ഇന്ത്യന്‍ രാഷ്ട്രീയത്തില്‍ പ്രാദേശിക പാര്‍ട്ടികള്‍ക്കുള്ള സ്വാധീനം എക്കാലത്തും വലുതാണ്. പ്രമുഖ മുന്നണികളെ പോലും അടിയറവ് പറ്റിച്ച് അവര്‍ പല സംസ്ഥാനങ്ങളുടെയും ഭരണം കയ്യാളുന്നത് നമ്മള്‍ കണ്ടിട്ടുണ്ട്. തമിഴ്നാട്ടില്‍ ഡിഎംകെയും ആന്ധ്രാപ്രദേശില്‍ വൈഎസ്ആര്‍ കോണ്‍ഗ്രസും, തെലങ്കാനയിൽ ടിആർഎസ്സും പശ്ചിമ ബംഗാളില്‍ തൃണമൂല്‍ കോണ്‍ഗ്രസ്സും ഭരിക്കുന്നത് ഇതിനൊക്കെ ഉദാഹരണമാണ്. പ്രമുഖ കക്ഷികളായ കോണ്‍ഗ്രസ്സും ബിജെപിയും പല അടവുകള്‍ പയറ്റിയിട്ടും ഈ പ്രാദേശിക പാര്‍ട്ടികളെ പിടിക്കാനായിട്ടില്ല. എന്തുകൊണ്ടായിരിക്കും ജനങ്ങള്‍ ദേശീയ പാര്‍ട്ടികളേക്കാള്‍ ഇവരില്‍ വിശ്വാസം അര്‍പ്പിക്കുന്നത്? പുതിയ കാലത്തും വന്‍കിട പ്രസ്ഥാനങ്ങളേക്കാള്‍ ഇവര്‍ക്ക് സാധ്യത തുറക്കുന്നുണ്ടോ? ഉണ്ടെന്നാണ് കര്‍ണാടകയുടെ സ്വന്തം പാര്‍ട്ടിയായ ജെഡിഎസ്സിന്റെ നേതാക്കളുടെ അഭിപ്രായം. നാട്ടുകാര്‍ക്ക് വേണ്ടി മണ്ണിലിറങ്ങി പണിയെടുക്കാന്‍ തന്നെയാണ് എച്ച് ഡി ദേവഗൗഡയുടെ മകനും ജെഡിഎസ്സിന്റെ തലമുതിര്‍ന്ന നേതാവുമായ എച്ച് ഡി കുമാരസ്വാമിയുടെ തീരുമാനം. വരുന്ന അഞ്ച് വര്‍ഷം സംസ്ഥാന ഭരണം തങ്ങളുടെ കൈകളിലേക്ക് നിങ്ങള്‍ വിശ്വസിച്ച് ഏല്‍പ്പിക്കൂ എന്നാണ് ജെഡിഎസ് ആവശ്യപ്പെടുന്നത്. ഇതുവരെ തന്ന പിന്തുണയില്‍ നിന്ന് കവിഞ്ഞ് സംസ്ഥാന ഭരണം ഒറ്റയ്ക്ക് കയ്യാളാന്‍ കേവല ഭൂരിപക്ഷം നല്‍കണമെന്ന് ആവശ്യപ്പെട്ട് ജെഡിഎസ് ഒരു വര്‍ഷം മുന്നെ തന്നെ പണി തുടങ്ങിയിട്ടുണ്ട്. ‘നിങ്ങളുടെ അനുഗ്രഹം കൊണ്ട് ഞാന്‍ രണ്ട് തവണ മുഖ്യമന്ത്രിയായി. 2023ലെ തിരഞ്ഞെടുപ്പ് എന്റെ അവസാന പോരാട്ടമാണ്. ഇനി വരുന്ന അഞ്ച് വര്‍ഷം ഞങ്ങളെ പൂര്‍ണമായും വിശ്വസിച്ച് ഏല്‍പ്പിക്കണം.” എന്നാണ് എച്ച് ഡി കുമാരസ്വാമി പറഞ്ഞത്.
