‘എങ്ങനെ ബോംബുണ്ടാക്കാം’; പോപ്പുലർ ഫ്രണ്ട് റെയ്ഡിൽ പിടിച്ചെടുത്തത് കൈപ്പുസ്തകവും ജിപിഎസ് നാവി​ഗേറ്ററും വാക്കി ടോക്കിയും

എൻഐഎ അടക്കമുള്ള കേന്ദ്ര ഏജൻസികൾ നടത്തിയ പരിശോധനയിൽ നിർണായക രേഖകളും മറ്റും കണ്ടെത്തിയിട്ടുണ്ട്. ദേശീയ മാധ്യമമായ ഇന്ത്യാ ടുഡെയാണ് ഇത് സംബന്ധിച്ചുള്ള റിപ്പോർട്ട് ചെയ്തിരിക്കുന്നത്.

സെപ്റ്റംബർ 22ന് 15 സംസ്ഥാനങ്ങളിലായി എൻഫോഴ്സ്മെന്റ് ഡയറക്ടറേറ്റും എൻഐഎയും ചേർന്ന് നടത്തിയ പരിശോധനയിൽ 106 പേരെയാണ് അറസ്റ്റ് ചെയ്തത്. എട്ട് സംസ്ഥാനങ്ങളിലുള്ള രണ്ടാം ഘട്ട പരിശോധന വെള്ളിയാഴ്ചയാണ് പൂർ‌ത്തിയായത്. ഈ പരിശോധനയിൽ നിരീക്ഷണ ഉപകരണങ്ങളും സ്ഫോടകവസ്തുക്കൾ ഉണ്ടാക്കുന്നതിനുള്ള മാർഗനിർദേശം നൽകുന്ന കൈപ്പുസ്തകവും അടക്കമുള്ള വസ്തുക്കൾ കണ്ടെത്തിയിട്ടുണ്ടെന്നാണ് റിപ്പോർട്ട്. ഇതിന്റെ പകർപ്പ് ദേശീയ മാധ്യമം പ്രസിദ്ധീകരിക്കുകയും ചെയ്തിട്ടുണ്ട്.

ഉത്തർപ്രദേശിലെ പിഎഫ്ഐ നേതാക്കളായ മുഹമ്മദ് നദ്ദീം, അഹമ്മദ് ബെഗ് നദ്വി എന്നിവരുടെ പക്കൽ നിന്നും സ്ഫോടക വസ്തുവായ ഇംപ്രൊസീവ്ഡ് എക്സ്പ്ലോസീവ് ഡിവൈസ് അഥവ ഐഇഡി ഉണ്ടാക്കുന്നതിനുള്ള സഹായി കണ്ടെത്തിയിരുന്നു. ‘എളുപ്പത്തിൽ ലഭ്യമായ സാമഗ്രികൾ ഉപയോഗിച്ച് ഐഇഡികൾ എങ്ങനെ നിർമ്മിക്കാം എന്നതിനെക്കുറിച്ചുള്ള ഒരു ചെറിയ കോഴ്‌സ്’ എന്ന തലക്കെട്ടോടെയുള്ള രേഖകൾ കണ്ടെത്തിയിട്ടുണ്ട്. അതിന് പുറമെ, വിശ്വാസികൾ അല്ലാത്തവർക്കെതിരെ പോരാടുന്നതിന് ആഹ്വാനം ചെയ്തുള്ള രേഖകളും കണ്ടെത്തിയിട്ടുണ്ട്.

രേഖകൾക്ക് പുറമെ വാക്കി ടോക്കി അടക്കമുള്ള ഉപകരണങ്ങളും കണ്ടെത്തിയിട്ടുണ്ട്. രണ്ട് ലോറൻസ് എൽഎച്ച്ആർ – 80 എന്ന ഹാൻഡ് റേഡിയോ തമിഴ്നാട്ടിലെ രാമനാഡ് ജില്ലയിലുള്ള എസ്ഡിപിഐ ജില്ലാ പ്രസിഡന്റിൻ്റെ വസതിയിൽ നിന്നും കണ്ടെത്തിയിട്ടുണ്ട്. അതിന് പുറമെ, ജിപിഎസ് നവിഗേറ്ററും കണ്ടെത്തിയിട്ടുണ്ട്.

അതിന് പുറമെ, ബെംഗളൂരുവിലെ പോപ്പുലർ ഫ്രണ്ട് നേതാവ് ഷാഹിദ് ഖാന്റെ പക്കൽ നിന്നും കണക്കിൽപെടാത്ത പണവും കേന്ദ്ര ഏജൻസികൾ കണ്ടെത്തിയിട്ടുണ്ട്.

Also Read : സിമിയുടെ നിരോധനത്തിന്റെ 21ാം വാർഷികത്തിൽ പോപ്പുലർ ഫ്രണ്ടിനും നിരോധനം; ഇനിയെന്ത്?

രാജ്യത്തിന്റെ അഖണ്ഡതയ്ക്കും പരമാധികാരത്തിനും സുരക്ഷയ്ക്കും വിരുദ്ധമായി സമാധാനത്തിന്റെയും സാമുദായിക സൗഹാർദ്ദത്തിന്റെയും അന്തരീക്ഷം തകർക്കുന്നതിനും ഭീകരവാദ പ്രവർത്തനങ്ങളെ പ്രോത്സാഹിപ്പിക്കുന്നതുമായ നിയമവിരുദ്ധ പ്രവർത്തനങ്ങളിൽ ഏർപ്പെടുന്നുവെന്നും അന്വേഷണ ഏജൻസികൾ കണ്ടെത്തിയിരുന്നു.