1. പച്ചിലക്കറികള്‍ കഴിക്കാം
നല്ല പച്ച നിറത്തിലുള്ള ഇലകള്‍ സാലഡില്‍ ചേര്‍ത്തും കറിവെച്ചും ആഹാരത്തില്‍ ചേര്‍ത്ത് കഴിക്കവുന്നതാണ്. പ്രത്യേകിച്ച് ചീര, ഉലുവയുടെ ഇല, റാഡിഷ് ഇലകള്‍, ലെറ്റൂസ് എന്നിവയെല്ലാം കഴിക്കുന്നത് ഹൃദയത്തിന്റെ ആരോഗ്യത്തിന് നല്ലതാണ്. ഇതില്‍ ഫാറ്റ് വളരെ കുറവാണ്. കൂടാതെ, പെട്ടെന്ന് ദഹനത്തിന് സഹായിക്കുന്ന നാരുകളും ധാരാളം അടങ്ങിയിട്ടുണ്ട്. കാല്‍സ്യം, പൊട്ടാസ്യം, കാലറീസ്, മഗ്നീഷ്യം, ഫോളിക് ആസിഡ് എന്നിവയാല്‍ സമ്പുഷ്ടമാണ് ഈ ഇലകള്‍. ഇത് ഹൃദയാരോഗ്യത്തിന് നല്ലതാണെന്ന് പല പഠനങ്ങളിലും തെളിയിക്കപ്പെട്ടിട്ടുള്ളതാണ്.
2. ഓട്‌സ്
ഇന്ന് മിക്കവരും കഴിക്കുന്ന ഒന്നാണ് ഓട്‌സ്. ഓട്‌സ് ശരീരത്തിലെ ചീത്ത കൊളസ്‌ട്രോള്‍ കുറയ്ക്കുന്നതിനും ഹൃദയത്തിന്റെ ആരോഗ്യം സംരക്ഷിക്കുന്നതിനും സഹായിക്കുന്നു. ഇതില്‍ അടങ്ങിയിരിക്കുന്ന ബീറ്റ ഗ്ലൂകന്‍, ദഹിക്കുന്ന നാരുകള്‍ എന്നിവയാണ് ചീത്ത കൊളസ്‌ട്രോള്‍ കുറയ്ക്കാന്‍ സഹായിക്കുന്നത്. അതിനാല്‍ തന്നെ ഹൃദയത്തിന്റെ ആരോഗ്യത്തെ നല്ലരീതിയില്‍ സംരക്ഷിക്കുന്നു.
3. സോയ് പ്രോട്ടീന്‍
നമ്മളുടെ മാര്‍ക്കറ്റില്‍ ലഭ്യമായിട്ടുള്ള സോയാബീന്‍, സോയ ചങ്ക്‌സ് എന്നിവ ഹൃദയത്തിന്റെ ആരോഗ്യത്തിന് വളരെ നല്ലതാണ്. ഹൃദയത്തിന്റെ ആരോഗ്യത്തിന് റെഡ് മീറ്റ് കഴിക്കുന്നത് നല്ലതല്ല എന്ന് നമുക്ക് അറിയാം. എന്നാല്‍, റെഡ്മീറ്റിന്റെ നല്ല ഗുണങ്ങള്‍ നമ്മളുടെ ശരീരത്തില്‍ ലഭിക്കാന്‍ സഹായിക്കുന്ന ഒന്നാണ് സോയ്. സോയ ചങ്ക്‌സ് കഴിക്കുന്നതിലൂടെ ശരീരത്തിലെ ചീത്ത കൊളസ്‌ട്രോള്‍ കുറയ്ക്കാന്‍ സഹായിക്കുന്നതാണ്.
4. ഒലീവ് ഓയില്‍
സാധാരണ ഗതിയില്‍ ഉപഗോയിക്കുന്ന ഓയിലിനു പകരം ഒലീവ് ഓയില്‍ പാചകത്തിനും മറ്റുമായി ഉപയോഗിക്കുന്നത് വളരെ നല്ല കാര്യമാണ്. ഇത് ശരീരത്തിലെ ചീത്ത കൊളസ്‌ട്രോള്‍ കുറയ്ക്കാന്‍ സഹായിക്കും. ഇതില്‍ അടങ്ങിയിരിക്കുന്ന നല്ല കൊഴുപ്പ് ഹൃദയത്തിന്റെ ആരോഗ്യത്തിന് നല്ലതാണ്. ആന്റിഓക്‌സിഡന്റ്‌സും പോളിഫെനോള്‍സും അടങ്ങിയിരിക്കുന്നതിനാലും ഹൃദയത്തെ സംരക്ഷിക്കാന്‍ ഒലീവ് ഓയില്‍ നല്ലതാണ്.
5. ആപ്പിള്‍
ദിവസേന ആപ്പിള്‍ കഴിച്ചാല്‍ ഡോക്ടറെ കാണേണ്ട ആവശ്യം വരില്ല എന്നണ് പറയുക. അത്രയ്ക്കും ഗുണങ്ങളാണ് ആപ്പിള്‍ കഴിക്കുന്നതിലൂടെ നമുക്ക് ലഭിക്കുന്നത്. ഇതിലെ ആന്റി- ഇന്‍ഫ്‌ലമേറ്ററി ഘടകങ്ങളും ഫോട്ടോകെമിക്കല്‍സും ആപ്പിളിന്റെ ആരോഗ്യ ഗുണം വര്‍ദ്ധിപ്പിക്കുകയാണ്. ഇത് രക്തം കട്ടപിടിക്കുന്നത് തടയുന്നതിനും സഹായിക്കുന്നു. അതിനാല്‍ ഹൃദ്രോഗികള്‍ക്ക് അപ്പിള്‍ നല്ലതാണ്.
6. തക്കാളി
മിക്ക വീടുകളിലും ഉണ്ടാകാന്‍ സാധ്യതയുള്ള ഒരു പച്ചക്കറിയാണ് തക്കാളി. ഇതില്‍ ധാരാളം വിറ്റാമിന്‍സ് അടങ്ങിയിട്ടുണ്ട്. സ്ഥിരമായി തക്കാളി ആഹാരത്തില്‍ ഉള്‍പ്പെടുത്തുന്നതിലൂടെ രക്തം ശുദ്ധീകരിച്ച് കിട്ടുകയും ഹൃദയ സംബന്ധമായ അസുഖങ്ങള്‍ വരാനുള്ള സാധ്യത കുറയ്ക്കുകയും ചെയ്യുന്നു. കൂടാതെ, തക്കാളിയില്‍ അടങ്ങിയിരിക്കുന്ന വിറ്റാമിന്‍ കെ മൂലക്കുരു പോലെയുള്ള ആരോഗ്യ പ്രശ്‌നങ്ങള്‍ക്കും പരിഹാരമാണ്. അതിനാല്‍, തക്കാളി പല വിധത്തില്‍ ഒരു നേരമെങ്കിലും ആഹാരത്തില്‍ ചേര്‍ക്കുന്നത് നല്ലതാണ്.