ഒരു കൊല്ലം മുമ്പ് പ്രഖ്യാപിച്ച ‘മിഷന്‍ 123’
ഒരു വര്‍ഷം മുമ്പാണ്. ബെംഗളുരു നഗരത്തില്‍ നിന്ന് 30 കി.മീ അകലെ ബിഡദിയിലുള്ള വിശാലമായ ഒരു തെങ്ങിന്‍ തോട്ടം. വളരെ ശാന്തസുന്ദരമായ ഈ തോട്ടം പൊതുവേ അധികം ആളും അനക്കങ്ങളും ഇല്ലാത്ത ഇടമാണ്. പെട്ടെന്നൊരു ദിവസം എച്ച്ഡി കുമാരസ്വാമിയുടെ ഉടമസ്ഥതയിലുള്ള ഈ സ്ഥലത്ത് ഒരുപാട് കാറുകള്‍ ചീറിപ്പാഞ്ഞെത്തുന്നു. ആളുകളും വാഹനവ്യൂഹങ്ങളുമൊക്കെയായി ബഹളമയമായി. കുമാരസ്വാമി ഒറ്റയ്ക്ക് ഇരിക്കാനും വിശ്രമവേളകളിലുമൊക്കെ എത്തിയിരുന്ന ഈ ഫാം ഹൗസ് സെക്കന്റുകള്‍ കൊണ്ട് തിരക്കേറിയ ഇടമായി മാറി. കാര്യമെന്താണെന്ന് അന്വേഷിച്ചവര്‍ക്ക് അവിടെ എത്തിയ ശേഷമാണ് വ്യക്തത കൈവന്നത്. വലിയൊരു അജണ്ട ഉയര്‍ത്തിക്കാട്ടിയാണ് എച്ച്ഡി കുമാരസ്വാമി തന്റെ പാർട്ടിയുടെ നേതാക്കളെ ഈ ഫാം ഹൗസിലേക്ക് വിളിച്ചുവരുത്തിയിരിക്കുന്നത്. മൂന്ന് വര്‍ഷത്തിന് ശേഷം വരാനിരിക്കുന്ന കര്‍ണാടക നിയമസഭാ തെരഞ്ഞെടുപ്പ്. എല്ലാ വര്‍ഷത്തെയും പോലെ സമാന അടവുകളും നയങ്ങളുമൊക്കെയായി ഇത്തവണയും പോയാല്‍പോരാ എന്ന് കുമാരസ്വാമി ആ ഫാംഹൗസ് മീറ്റിങ്ങൾ പ്രഖ്യാപിച്ചു. തിരഞ്ഞെടുപ്പില്‍ ഒരു ടിക്കറ്റ് പ്രതീക്ഷിക്കുന്നവര്‍ക്കൊക്കെ വലിയൊരു ചോദ്യാവലി നല്‍കിയാണ് കുമാരസ്വാമി സ്വീകരിച്ചത്. സ്വന്തം കഴിവുകളും മനോഭാവവും, പാര്‍ട്ടിയെ കുറിച്ചുള്ള നിലപാടുകള്‍, അവരവരുടെ മണ്ഡലങ്ങളിലെ സാമൂഹികവും രാഷ്ട്രീയവുമായ കാര്യങ്ങളെ കുറിച്ചുള്ള ധാരണകള്‍, ജനങ്ങള്‍ അനുഭവിക്കുന്ന പ്രധാന പ്രശ്‌നങ്ങള്‍, പരിഹാരങ്ങള്‍ തുടങ്ങി നിരവധി ചോദ്യങ്ങളാണ് അദ്ദേഹം ഓരോരുത്തരോടും ഉന്നയിച്ചത്. ഇതിനൊക്കെ മറുപടി ഓരോരുത്തരും നല്‍കേണ്ടിവന്നു. 
