എന്താണ് സാംക്രമിക രോഗങ്ങള്‍ ?
രോഗബാധിതരായ വ്യക്തിയില്‍ നിന്നാണ് പൊതുവെ ഗുരുതരമായ സാംക്രമിക രോഗങ്ങള്‍ പടരുന്നത്. മലിനമായ വെള്ളം, ഭക്ഷണം അല്ലെങ്കില്‍ വായു, പ്രാണികളുടെ കടി, ശരീര സ്രവങ്ങള്‍ എന്നിവയുമായി നേരിട്ടുള്ള സമ്പര്‍ക്കത്തിലൂടെയാണ് ഇത് പകരുന്നത്. ഗര്‍ഭ കാലത്ത് ഏതെങ്കിലും രോഗത്തിന് ഇരയാകുന്നത് അമ്മയ്ക്കും കുഞ്ഞിനും സങ്കീര്‍ണമാണ്.
ഗര്‍ഭകാലത്ത് സ്ത്രീകളുടെ ശരീരത്തിലുണ്ടാകുന്ന മാറ്റങ്ങള്‍ പലപ്പോഴും അവരുടെ രോഗപ്രതിരോധ ശേഷി കുറയ്ക്കുന്നു. അമ്മയ്ക്ക് രോഗം വരുന്നതോടെ അത് വയറ്റില്‍ വളരുന്ന കുഞ്ഞിനെയും ബാധിച്ചേക്കാം. ഗര്‍ഭകാലത്തെ പകര്‍ച്ചവ്യാധികള്‍ ആജീവനാന്ത വൈകല്യങ്ങള്‍ക്കും നവജാതശിശുക്കളുടെ ജനന വൈകല്യങ്ങള്‍ക്കും ഗര്‍ഭാവസ്ഥയിലെ സങ്കീര്‍ണതകള്‍ക്കും ഇടയാക്കും. ബാക്ടീരിയ, വൈറസ്, ഫംഗസ്, പ്രോട്ടോസോവ തുടങ്ങിയ രോഗാണുക്കള്‍ സാംക്രമിക രോഗങ്ങള്‍ക്ക് കാരണമാകാറുണ്ട്. ഗർഭിണികൾ ഇതിൽ നിന്ന് രക്ഷ നേടാൻ എന്തൊക്കെ കാര്യങ്ങൾ ശ്രദ്ധിക്കണമെന്ന് നോക്കാം.
1. ഉമിനീരും മൂത്രവും ശ്രദ്ധിക്കണം
സൈറ്റോമെഗലോവൈറസ് (സിഎംവി) എന്ന വൈറസ് ഗര്‍ഭിണിയായ സ്ത്രീക്ക് രോഗബാധിതയായാല്‍ പ്രശ്നങ്ങള്‍ ഉണ്ടാക്കും. മാത്രമല്ല അവരില്‍ നിന്ന് ഈ വൈറസ് ഉള്ളില്‍ വളരുന്ന കുഞ്ഞിലേക്ക് പകരുകയും ചെയ്യും. ഗര്‍ഭിണികളായ സ്ത്രീകള്‍ ഭക്ഷണം കഴിക്കുന്ന പാത്രങ്ങള്‍ കപ്പുകള്‍ എന്നിവ മറ്റുള്ളവരുമായി പങ്കിടാതിരിക്കുക. ശിശുക്കളില്‍ നിന്നും ചെറിയ കുട്ടികളില്‍ നിന്നുമുള്ള ഉമിനീര്‍, മൂത്രം എന്നിവയുമായുള്ള സമ്പര്‍ക്കം കുറയ്ക്കുന്നതിലൂടെ വൈറസ് സാധ്യത കുറയ്ക്കാനാകും.
2. കൈകള്‍ വ്യത്തിയായി കഴുകുക
വൈറസുകളുടെ വാഹകരാണ് കൈകള്‍. നേരിട്ട് കൈകളില്‍ നിന്ന് വൈറസുകള്‍ വേഗത്തില്‍ ശരീരത്തില്‍ പ്രവേശിച്ചേക്കാം. പല സ്ഥലങ്ങളിലും അതുപോലെ സാധനങ്ങളിലുമൊക്കെ കൈകള്‍ പിടിക്കുന്നത് വൈറസ് പകരാന്‍ കാരണമാകും. ഗര്‍ഭിണികളായ സ്ത്രീകള്‍ തീര്‍ച്ചയായും കൈകള്‍ വ്യത്തിയായി കഴുകിയിരിക്കണം. അണുബാധയോ അണുക്കള്‍ വഹിക്കുകയോ ചെയ്യാതിരിക്കാന്‍ ഗര്‍ഭിണികള്‍ കൈകള്‍ ഇടയ്ക്കിടെ കഴുകണം. കഴിക്കുന്നതിന് മുന്‍പ് പഴങ്ങളും പച്ചക്കറികളും ഉറപ്പായും കഴുകി വൃത്തിയാക്കന്‍ മറക്കരുത്.
