‘മുകേഷേട്ടനെ ഇഷ്ടമുള്ളത് കൊണ്ടാണ് വിളിച്ചത്’: ഫോൺ ചെയ്ത വിദ്യാര്‍ഥിയെ തിരിച്ചറിഞ്ഞു

പാലക്കാട്: കൊല്ലം എംഎൽഎ മുകേഷിനെ ഫോണിൽ വിളിച്ച കുട്ടിയെ തിരിച്ചറിഞ്ഞു. പാലക്കാട് ഒറ്റപ്പാലം മീറ്റ്‌ന സ്വദേശിയായ വിഷ്ണു നാരായണൻ എന്ന പത്താം ക്ലാസ് വിദ്യാർഥിയാണ് എംഎൽഎയെ ഫോണിൽ വിളിച്ചത്. സുഹൃത്തിൻ്റെ ഓൺലൈൻ പഠനത്തിന് സഹായം ചോദിച്ചാണ് ഫോൺ ചെയ്തത്. സിനിമ നടൻ കൂടിയായ എംഎൽഎ സഹായിക്കുമെന്ന് കരുതിയാണ് ഫോൺ ചെയ്തത്. അതുകൊണ്ട് തന്നെയാണ് ഫോൺ കോൾ റെക്കോർഡ് ചെയ്തതെന്നും കുട്ടി വിവിധ മാധ്യമങ്ങളോട് വ്യക്തമാക്കി.



‘ഫോൺ നമ്പർ വെളിപ്പെടുത്താതെ മുകേഷ്, വിദ്യാർഥിയെ കണ്ടെത്താനായിട്ടില്ല’: പരാതി നൽകുമെന്ന സൂചന നൽകി എംഎൽഎ

എംഎൽഎയെ ഫോണിൽ വിളിച്ചത് താൻ തന്നെയാണ് കുട്ടി ഏഷ്യാനെറ്റ് ന്യൂസിനോട് പറഞ്ഞു. ഫോൺ വിളി ഇത്രയും വിവാദമാകുമെന്ന് കരുതിയില്ല. അദ്ദേഹം ശകാരിച്ചതിൽ പരാതിയില്ല. ഓൺലൈൻ ക്ലാസിൽ പങ്കെടുക്കാൻ സുഹൃത്തിന് ഫോൺ ഇല്ലെന്ന് വ്യക്തമാക്കി ടീച്ചർ വോയിസ് പങ്കുവച്ചിരുന്നു. മുകേഷിനെ ഇഷ്ടമുള്ളത് കൊണ്ടാണ് അദ്ദേഹത്തെ ഫോണിൽ വിളിച്ചത്. നിലവിലെ വിവാദം അവസാനിക്കുമെന്നാണ് കരുതുന്നതെന്നും വിഷ്ണു നാരായണൻ പറഞ്ഞു.

സിപിഎം അനുഭാവികളാണ് കുട്ടിയുടെ കുടുംബം. ബാലസംഘത്തിന്‍റെ നേതാവാണ് വിഷ്ണു നാരായണൻ. പ്രശ്നം പരിഹരിച്ചെന്ന് ഒറ്റപ്പാലം മുന്‍ എംഎല്‍എ എം ഹംസ വ്യക്തമാക്കി. വിഷയം കോൺഗ്രസ് ഏറ്റെടുത്തതോടെ ഫോൺ വിളി വിവാദത്തിൽ സിപിഎം ഇടപെടുകയായിരുന്നു.

വിദ്യാർത്ഥിയോട് കയർത്ത് സംസാരിച്ച സംഭവം; മുകേഷിനെതിരെ ബാലാവകാശ കമ്മീഷന് പരാതി

അതേസമയം, വിദ്യാർഥിയെ ഉപയോഗിച്ച് ഗൂഢാലോചന ഉണ്ടെന്ന് മുകേഷ് ആരോപിച്ചിരുന്നു. ഇതിന് പിന്നിൽ രാഷ്ട്രീയമുണ്ടെന്നും അദ്ദേഹം വ്യക്തമാക്കിയിരുന്നു. ഫോൺ വിളിക്ക് പിന്നിൽ പ്രവർത്തിച്ചവരെ കണ്ടെത്താൻ പോലീസിനും സൈബർ സെല്ലിനും പരാതി നൽകിയേക്കുമെന്നാണ് എംഎൽഎ സൂചന നൽകിയിരുന്നു. ഫിഷറീസ് വകുപ്പിൻ്റെ യോഗത്തിൽ പങ്കെടുത്ത് സംസാരിക്കുന്നതിനിടെയാണ് പത്താം ക്ലാസ് വിദ്യാർഥിയെന്ന് പരിചയപ്പെടുത്തിയ കുട്ടി എംഎൽഎയെ തുടർച്ചയായി ഫോണിൽ വിളിച്ചത്.