ജോഡോ യാത്രയ്ക്ക് 5000 പേരെ വേണമെന്ന് ശിവകുമാർ; 500 കിട്ടില്ലെന്ന് സിദ്ധരാമയ്യ: കർണാടകയിൽ രാഹുലിനെ കാത്തിരിക്കുന്നത്വരാനിരിക്കുന്ന തിരഞ്ഞെടുപ്പില്‍ മത്സരിക്കാന്‍ ആഗ്രഹിക്കുന്നവരൊക്കെ താന്താങ്ങളുടെ മണ്ഡലത്തില്‍ ജനങ്ങള്‍ക്കിടയില്‍ ഇറങ്ങി പ്രവര്‍ത്തിക്കണമെന്നായിരുന്നു നിര്‍ദേശം. എച്ച് ഡി കുമാരസ്വാമി ‘മിഷന്‍ 123’ എന്ന് പേരിട്ട ഈ ഓപ്പറേഷന്‍ പ്രഖ്യാപനം എല്ലാ പാർട്ടികളെയും ജാഗ്രത്താക്കി. ഏഴ് ദിവസത്തെ ശില്‍പ്പശാലയാണ് അദ്ദേഹം ഫാം ഹൗസില്‍ നടത്തിയത്. പാര്‍ട്ടിയുടെ പഴയ കോട്ടകള്‍ സുരക്ഷിതമാക്കി നിർത്തുകയും ഒപ്പം പുതിയവ കീഴടക്കുകയും ചെയ്യേണ്ടത് എങ്ങിനെയാണെന്നാണ് മിഷന്‍ 123 യുടെ മാര്‍ഗരേഖ പറയുന്നത്. 126 സാധ്യതാ സ്ഥാനാര്‍ത്ഥികളുടെ പട്ടികയും അദ്ദേഹം പ്രഖ്യാപിച്ചിരുന്നു. കൂടാതെ വിശകലന വിദഗ്ധരുടെയും മോട്ടിവേഷണല്‍ സ്പീക്കര്‍മാരുടെയും സഹായത്തോടെ നേതൃത്വ പാടവം ഉയര്‍ത്താനും സോഷ്യല്‍മീഡിയ കൈകാര്യം ചെയ്യാനും ശില്‍പ്പശാലയിലൂടെ അണികളെ പഠിപ്പിച്ചു. നിയമസഭാംഗങ്ങള്‍, ടിക്കറ്റ് പ്രതീക്ഷിക്കുന്നവര്‍, പാര്‍ട്ടിയുടെ വിവിധ വിഭാഗങ്ങളുടെ തലവന്‍മാര്‍, പാര്‍ട്ടി പ്രവര്‍ത്തകര്‍ എന്നിവരാണ് പരിപാടിയില്‍ പങ്കെടുത്തത്.
ഹനഗൽ ഉപതെരഞ്ഞെടുപ്പിൽ കാണാം
ഒരു വര്‍ഷം മുമ്പ് പ്രഖ്യാപിച്ച പദ്ധതി ഇപ്പോഴും പലഘട്ടങ്ങളിലായി നടന്നുവരുന്നു. ബൂത്തുകള്‍ ശക്തിപ്പെടുത്തുക, പുതിയ അംഗങ്ങളെയും വോട്ടര്‍മാരെയും നേരിട്ടു ചേര്‍ക്കുക തുടങ്ങിയവയൊക്കെ ഇപ്പോള്‍ ഓരോ അണികളും വ്യക്തിപരമായി തന്നെ ചെയ്യുന്നു. ചുരുക്കിപ്പറഞ്ഞാല്‍ വരാനിരിക്കുന്ന തിരഞ്ഞെടുപ്പില്‍ സാധാരണക്കാര്‍ക്ക് ഇടയില്‍ പണിയെടുത്ത് തന്നെ റിസള്‍ട്ടുണ്ടാക്കുകയാണ് ജനതാദള്‍. 126 മണ്ഡലങ്ങളെയും വിവിധ മേഖലകളായി വേര്‍തിരിച്ച് പ്രത്യേകം ശ്രദ്ധ നല്‍കി പ്രവര്‍ത്തിക്കുകയാണ് അണികള്‍. 30 നിര്‍ദേശങ്ങളുള്ള ടാസ്‌ക് ലിസ്റ്റാണ് ഓരോ പ്രവര്‍ത്തകര്‍ക്കും എച്ച് ഡി കുമാരസ്വാമി നല്‍കിയിരിക്കുന്നത്. ബിഡദി ഇവന്റിന് ‘കോര്‍പ്പറേറ്റ് ടച്ച്’ ഉണ്ടായിരുന്നാണ് പൊതുവിലുള്ള അഭിപ്രായം. ഒക്ടോബര്‍ 30-ന് ഹനഗലില്‍ നടക്കുന്ന ഉപതിരഞ്ഞെടുപ്പില്‍ ഈ നയത്തിന്റെ ആദ്യഫലം നല്‍കുമെന്ന പ്രതീക്ഷയിലാണ് പാര്‍ട്ടി. ‘മിഷന്‍ 123’ അനുസരിച്ചുള്ള പ്രവര്‍ത്തനങ്ങള്‍ വിലയിരുത്തിയ ശേഷമായിരിക്കും ഓരോരുത്തരുടെയും സ്ഥാനാര്‍ത്ഥിത്വം പ്രഖ്യാപിക്കുക. മോശം പ്രകടനം നടത്തിയവര്‍ക്ക് ഇത്തവണ ടിക്കറ്റുണ്ടായിരിക്കില്ലെന്നാണ് സൂചന.
