റദ്ദാക്കിയ വിവാദ ഐടി നിയമമായ 66എ ഉപയോഗിച്ച് ഇപ്പോഴും രാജ്യത്തെ വിവിധ പോലീസ് സ്റ്റേഷനുകളിൽ എഫ്ഐആറുകള്‍ രജിസ്റ്റര്‍ ചെയ്യുന്നുണ്ടെന്നും ഇവയുടെ വിവരങ്ങള്‍ ലഭ്യമാക്കണമെന്ന് കേന്ദ്രത്തോട് ആവശ്യപ്പെടണമെന്നും ഹര്‍ജിക്കാര്‍ ആവശ്യപ്പെട്ടു.
സുപ്രീം കോടതി Photo: The Times of India/File
ഹൈലൈറ്റ്:
- രൂക്ഷവിമര്‍ശനവുമായി സുപ്രീം കോടതി
- കോടതികളിൽ നിരവധി കേസുകള്‍ കെട്ടിക്കിടക്കുന്നു
- കേസെടുത്തത്തത് ഐടി നിയമത്തിലെ 66എ വകുപ്പ് ഉപയോഗിച്ച്
അതേസമയം, കുറ്റകരമായ കാര്യങ്ങള്‍ എന്തൊക്കെയാണെന്ന് നിയമത്തിൽ വ്യക്തമാകാത്ത സാഹചര്യത്തിൽ നിയമത്തിനെതിരെ കടുത്ത ആരോപണങ്ങളായിരുന്നു ഉയര്‍ന്നത്. ഇതേത്തുടര്‍ന്ന് ഏഴു വര്‍ഷം മുൻപ് നിയമം റദ്ദാക്കുകയും ചെയ്തിരുന്നു. നിയമം ഭരണഘടനാവിരുദ്ധവും അവ്യക്തവുമാണെന്നും ആവിഷ്കാര സ്വാതന്ത്ര്യത്തിന് എതിരാണെന്നും കാണിച്ചായിരുന്നു 2015 മാര്‍ച്ച് 24ന് സുപ്രീം കോടതി നിയമം റദ്ദാക്കിയത്.
Also Read: മനുഷ്യാവകാശ പ്രവര്‍ത്തകൻ ഫാ. സ്റ്റാൻ സ്വാമി അന്തരിച്ചു; അന്ത്യം ജാമ്യാപേക്ഷ പരിഗണിക്കാനിരിക്കേ
റദ്ദാക്കിയ നിയമം ഉപയോഗിച്ച് കേസെടുക്കുന്ന സംഭവം ഞെട്ടിക്കുന്നതാണെന്നും വിഷയത്തിൽ നോട്ടീസ് അയയ്ക്കുമെന്നും സുപ്രീം കോടതി വ്യക്തമാക്കി. ജസ്റ്റിസ് ആര്‍ നരിമാൻ, കെഎം ജോസഫ്, ബിആര്‍ ഗവായ് എന്നിവരടങ്ങിയ ബെഞ്ചിൻ്റേതാണ് നിര്‍ദേശം. സംഭവത്തിൽ രണ്ടാഴ്ചയ്ക്കകം വിശദീകരണം നല്‍കണമെന്നും കോടതി കേന്ദ്രസര്‍ക്കാരിനോടു ആവശ്യപ്പെട്ടിട്ടുണ്ട്. ഭീകരമായ സംഭവങ്ങളാണ് നടക്കുന്നതെന്നു പറഞ്ഞ കോടതി നിയമനടപടികള്‍ ആശ്ചര്യജനകമാണെന്നും പ്രതികരിച്ചു.
പീപ്പിള്‍സ് യൂണിയൻ ഫോര്‍ സിവിൽ ലിബര്‍ട്ടീസ് എന്ന സന്നദ്ധ സംഘടനയാണ് വിഷയത്തിൽ ഹര്‍ജി സമര്‍പ്പിച്ചത്. ഈ വകുപ്പ് ഉപയോഗിച്ച് കേസെടുക്കരുതെന്ന് എല്ലാ പോലീസ് സ്റ്റേഷനുകള്‍ക്കും നിര്‍ദേശം നല്‍കണമെന്നും കോടതി സര്‍ക്കാരിനോടു ആവശ്യപ്പെട്ടു. നിരോധിച്ച നിയമങ്ങള്‍ ഉപയോഗിച്ച് കേസെടുക്കുന്നതു വഴി ആളുകള്‍ സഹിക്കുകയാണെന്നും ഇത്തരത്തിലുള്ള എഫ്ഐആറുകളുടെ കണക്കെടുക്കാൻ കേന്ദ്രത്തോട് ആവശ്യപ്പെടണമെന്നും ഹര്‍ജിക്കാര്‍ ആവശ്യപ്പെട്ടു.
66എ വകുപ്പ് റദ്ദാക്കുന്നതു വരെ മൊത്തം 229 കേസുകളായിരുന്നു കോടതികള്‍ക്ക് മുന്നിൽ ഉണ്ടായിരുന്നതെന്നും എന്നാൽ ഇപ്പോള്‍ 1307 കേസുകള്‍ പുതുതായി രജിസ്റ്റര്‍ ചെയ്തിട്ടുണ്ടെന്നും ഹര്‍ജിക്കാര്‍ ചൂണ്ടിക്കാട്ടി. മഹാരാഷ്ട്ര, ജാര്‍ഖണ്ഡ്, ഉത്തര്‍ പ്രദേശ്, രാജസ്ഥാൻ എന്നീ സംസ്ഥാനങ്ങളിലാണ് ഭൂരിഭാഗം കേസുകളും രജിസ്റ്റര്‍ ചെയ്തിട്ടുള്ളത്.
മുഹമ്മദിന് സഹായപ്രവാഹം; ഇതുവരെയെത്തിയത് 14കോടി
Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
ഏറ്റവും പുതിയ വാർത്തകൾ അതിവേഗം അറിയാൻ Samayam Malayalam ഫേസ്ബുക്ക് പേജ് ലൈക്ക് ചെയ്യൂ
Web Title : supreme court asks central govt to respond as petitioners says firs still filed using it act section 66a
Malayalam News from malayalam.samayam.com, TIL Network
