സെപ്റ്റംബര്‍ 29നാണ് ലോക ഹൃദയ ദിനം ആഘോഷിക്കുന്നത്. പ്രായമായവരില്‍ മാത്രം കണ്ടിരുന്ന ഹൃദയാഘാതം ഇപ്പോള്‍ പ്രായഭേദമന്യേ എല്ലാവര്‍ക്കും വരുന്ന കാലഘട്ടമാണിത്. ശരീരത്തിലെ എല്ലാ ഭാഗങ്ങളിലേക്കും രക്തം ശുദ്ധീകരിച്ച് പമ്പ് ചെയ്യുകയാണ് ഹൃദയത്തിന്റെ പ്രധാന ധര്‍മ്മം. ഹൃദ്രോഗ സാധ്യത കുറയ്ക്കാന്‍ ഭക്ഷണങ്ങള്‍ വഹിക്കുന്ന പങ്ക് വളരെ വലുതാണ്. ജീവിതശൈലിയില്‍ വരുന്ന മാറ്റങ്ങളും വ്യായാമ കുറവുമാണ് പൊതുവെ ഹൃദയാഘാതത്തിനും ഹൃദ്രോഗത്തിനും കാരണമാകുന്നത്. എന്നാല്‍ കഴിഞ്ഞ കുറച്ച് നാളുകളായി കൃത്യമായ വ്യായാമവും ജീവിത ശൈലിയും പിന്തുടര്‍ന്നിട്ടും നിരവധി പേര്‍ ഹൃദയാഘാതത്തെ തുടര്‍ന്ന് മരിച്ച വാര്‍ത്തകള്‍ പുറത്ത് വന്നിരുന്നു.
എന്തുകൊണ്ടാണ് ഇങ്ങനെ സംഭവിക്കുന്നത് എന്ന ആശങ്ക പലരിലും ഉണ്ട്. പ്രശസത് പിന്നണി ഗായകനായ കൃഷ്ണകുമാര്‍ കുന്നത്, കന്നഡ സിനിമ നടനായ പുനിത് രാജ്കുമാര്‍, ഹിന്ദി നടനും മോഡലുമായിരുന്ന സിദ്ധാര്‍ത്ഥ് ശുക്ല ഏറ്റവും ഒടുവില്‍ ഹിന്ദി നടന്‍ രാജു ശ്രീവാസ്ത മരണപ്പെട്ടതും ഹൃദയാഘാതം മൂലമായിരുന്നു. കബഡി കളിക്കിടയിലും വേദിയില്‍ നൃത്തം അവതരിപ്പിക്കുന്നതിനിടയിലുമൊക്കെ പല ചെറുപ്പക്കാരും ഹൃദയാഘാതം മൂലം മരിച്ച വീഡിയോകളും സോഷ്യല്‍ മീഡിയയില്‍ പ്രചരിച്ചിരുന്നു. ഈ സംഭവങ്ങളില്‍ എല്ലാ ആളുകളെ അത്ഭുതപ്പെടുത്തിയത് എന്താണെന്ന് വച്ചാല്‍, ഇവരില്‍ പലരും താരതമേന്യ ഫിറ്റായ ശരീര പ്രകൃതമുള്ളവരായിരുന്നു. എന്തുകൊണ്ടാണ് ഇത്തരത്തില്‍ സംഭവിക്കുന്നത്. എന്തൊക്കെ മാറ്റങ്ങളാണ് വ്യായാമയത്തില്‍ വരുത്തേണ്ടത്.