‘പഞ്ചരത്ന യോജന’: വാഗ്ദാനങ്ങള്‍ക്ക് ആം ആദ്മി ടച്ചോ?
ഡല്‍ഹിയിലെ സാധാരണ ജനങ്ങള്‍ അഭിമുഖീകരിക്കുന്ന പ്രശ്‌നങ്ങള്‍ എന്തൊക്കെയാണെന്ന് ഉയര്‍ത്തിക്കാട്ടിയും തങ്ങളുടെ പരിഹാരം എന്താണെന്നും ഓരോ വോട്ടര്‍മാരെയും നേരില്‍ക്കണ്ട് ഉറപ്പുനല്‍കിയാണ് ആംആദ്മി അധികാരം പിടിച്ചത്. ജലവിതരണവും വൈദ്യുതി വിതരണവും ഉള്‍പ്പെടെ എല്ലാ വാഗ്ദാനങ്ങളും ഡല്‍ഹിക്കാരായ സാധാരണക്കാര്‍ അനുഭവിക്കുന്ന പ്രശ്‌നങ്ങളായിരുന്നു. എല്ലാ രാഷ്ട്രീയ പാര്‍ട്ടികളും പൊതുവായുള്ള പ്രശ്‌നങ്ങള്‍ അഭിസംബോധന ചെയ്യുമ്പോള്‍ ഓരോ കാറ്റഗറിയിലുമുള്ള ആളുകള്‍ അനുഭവിക്കുന്ന ഓരോ വിധത്തിലുള്ള ദുരിതങ്ങളും എടുത്തുപറഞ്ഞാണ് അവര്‍ ആളുകള്‍ക്കിടയില്‍ സ്ഥാനം ഉറപ്പിച്ചത്. ഇതേ രീതി തന്നെയാണ് ജനതാദളിനായി എച്ച്ഡി കുമാരസ്വാമിയും പയറ്റുന്നതെന്ന് പറയാം. വിദ്യാഭ്യാസം, ആരോഗ്യം, കൃഷി, യുവജന-സ്ത്രീ ശാക്തീകരണം, തൊഴിലും പാര്‍പ്പിടവും എന്നീ അഞ്ച് നിര്‍ണായക മേഖലകളില്‍ പരിഷ്‌കാരങ്ങള്‍ വാഗ്ദാനം ചെയ്യുന്ന ‘പഞ്ചരത്ന യോജന’ എന്ന പേരില്‍ ഒരു പ്രകടനപത്രിക കുമാരസ്വാമി അവതരിപ്പിച്ചിരുന്നു. തങ്ങള്‍ തിരഞ്ഞെടുക്കപ്പെട്ടാല്‍ മൂലധന ആസ്തികള്‍ സൃഷ്ടിക്കുന്നതിനായി ഞങ്ങള്‍ ഓരോ വര്‍ഷവും അഞ്ച് മേഖലകള്‍ക്കും 25,000 കോടി രൂപ വീതം അനുവദിക്കുമെന്നും അവര്‍ അവകാശപ്പെടുന്നു.
