ഗർഭിണികൾക്ക് കൊവിഡ് -19 വാക്സിനേഷൻ എടുക്കാം, ഇനി വൈകേണ്ട

രാജ്യത്തെ ഗർഭിണികൾക്ക് കൊവിഡ് 19 വാക്സിനേഷൻ നൽകാമെന്ന് കേന്ദ്ര ആരോഗ്യ മന്ത്രാലയത്തിന്റെ തീരുമാനം. കഴിഞ്ഞ ദിവസമാണ് ഇക്കാര്യത്തിൽ അന്തിമ ധാരണയിലെത്തിയത്. ഇമ്മ്യൂണൈസേഷൻ സംബന്ധിച്ച ദേശീയ സാങ്കേതിക ഉപദേശക സംഘത്തിന്റെ (NTAGI) ശുപാർശകളുടെ അടിസ്ഥാനത്തിലാണ് കേന്ദ്ര ആരോഗ്യ മന്ത്രാലയം അനുമതി നൽകിയത്.



ഗർഭിണികൾക്ക് ഇപ്പോൾ കോവിനിൽ രജിസ്റ്റർ ചെയ്തോ അല്ലെങ്കിൽ അടുത്തുള്ള കോവിഡ് വാക്സിനേഷൻ സെന്ററിൽ എത്തിയോ വാക്സിൻ ഉറപ്പാക്കാവുന്നതാണ്. ഗർഭിണികളുടെയും ഗർഭസ്ഥ ശിശുക്കളുടെയും സുരക്ഷ ഉറപ്പാക്കാനായുള്ള പുതിയ തീരുമാനം സംബന്ധിച്ച് എല്ലാ സംസ്ഥാനങ്ങളിലേക്കും കേന്ദ്രഭരണ പ്രദേശങ്ങളിലേക്കും നിർദേശങ്ങൾ നൽകിയിട്ടുണ്ട്.

രോഗപ്രതിരോധം, പൊതുജനാരോഗ്യം, രോഗനിയന്ത്രണം, വിവരസാങ്കേതികവിദ്യ എന്നീ മേഖലകളിലെ വിദഗ്ധരുടെ ശുപാർശകൾ ഇന്ത്യയുടെ കോവിഡ് വാക്സിനേഷൻ പ്രോഗ്രാമിൽ ഉൾപ്പെടുന്നു. ഇതുവരെ, ഗർഭിണികളൊഴികെ എല്ലാ വിഭാഗത്തിലുള്ള കോവിഡ് വാക്സിനേഷന് അർഹരായിരുന്നു. വാക്സിനേഷൻ ഗർഭിണികളുടെയും ഗർഭസ്ഥ ശിശുക്കളുടെയും ആരോഗ്യം സംബന്ധിച്ച ആശങ്കയായിരുന്നു വാക്സിൻ നൽകുന്നതിനുള്ള തടസം.

Also read: വൈറ്റമിന്‍ ഡി കുറവ് ഗര്‍ഭത്തെ ബാധിയ്ക്കുന്നത്

ഗർഭകാലത്ത് കൊവിഡ് വന്നാൽ:



ഗർഭാവസ്ഥയിൽ കോവിഡ് ബാധിക്കുന്നത് ഗർഭിണികളുടെ ആരോഗ്യത്തെ ഗുരുതരമായ രീതിയിൽ ബാധിക്കുമെന്നാണ് കണക്കുകൾ സൂചിപ്പിക്കുന്നത്. ഭ്രൂണത്തിന്റെ ആരോഗ്യത്തെയും ഇത് ബാധിക്കും. കോവിഡ് ബാധിച്ച ഗർഭിണികൾക്കും അവരുടെ ഗർഭസ്ഥ ശിശുകൾക്കും വൈറസ് ബാധ കാരണം ജീവൻ നഷ്ടമാകുന്ന സാഹചര്യങ്ങൾ നിരവധിയുണ്ടായി. മരണത്തിൽ നിന്ന് രക്ഷപ്പെട്ട ഗർഭിണികളിലും അവരുടെ കുഞ്ഞുങ്ങളിലും പലവിധ ആരോഗ്യ പ്രശനങ്ങൾ ദീർഘാനാളത്തേക്ക് നിലനിൽക്കാമെന്നും പഠനങ്ങൾ കണ്ടെത്തിയിട്ടുണ്ട്.

കൊവിഡ് 19 അണുബാധയുള്ള ഗർഭിണികളിൽ മാസം തികയാതെയുള്ള പ്രസവം സാധാരണമാണ്. നവജാത ശിശുരോഗത്തിനുള്ള സാധ്യത ഉൾപ്പെടെയുള്ള മറ്റ് പ്രതികൂല അവസ്ഥകൾക്കും സാധ്യത കൂടുതലാണ്.