അധികമായാല്‍ അമൃതും വിഷം
എത്ര അധികം വ്യായാമം ചെയ്യുന്നോ അത്രയും നല്ലതെന്ന് ചിന്തിക്കുന്നവരാണ് പലരും. പക്ഷെ അതൊരു തെറ്റായ പ്രവണതയാണെന്നാണ് വിദഗ്ധര്‍ അഭിപ്രായപ്പെടുന്നത്. ചുരുങ്ങിയ സമയത്തിനുള്ളില്‍ അമിതമായ വ്യായാമത്തില്‍ ഏര്‍പ്പെടരുതെന്ന് ആരോഗ്യ വിദഗ്ധര്‍ ശുപാര്‍ശ ചെയ്യുന്നുണ്ട്. 30നും 40നും ഇടയില്‍ പ്രായമുള്ള ആളുകള്‍ ശാരീരകമായി യാതെരു പ്രവര്‍ത്തനങ്ങളും ചെയ്യാതെ ഇരുന്നിട്ട് പെട്ടെന്ന് അധിക വ്യായാമം ചെയ്യുന്നത് ദോഷം ചെയ്യും. വേഗത്തില്‍ ഫിറ്റാകാനുള്ള ശ്രമത്തിന്റെ ഭാഗമാണിത്. ചുരുങ്ങിയ സമയത്തിനുള്ളില്‍ ഇത്തരത്തില്‍ കഠിനമായ വ്യായാമം ചെയ്യുന്നവര്‍ വളരെയധികം ശ്രദ്ധിക്കണമെന്നും അവര്‍ അഭിപ്രായപ്പെടുന്നു.
ഏതെങ്കിലും വ്യായാമം ചെയ്യുമ്പോള്‍ ഓക്കാനം, തലകറക്കം അല്ലെങ്കില്‍ കുഴഞ്ഞ് വീഴുകയോ ചെയ്താല്‍ അപ്പോള്‍ തന്നെ ആ വ്യായാമം നിര്‍ത്തേണ്ടതാണ്.
വ്യായമത്തിനിടയിലെ ഹൃദയാഘാതം ഒഴിവാക്കാന്‍ ഇവ ശ്രദ്ധിക്കാം.
- നിങ്ങള്‍ 30 വയസ് കഴിഞ്ഞവരാണെങ്കില്‍ വാം അപ്പ് (warm up) അല്ലെങ്കില്‍ ക്ലൂള്‍ ഡൗണ്‍ (cool down) എന്നീ പ്രവര്‍ത്തനങ്ങള്‍ക്ക് കുറച്ച് കൂടുതല്‍ സമയം എടുക്കാം. കാരണം ചെറുപ്പക്കാരെ അപേക്ഷിച്ച് ഈ പ്രായാക്കാര്‍ക്ക് ഈ ശരീരം ശരിയാക്കാന്‍ അല്‍പ്പം കൂടുതല്‍ സമയമെടുത്തേക്കാം.
- കഠിനമായ ചൂടില്‍ വര്‍ക്കൗട്ട് ചെയ്യുന്നത് കുറയ്ക്കുക
- നിങ്ങള്‍ ചെയ്യുന്ന വര്‍ക്കൗട്ടില്‍ നിങ്ങള്‍ സംതൃപ്തരായിരിക്കണം. മറ്റുള്ളവര്‍ പറയുന്നത് അനുസരിച്ച് അധിക വ്യായാമം ചെയ്യരുത്. പലപ്പോഴും ഇത് പ്രശ്‌നങ്ങളുണ്ടാക്കും.
ആരോഗ്യകരമായ ഹൃദയത്തിന് എന്തൊക്കെ വേണം
വേഗത്തിലുള്ള നടത്തം, ജോഗിംഗ്, സൈക്ലിംഗ്, ആഴ്ചയില്‍ രണ്ട് മണിക്കൂര്‍ നീന്തല്‍ എന്നിവ ഉള്‍പ്പെടുന്ന മിതമായ വ്യായാമം ഹൃദയത്തിന്റെ ആരോഗ്യം നിലനിര്‍ത്താന്‍ പര്യാപ്തമാണെന്ന് വിദഗ്ധര്‍ അഭിപ്രായപ്പെടുന്നു. നിങ്ങളുടെ കുടുംബത്തില്‍ ആര്‍ക്കെങ്കിലും ഹൃദ്രോഗം ഉണ്ടെങ്കില്‍ നിങ്ങള്‍ ഒരിക്കലും കഠിനമായ വ്യായാമത്തില്‍ ഏര്‍പ്പെടരുതെന്നും വിദഗ്ധര്‍ നിര്‍ദ്ദേശിക്കുന്നു.