12ാം ക്ലാസ് വരെ എല്ലാ കുട്ടികള്‍ക്കും സൗജന്യ വിദ്യാഭ്യാസം, പാവപ്പെട്ടവര്‍ക്ക് വീട്, കര്‍ഷകരെ സ്വയം പര്യാപ്തരാക്കുന്നതിന് ക്ഷേമപദ്ധതികള്‍ എന്നിവയും പ്രകടനപത്രികയില്‍ വാഗ്ദാനം ചെയ്യുന്നു. തന്റെ കഴിഞ്ഞ സര്‍ക്കാര്‍ 25,000 കോടി രൂപയുടെ കാര്‍ഷിക കടങ്ങള്‍ എഴുതിത്തള്ളിയെന്നും എന്നാല്‍ അത്തരം ഇളവുകള്‍ ഒരു താല്‍ക്കാലിക പരിഹാരം മാത്രമാണെന്നും അദ്ദേഹം പറയുന്നു. കാര്‍ഷിക ഉല്‍പന്നങ്ങള്‍ക്ക് ന്യായവില ഉറപ്പുനല്‍കുകയും, വിപണി, സംഭരണം, ഗതാഗത സൗകര്യങ്ങള്‍ എന്നിവ നിര്‍മ്മിക്കുകയും കര്‍ഷകരുടെ ഭാരം കുറയ്ക്കുന്നതിന് കാര്‍ഷിക സബ്സിഡികള്‍ പുനഃക്രമീകരിക്കുകയും ചെയ്യുകയാണ് വഴിയെന്ന് കുമാരസ്വാമി പറയുന്നു.
ഇതിനിടെ സംസ്ഥാനം അനുഭവിക്കുന്ന പ്രശ്‌നങ്ങള്‍ക്ക് പരിഹാരം ആവശ്യപ്പെട്ട് ജനതാദള്‍ വലിയ പ്രചാരണ പരിപാടികളും ആരംഭിച്ചിട്ടുണ്ട്. ജനങ്ങള്‍ ദീര്‍ഘകാലമായി അനുഭവിക്കുന്ന കുടിവെള്ള പ്രശ്‌നം മുന്‍നിര്‍ത്തി നേതാക്കള്‍ ‘ജനതാ ജലധാരേ’ ക്യാമ്പയിനും സംഘടിപ്പിച്ചിരുന്നു. മെയ് മാസത്തില്‍ 123 വാഹനങ്ങള്‍ നിരത്തിലിറക്കി പാര്‍ട്ടിയുടെ പ്രചരണപരിപാടികള്‍ ശക്തമാക്കിയിട്ടുണ്ട്. 180 അസംബ്ലി മണ്ഡലങ്ങളിലായാണ് ഈ വാഹനങ്ങളുടെ പര്യടനം.
ഗ്രാമതലത്തില്‍ ആരോഗ്യ പരിരക്ഷാ സൗകര്യങ്ങള്‍ നവീകരിക്കുക, എല്ലാ വീട്ടുകാര്‍ക്കും ഒരു ജോലിയെങ്കിലും നല്‍കുക എന്നിവയും പ്രകടനപത്രികയില്‍ വിഭാവനം ചെയ്യുന്നു. “പ്രാദേശികമായി തൊഴിലവസരങ്ങള്‍ സൃഷ്ടിക്കാന്‍ കഴിയുന്ന നിക്ഷേപകരെ ഞങ്ങള്‍ ആകര്‍ഷിക്കും. ടയര്‍-2, ടയര്‍-3 നഗരങ്ങളില്‍ ഉല്‍പ്പാദന സൗകര്യങ്ങള്‍ സ്ഥാപിക്കാന്‍ ആഗ്രഹിക്കുന്ന നിക്ഷേപകര്‍ക്ക് ഇന്‍സെന്റീവ് ലഭിക്കും. യുവാക്കള്‍ക്ക് അവരുടെ കുടുംബത്തെ പോറ്റാന്‍ ഒരു ജോലി ആവശ്യമാണ്,” കുമാരസ്വാമി പറയുന്നു. നേരത്തെ ഗ്രാമങ്ങളില്‍ മാത്രം ശ്രദ്ധ കേന്ദ്രീകരിച്ചിരുന്ന പാര്‍ട്ടി ഇത്തവണ നഗരങ്ങളെ കൂടി തങ്ങളുടെ ഫോക്കസ് ലിസ്റ്റില്‍ ചേര്‍ത്തിട്ടുണ്ട്. ഒറ്റയ്ക്ക് അധികാരം പിടിക്കാനായി ഭൂരിപക്ഷം വേണം എന്നതിലൂന്നിയാണ് പ്രവർത്തനം. 224 സീറ്റുകളിലും ഒറ്റയ്ക്ക മത്സരിക്കാനാണ് ലക്ഷ്യമിടുന്നത്. 