കേന്ദ്ര ആരോഗ്യ മന്ത്രാലയം ഇമ്മ്യൂണൈസേഷൻ സംബന്ധിച്ച ദേശീയ സാങ്കേതിക ഉപദേശക സംഘത്തിന്റെ (NTAGI) ശുപാർശകൾ അംഗീകരിക്കുകയും ഗർഭിണികൾക്ക് പ്രതിരോധ കുത്തിവയ്പ്പ് നൽകുന്നതിന് ഒരു പ്രവർത്തന മാർഗ്ഗനിർദ്ദേശം തയ്യാറാക്കുകയും ചെയ്തിട്ടുണ്ട്.

അറിയാം ഇക്കാര്യങ്ങൾ



1. ഗർഭിണികൾ ഉൾപ്പെടെ 18 വയസ്സിന് മുകളിലുള്ള എല്ലാവർക്കും നിലവിൽ കോവിഡ് പ്രതിരോധ വാക്സിൻ സ്വീകരിക്കാം

2. ഗർഭിണികൾക്ക് കോവിഡ് ബാധ വരുന്നത് അപകട സാധ്യത ഇരട്ടിയാക്കും. ഭ്രൂണത്തിന്റെ ആരോഗ്യത്തെയും അത് ബാധിക്കും. അതിനാൽ എത്രയും വേഗം വാക്സിൻ സ്വീകരിക്കുകയാണ് ഉത്തമം.

3. ഈ അവസ്ഥകളിലുള്ളവർ ശ്രദ്ധിക്കണം:

• 35 വയസിനു മുകളിൽ പ്രായമുള്ള ഗർഭിണികൾ

• അമിത വണ്ണമുള്ളവർ

• പ്രമേഹം, രക്തസമ്മർദ്ദം എന്നിവ അനുഭവിക്കുന്നവർ

• കൈ കാലുകളിൽ രക്തം കട്ട പിടിക്കുന്നതുമായി ബന്ധപ്പെട്ട പ്രശ്നം അനുഭവിക്കുന്നവർ

4. ഇവയ്ക്കുള്ള സാധ്യത വർധിക്കുന്നു:

• വളർച്ച പൂർത്തിയാകുന്നതിനു മുൻപുള്ള പ്രസവം

• കുട്ടിയുടെ ഭാരം അനാരോഗ്യ സൂചനയായ രണ്ടര കിലോഗ്രാമിന് താഴെ വരിക

• ജനനത്തോടെ കുട്ടിയുടെ ജീവൻ നഷ്ടമാകുന്നതിനുള്ള സാധ്യത

5. നിങ്ങൾ ഗർഭ കാലത്തിന്റെ ഏത് ഘട്ടത്തിലാണെങ്കിലും വാക്സിൻ സ്വീകരിക്കാം, എന്നാൽ എത്രയും നേരത്തെ സ്വീകരിക്കുന്നതാണ് നല്ലത്.

6.നിലവിൽ ഗർഭ കാലത്തിനിടെ കോവിഡ് ബാധിച്ചവർ പ്രസവശേഷം ഉടൻ തന്നെ വാക്സിൻ സ്വീകരിക്കേണ്ടതാണ്.

7. ഗർഭിണികൾ വാക്സിൻ എടുത്തുകഴിഞ്ഞാൽ സാധാരണയുള്ള നേരിയ പാർശ്വ ഫലങ്ങൾ മാത്രമേ ഉണ്ടാകൂ. നേരിയ പനി, ഇൻജെക്ഷൻ എടുത്ത ഭാഗത്ത് ചെറിയ വേദന, ക്ഷീണം തുടങ്ങിയവ രണ്ടോ മൂന്നോ ദിവസം ഉണ്ടായേക്കാം.

8. വാക്സിൻ എടുക്കുന്നത് ദീർഘകാലത്തേയ്ക്ക് കുഞ്ഞിന് എന്തെങ്കിലും തരത്തിലുള്ള പ്രയാസങ്ങൾ സൃഷ്ടിക്കുമോ എന്ന് സ്ഥിരീകരിച്ചിട്ടില്ല

ഗർഭിണികൾക്ക് ഗർഭാവസ്ഥയിൽ എപ്പോൾ വേണമെങ്കിലും അടുത്തുള്ള സർക്കാർ അല്ലെങ്കിൽ സ്വകാര്യ വാക്സിനേഷൻ സെന്ററിൽ കോവിനിൽ രജിസ്റ്റർ ചെയ്ത ശേഷം അല്ലെങ്കിൽ അടുത്തുള്ള കേന്ദ്രത്തിൽ വാക്ക് ഇൻ രജിസ്ട്രേഷൻ വാക്സിൻ സ്വീകരിക്കാം. കോവിഡ് വാക്സിനേഷൻ പ്രോഗ്രാമിൽ 18 വയസ്സിന് മുകളിലുള്ള സാധാരണ ഗുണഭോക്താക്കൾക്ക് രജിസ്ട്രേഷൻ, വാക്സിനേഷനുശേഷം സർട്ടിഫിക്കറ്റുകൾ നൽകൽ തുടങ്ങിയവപഴയപടി തുടരും.