ഹൃദയാഘാതവും കുടുംബ ചരിത്രവും
കുടുംബത്തില്‍ ആര്‍ക്കെങ്കിലും ഹൃദ്രോഗമുണ്ടെങ്കില്‍ അത് എങ്ങനെ ഒരാളെ ബാധിക്കുമെന്ന് പലര്‍ക്കും അറിയില്ല. ഇതേക്കുറിച്ച് കൂടുതല്‍ പഠിക്കുന്നതിലൂടെ നിങ്ങളുടെ ശരീരത്തിന് എത്രത്തോളം വ്യായാമം അല്ലെങ്കില്‍ ഭാരം എടുക്കാന്‍ കഴിയുമെന്ന് തിരിച്ചറിയാന്‍ സാധിക്കും.
ഹൃദ്രോഗത്തിന്റെ കുടുംബ ചരിത്രമുള്ളവരില്‍ കുറഞ്ഞത് 50 മുതല്‍ 60% വരെ ഹൃദ്രോഗ സാധ്യത കൂടുതലാണെന്ന് ആരോഗ്യ വിദഗ്ധര്‍ സ്ഥിരീകരിക്കുന്നു. 55 വയസ്സില്‍ താഴെ പ്രായമുള്ള അച്ഛനോ സഹോദരനോ തുടങ്ങി നിങ്ങളുടെ ബന്ധുക്കളായ പുരുഷന്മാരില്‍ ആര്‍ക്കെങ്കിലും ഹൃദ്രോഗം ഉണ്ടായിട്ടുണ്ടെങ്കിലോ അല്ലെങ്കില്‍ 65 വയസ്സില്‍ താഴെ പ്രായമുള്ള സ്ത്രീ ബന്ധുവിന് ഹൃദ്രോഗം ഉണ്ടായാല്‍ ഈ അപകട ഘടകം കൂടുതല്‍ വര്‍ദ്ധിക്കുന്നു.
ഹൃദയാഘാതം – സാധാരണയായുള്ള അപകട ഘടകങ്ങള്‍
എന്ത് കാരണം കൊണ്ടാണ് ഹൃദയാഘാതം ഉണ്ടാകുന്നതെന്ന് ഉറപ്പിച്ച് പറയാന്‍ വളരെ പ്രയാസമാണ്. വിമാനത്തില്‍ യാത്ര ചെയ്യുമ്പോഴോ ജിമ്മില്‍ കാര്‍ഡിയോ ചെയ്യുമ്പോഴോ പാര്‍ക്കില്‍ നിന്ന് വേഗത്തില്‍ നടന്ന് വീട്ടിലെത്തിയതിനു ശേഷമോ ആളുകള്‍ ഹൃദയാഘാതം മൂലം മരിക്കുന്നുണ്ട്.
കാരണങ്ങള്‍ നിര്‍ണ്ണയിക്കാന്‍ കഴിയില്ലെങ്കിലും പുകവലി, പ്രമേഹം, ഉയര്‍ന്ന ബിപി, ഉയര്‍ന്ന കൊളസ്‌ട്രോള്‍, അമിതഭാരം, അമിതമായ മദ്യപാനം, സൂക്ഷിച്ചുവെച്ച ഭക്ഷണത്തിന്റെ അമിത ഉപഭോഗം, ശാരീരിക പ്രവർത്തനങ്ങൾ ഇല്ലാത്തത് ഇതിൻ്റെ ഘടകങ്ങളായി പറയുന്നുണ്ട്.
എന്ത് വ്യായാമം ആണ് ചെയ്യേണ്ടത്?
നിങ്ങള്‍ ജിമ്മില്‍ വ്യായാമം ചെയ്യുമ്പോള്‍ കാര്‍ഡിയോ ആണോ ശക്തി പരിശീലനമാണോ ചെയ്യേണ്ടത് എന്നാണ് പലര്‍ക്കും സംശയം. രണ്ട് വ്യായാമ രീതികള്‍ക്കും വ്യത്യസ്തമായ ഗുണങ്ങളാണ് ഉള്ളത്. ആരോഗ്യവും ഫിറ്റ്‌നെസും നിലനിര്‍ത്താന്‍ ഇവ രണ്ടും ചേര്‍ന്നുള്ള സുഖപ്രദമായ വ്യായാമങ്ങള്‍ ചെയ്യാനാണ് വിദഗ്ധര്‍ നിര്‍ദ്ദേശിക്കുന്നത്.