70-ഓളം സീറ്റുകള്‍ നഗരങ്ങളിലാണ്. അതുകൊണ്ട് തന്നെ നഗരവാസികള്‍ പൊതുവായി നേരിടുന്ന പ്രശ്‌നങ്ങളും ഇത്തവണ ജെഡിഎസ് ഉയര്‍ത്തിക്കാട്ടുന്നുണ്ട്. ഇതുവരെ കര്‍ണാടകയിലെ 20 ശതമാനം വോട്ട് മാത്രം പ്രതിനിധീകരിച്ച പാര്‍ട്ടി വിഹിതം വലിയ തോതില്‍ വര്‍ധിപ്പിക്കാനാണ് ലക്ഷ്യമിടുന്നത്.ദളിത്, ആദിവാസി, പിന്നോക്ക, ന്യൂനപക്ഷ സമുദായങ്ങളുണ്ട്. കൂടാതെ സ്ത്രീ വോട്ടര്‍മാര്‍ 49 ശതമാനം വരും. ഞങ്ങളുടെ അടിത്തറ വിപുലീകരിക്കാന്‍ ഈ ഗ്രൂപ്പുകളില്‍ നിന്നുള്ള സാധ്യതയുള്ള നേതാക്കളെ കണ്ടെത്തുമെന്നും എച്ച്ഡി കുമാരസ്വാമി പറഞ്ഞു.
ഹൈദരാബാദിനെ ‘ലിബറേറ്റ്’ ചെയ്യുന്ന ബിജെപി എന്താണ് അടുപ്പത്ത് കയറ്റിയിരിക്കുന്നത്?ഡി.കെ ശിവകുമാറിന് മുമ്പില്‍ വീണ്ടും തോല്‍ക്കാന്‍ വയ്യ
2023-ലെ നിയമസഭാ തെരഞ്ഞെടുപ്പ് ജെഡിഎസിനെ പോലെ തന്നെ വളരെ ഗൗരവത്തോടെ കോണ്‍ഗ്രസും നോക്കിക്കാണുന്നു. നിലവില്‍ മുഖ്യമന്ത്രി സ്ഥാനാര്‍ത്ഥിത്വത്തിനായി കോണ്‍ഗ്രസില്‍ തമ്മില്‍ത്തല്ല് തുടങ്ങിയിട്ടുമുണ്ട്. നിലവിലെ കോണ്‍ഗ്രസ് പ്രദേശ് പാര്‍ട്ടി പ്രസിഡന്റായ ഡി. കെ. ശിവകുമാറും സിദ്ധരാമയ്യയും പരസ്പരം മത്സരിക്കുകയാണ്. കോണ്‍ഗ്രസിന്റെ മുഖ്യമന്ത്രി സ്ഥാനാര്‍ത്ഥിത്വത്തിന് കൂടുതല്‍ സാധ്യതയുള്ള നേതാവാണ് ഡി.കെ ശിവകുമാര്‍. അദ്ദേഹം മത്സരത്തിന് ഇറങ്ങിയാല്‍ ഇത്തവണ ജെഡിഎസില്‍ നിന്ന് നേരിടേണ്ടി വരിക എച്ച്. ഡി. കുമാരസ്വാമിയെയാണ്. ജെഡിഎസ്സിന് ഇത് മുന്‍ധാരണയുണ്ടെന്ന് പറയാം. കാരണം. രണ്ടാമതൊരു തവണ കൂടി സംസ്ഥാനത്തെ സെലിബ്രിറ്റി സ്ഥാനാര്‍ത്ഥിയായ ഡി.കെ ശിവകുമാറിനോട് തോല്‍ക്കുന്നതിനെ കുറിച്ച് അദ്ദേഹത്തിന് ചിന്തിക്കാന്‍ കൂടി സാധിക്കില്ല. 1999ല്‍ സാത്തനൂര്‍ മണ്ഡലത്തില്‍ ശിവകുമാറിനോട് തോറ്റ ചരിത്രമുണ്ട് കുമാരസ്വാമിക്ക്. അതുകൊണ്ട് കൂടി ഇത്തവണ പോരാട്ടം കടുപ്പിച്ച് ഈ തോല്‍വിക്ക് കൂടി പകരം ചെയ്യാനുള്ള ഒരു ത്വര കുമാരസ്വാമിക്കുണ്ടാകാം. ദേശീയ പാര്‍ട്ടികളായ ബി.ജെ.പിയെയും കോണ്‍ഗ്രസിനെയും നേരിടാന്‍ ജെഡിഎസിന് സാധിക്കുമോ എന്ന് തുടക്കത്തില്‍ ആശങ്കയുണ്ടായിരുന്നു. എല്ലാവരും ഒരുപോലെ പുറത്തിറങ്ങി പ്രവര്‍ത്തിക്കും, നിലവില്‍ തങ്ങള്‍ക്കുള്ള ഇരുപത് ശതമാനം വോട്ടിന് മുകളിലാണ് പുതിയത് കെട്ടിപ്പടുക്കുന്നതെന്നും കുമാരസ്വാമി പറഞ്ഞു.
