ആറുവയസുകാരിയെ കെട്ടിത്തൂക്കിയത്; മരണവാ‍ര്‍ത്ത അറിഞ്ഞ് പൊട്ടിക്കരഞ്ഞ് ‘കൊലയാളി’; കൊല പീഡനത്തിനിടെ

വണ്ടിപ്പെരിയാർ: ചുരക്കുളം എസ്റ്റേറ്റിൽ ബാലികയെ മരിച്ച നിലയിൽ കണ്ടെത്തിയ സംഭവത്തിൽ വഴിത്തിരിവ്. കുട്ടിയുടെ മരണം കൊലപാതകമാണെന്നും കുട്ടിയെ പീഡനത്തിനു ശേഷം കെട്ടിത്തൂക്കിയതാണെന്നും പോലീസ് വ്യക്തമാക്കി. സംഭവത്തിൽ അർജുൻ (22) എന്ന യുവാവിനെ പോലീസ് അറസ്റ്റ് ചെയ്തിട്ടുമുണ്ട്.



കുട്ടി കളിക്കുന്നതിനിടെ ഷാൾ കഴുത്തിൽ കുരുങ്ങി മരിച്ചതെന്നായിരുന്നു ആദ്യ നിഗമനം. എന്നാൽ കുട്ടി പീഡിപ്പിക്കപ്പെട്ടിരുന്നതായി ഇടുക്കി മെഡിക്കൽ കോളേജിൽ നടത്തിയ പോസ്റ്റ്മോർട്ടം റിപ്പോർട്ടിൽ കണ്ടെത്തുകയായിരുന്നു. കഴിഞ്ഞ മാസം 30നായിരുന്നു കുട്ടിയെ എസ്റ്റേറ്റ് ലയത്തിലെ മുറിയിൽ കെട്ടിത്തൂക്കിയ നിലയിൽ കണ്ടെത്തിയത്. കുട്ടിയുടെ മരണം കൊലപാതകമാണെന്ന വിലയിരുത്തലിൽ നടത്തിയ അന്വേഷണത്തിൽ പ്രതിയായ യുവാവ് പിടിയിലാകുകയായിരുന്നു.

Also Read: രാജ്യത്ത് പ്രതിദിന കൊവിഡ് കേസുകൾ 40,000ത്തിൽ താഴെ; മരണസംഖ്യയിലും കുറവ്

എസ്റ്റേറ്റ് ലയത്തിലെ തന്നെ താമസക്കാരനാണ് പ്രതിയായ യുവാവും. ഇയാൾ കുട്ടിയെ ഏറെ നാളുകളായി പീഡിപ്പിച്ചിരുന്നെന്നാണ് റിപ്പോർട്ടുകൾ. കുട്ടിയുടെ വീട്ടിൽ ഏതു സമയത്തും കടന്നു ചെല്ലാനുള്ള സാഹചര്യം മുതലെടുത്ത് കുട്ടിയുടെ മാതാപിതാക്കള്‍ ജോലിയ്ക്കു പോയ സമയത്തായിരുന്നു പീഡനമെന്നാണ് പോലീസ് പറയുന്നത്. ജൂൺ 30ന് പീഡനത്തിനിടെ കുട്ടി ബോധരഹിതയായി നിലത്തു വീഴുകയായിരുന്നു. തുടര്‍ന്ന് കുട്ടി മരിച്ചെന്നു സംശയിച്ച പ്രതി കെട്ടിത്തൂക്കുകയായിരുന്നു.

അതേസമയം, കുട്ടിയുടെ മരണവാര്‍ത്ത പറഞ്ഞപ്പോള്‍ ഇയാള്‍ പൊട്ടിക്കരഞ്ഞെന്നു അയൽക്കാര്‍ പറഞ്ഞു. ഇയാള്‍ കുട്ടിയുടെ ശവസംസ്കാരത്തിലും പങ്കെടുത്തിരുന്നു.

Also Read: പാലായിൽ നിർണായകമായത് എന്ത്? കോട്ടയത്തെ തോൽവിക്ക് കാരണം ‘തിരുവഞ്ചൂർ തന്നെ’, സിപിഎം വിലയിരുത്തൽ

വീട്ടിൽ പഴക്കുല കെട്ടിത്തൂക്കിയിട്ടിരുന്ന കയറിൽ പിടിച്ചു കളിക്കുന്നതിനിടെ കയര്‍ കഴുത്തിൽക്കുരുങ്ങി കുട്ടി മരിക്കുകയായിരുന്നുവെന്നാണ് പോലീസ് ആദ്യം കരുതിയത്. എന്നാൽ അസ്വാഭാവിക മരണത്തിന് പോലീസ് അന്നു തന്നെ കേസെടുത്തിരുന്നു. കുട്ടി പീഡിപ്പിക്കപ്പെട്ടിരുന്നതായി ഡോക്ടറിൽ നിന്നു മനസ്സിലാക്കിയ പോലീസ് രഹസ്യമായി അന്വേഷണം നടത്തുകയും ചെയ്തിരുന്നു. കേസിൽ ഇയാള്‍ ഉള്‍പ്പെടെ നാലു പേരെ പോലീസ് മുൻപ് ചോദ്യം ചെയ്യുകയും ചെയ്തിരുന്നു.