3. ശുചിത്വം പാലിക്കുക
പകര്‍ച്ചവ്യാധികള്‍ തടയുന്നതിനുള്ള വളരെ നിര്‍ണായകമായ ഘടകമാണ് ശുചിത്വം. ഗര്‍ഭിണികളായ സ്ത്രീകള്‍ മലിനമായ വെള്ളം, മലിനമായ വായു, പഴകിയ ഭക്ഷണം എന്നിവയുടെ രൂപത്തില്‍ രോഗാണുക്കളുമായി സമ്പര്‍ക്കം പുലര്‍ത്തുന്ന ഒരു സ്വഭാവം ഉണ്ടെങ്കില്‍ അത് ഒഴിവാക്കണം.
4. രോഗബാധിതരുമായി സമ്പര്‍ക്കം ഒഴിവാക്കുക
ആദ്യ മൂന്ന് മാസം തിരക്കേറിയ സ്ഥലങ്ങളില്‍ പോകാതെ സൂക്ഷിക്കണം. അണുബാധയുടെ ലക്ഷണങ്ങള്‍ കാണിക്കുന്നവരുമായി അടുത്ത് ഇടപഴകാതെയിരിക്കാന്‍ പ്രത്യേകം ശ്രദ്ധിക്കണം. ചിക്കന്‍പോക്‌സ് അല്ലെങ്കില്‍ റുബെല്ല പോലുള്ള അണുബാധയുള്ള രോഗികള്‍ അടുത്ത ചുറ്റുപാടില്‍ ഉണ്ടോ എന്ന് ശ്രദ്ധിക്കേണ്ടത് അത്യാവശ്യമാണ്.
Also Read:World Heart Day 2022: അമിത വ്യായാമം ഹൃദയാഘാതത്തിന് കാരണമാകുമോ?
5. എസ്ടിഐ പരിശോധിക്കുക
ചില ആളുകള്‍ക്ക് എച്ച്‌ഐവി, ഹെപ്പറ്റൈറ്റിസ് ബി തുടങ്ങിയ എസ്ടിഐ രോഗങ്ങളുണ്ട്. അവര്‍ സാധാരണയായി രോഗലക്ഷണങ്ങള്‍ കാണിക്കാറില്ല. ഈ രോഗമുണ്ടോയെന്ന് അറിയേണ്ടത് വളരെ പ്രധാനമാണ്. കുട്ടിക്ക് അണുബാധയുണ്ടാകാനുള്ള സാധ്യത കുറയ്ക്കുന്നതിന് ആവശ്യമായ എല്ലാ പരിശോധനകളും നടത്തുകയും ഡോക്ടറോട്് ചോദിച്ച് പ്രതിരോധ നടപടികള്‍ സ്വീകരിക്കുകയും വേണം.
6. വാക്‌സിനേഷന്‍ എടുക്കാന്‍ മറക്കരുത്
ഗര്‍ഭിണികള്‍ക്ക് ഡോക്ടര്‍മാര്‍ പ്രതിരോധ കുത്തിവയ്പ്പുകള്‍ നിര്‍ദ്ദേശിക്കുന്നുണ്ട്. ഗര്‍ഭകാലത്ത് എന്തെങ്കിലും സങ്കീര്‍ണതകളോ അണുബാധയോ ഉണ്ടാകാതിരിക്കാന്‍ ഇവ നിശ്ചിത സമയത്തിനകം എടുക്കേണ്ടതുണ്ട്. ഉചിതമായ സമയങ്ങളില്‍ നല്‍കുന്ന ഉചിതമായ പ്രതിരോധ കുത്തിവയ്പ്പുകള്‍ ഗര്‍ഭിണികളെ ആരോഗ്യത്തോടെ നിലനിര്‍ത്താന്‍ സഹായിക്കുന്നു. ഇന്‍ഫ്‌ളുവെന്‍സ രോഗങ്ങള്‍ വരാതിരിക്കാന്‍ വാക്‌സിനേഷനുകള്‍ നിര്‍ണായകമാണ്.