പാലം വലിച്ച മുന്നണികള്‍ക്കുള്ള മറുപടി
കര്‍ണാടകയിലെ പ്രമുഖ രാഷ്ട്രീയ പാര്‍ട്ടിയാണ് ജെഡിഎസ്. എച്ച്ഡി ദേവഗൗഡയുടെ പാര്‍ട്ടിയെ മകന്‍ നയിക്കുകയാണ്. ജനങ്ങള്‍ക്കിടയില്‍ വലിയ സ്വാധീനമുള്ള ഈ പാര്‍ട്ടിയ്ക്ക് വേണ്ടി മത്സരിച്ചപ്പോള്‍ പലതവണ പരാജയം നുണഞ്ഞ എച്ച്ഡി കുമാരസ്വാമി രണ്ടുതവണ മുഖ്യമന്ത്രിയായി അധികാരമേറ്റിട്ടുമുണ്ട്.
2006 ഫെബ്രുവരി മുതല്‍ 20 മാസക്കാലം ബി ജെ പിയുമായും 2018 മെയ് നിയമസഭാ തെരഞ്ഞെടുപ്പിന് ശേഷം 14 മാസക്കാലം കോണ്‍ഗ്രസുമായും ചേര്‍ന്ന് രണ്ട് ദേശീയ പാര്‍ട്ടികളുമായും ഒരു കൂട്ടുകക്ഷി സര്‍ക്കാരിന് കുമാരസ്വാമി നേതൃത്വം നല്‍കിയിരുന്നു.എന്നാല്‍ ഈ രണ്ട് തവണയും ഒരൊറ്റ കൊല്ലം വീതമായിരുന്നു മുഖ്യമന്ത്രി കസേരയില്‍ ഇരുന്നത്. പലവിധ പ്രശ്‌നങ്ങളും പാലം വലിക്കലുകളുമൊക്കെയായി കൂട്ടുകക്ഷി മുന്നണിയുടെ സര്‍ക്കാരുകള്‍ നിലംപൊത്തി. എന്നാല്‍ വരാനിരിക്കുന്ന അസംബ്ലി തെരഞ്ഞെടുപ്പില്‍ ഈ മുഖ്യകക്ഷികള്‍ക്ക് എതിരെ ഒറ്റയ്ക്ക് നിന്ന് പൊരുതാനാണ് പാര്‍ട്ടിയുടെ തീരുമാനം. അതിനായി തനിക്ക് ഒരു അവസരം കൂടി തരൂ എന്നാണ് പാര്‍ട്ടി അധ്യക്ഷന്‍ ആവശ്യപ്പെടുന്നത്. 1994-ല്‍ ഉണ്ടായിരുന്ന ജെഡിഎസ് എന്ന കരുത്തുറ്റ പാര്‍ട്ടിയായി വീണ്ടും പരിണമിക്കാനാണ് പുതിയ തന്ത്രങ്ങള്‍ പയറ്റുന്നത്. 
