സായിദ് നേരത്തേ വ്യക്തമാക്കിയിരുന്നു.