‘നായ കടിക്കുന്നതിനാണ് പരിഹാരം വേണ്ടത്, പേവിഷത്തിനല്ല; ഗോവൻ മാതൃക പരാജയം; മാസ് വാക്സിനേഷൻ ഒരു മറ മാത്രം; നായ്ക്കളെ വളർത്തി തെരുവിലിറക്കുന്ന വാക്സിൻ-മൃഗക്ഷേമ മാഫിയയെ ജനങ്ങൾ അറിയണം’: സാബു സ്റ്റീഫൻ സംസാരിക്കുന്നുസ്വാധീനമുള്ള വടക്കും കൈവിടുന്ന തെക്കും
ജെഡിഎസിന് വടക്കന്‍ കര്‍ണാടക പൊതുവേ വിശ്വസിക്കാവുന്ന തട്ടകമാണ്. 2018-ല്‍ പാര്‍ട്ടിക്ക് ആറ് എംഎല്‍എമാരെയാണ് ഈ മേഖല സമ്മാനിച്ചത്. എം. സി. മണഗുലിയുടെ മരണശേഷം എംഎല്‍എമാര്‍ അഞ്ചായി ചുരുങ്ങിയിരുന്നു. എന്നാല്‍ പാര്‍ട്ടിയുടെ ശ്രദ്ധ ഈ മേഖലയില്‍ വര്‍ധിപ്പിച്ചാല്‍ ഇനിയും വിജയം കൊയ്യാന്‍ സാധിച്ചേക്കും. ‘പഞ്ചരത്ന പദ്ധതി’ വടക്കന്‍ കര്‍ണാടകക്കാരുടെ മനസ്സിളക്കുമെന്ന പ്രതീക്ഷയിലാണ് നേതാക്കള്‍. യാദ്ഗിര്‍, നാഗ്തന്‍, ദേവര്‍ഹിപ്പര്‍ഗി തുടങ്ങിയ മണ്ഡലങ്ങളില്‍ പാര്‍ട്ടിയുടെ അടിത്തറ ശക്തമാണെന്ന് പറയാം.
വടക്കന്‍ കര്‍ണാടകയെ അപേക്ഷിച്ച് ജെഡിഎസ്സിന് വലിയ വെല്ലുവിളി ഉയരുന്നത് തെക്കന്‍ മേഖലയിലാണ്. കര്‍ണാടകയിലെ ആകെ ജനസംഖ്യയുടെ 15 ശതമാനം വരുന്നത് വൊക്കലിഗ സമുദായമാണ്. പഴയ മൈസൂര്‍ റിജീയന്‍ എന്ന് അറിയപ്പെടുന്ന തെക്കന്‍ഭാഗങ്ങളിലാണ് ഇവര്‍ കൂടുതലുമുള്ളത്. പാര്‍ട്ടിയ്ക്ക് വലിയ പിന്തുണ നല്‍കുന്ന വൊക്കലിഗ സമുദായക്കാര്‍ക്ക് ഇടയില്‍ 2019 മുതല്‍ പാര്‍ട്ടിയുടെ സ്വാധീനം കുറഞ്ഞുവരുന്നുവെന്നാണ് ജെഡിഎസിന്റെ കണ്ടെത്തല്‍. തുംകൂറില്‍ നിന്ന് ദേവഗൗഡയും മാണ്ഡ്യയില്‍ നിന്ന് പൗത്രന്‍ നിഖില്‍ ഗൗഡയും തോല്‍വിയുടെ രുചിയറിഞ്ഞത് ഇതിന് ഉദാഹരണമാണ്. എന്നാല്‍ ഹാസനില്‍ നിന്ന് ദേവഗൗഡയുടെ മറ്റൊരു പേരക്കുട്ടിയായ പ്രജ്വല്‍ രേവണ്ണ വിജയിച്ചിരുന്നു. തെക്കന്‍ മേഖലയായ കിട്ടൂര്‍ കര്‍ണാടകയിലും കല്യാണ്‍ കര്‍ണാടകയിലും വിജയിച്ചുകയറാനുള്ള ശേഷി ജെഡിഎസിനുണ്ടെന്നാണ് പാര്‍ട്ടി അധ്യക്ഷന്റെ അവകാശവാദം.
