ഓഫിസുകള്‍ പൂട്ടി മുദ്ര വയ്ക്കും, ബാങ്ക് അക്കൗണ്ടുകള്‍ മരവിപ്പിക്കും; പിഎഫ്‌ഐ നിരോധനത്തില്‍ ഉത്തരവ്

സംസ്ഥാനത്താകെ പിഎഫ്‌ഐക്ക് 140 ലധികം ഓഫിസുകള്‍ ഉണ്ടെന്നാണ് പോലീസിന്റെ കണക്ക്. പലയിടത്തും ബോര്‍ഡുകള്‍ സ്ഥാപിച്ചിട്ടില്ല. ഇതുസംബന്ധിച്ച് സര്‍ക്കാര്‍ ഉത്തരവ് ഇറക്കിയതോടെ പോലീസ് നടപടികളിലേക്ക് കടക്കും. 1967 യുഎപിഎ നിയമപ്രകാരമാണ് ഉത്തരവ് ഇറക്കിയത്.

ഉത്തരവിന്റെ ഭാഗമായി, സംഘടനയുടെ നേരിട്ടുള്ള ഓഫിസുകള്‍ മാത്രമായിരിക്കും മുദ്ര വയ്ക്കുക. വാടക കെട്ടിടങ്ങള്‍ ഒഴിവാക്കാന്‍ സാധ്യതയുണ്ട്. ട്രസ്റ്റുകളുടെ പേരിലുള്ള കെട്ടിടങ്ങള്‍ നിയമം നോക്കി മാത്രമേ മുദ്രവയ്ക്കുകയുള്ളൂ. ബാങ്ക് അക്കൗണ്ടുകള്‍ മരവിപ്പിക്കാനും നടപടി ആരംഭിച്ചു. സമൂഹമാധ്യമങ്ങളില്‍ അന്വേഷണ ഏജന്‍സികള്‍ നിരീക്ഷണം ശക്തമാക്കി. പോപ്പുലര്‍ ഫ്രണ്ടിനെയും അനുബന്ധ സംഘടനകളെയും അനുകൂലിച്ച് പ്രവര്‍ത്തിക്കുകയോ സമൂഹമാധ്യമങ്ങള്‍ വഴി പ്രചാരണം നടത്തുകയോ ചെയ്താല്‍ യുഎപിഎ നിയമപ്രകാരം അറസ്റ്റ് ചെയ്യും. ഇത്തരം പ്രവര്‍ത്തകരെ സഹായിക്കുന്നവരും അറസ്റ്റിലാകും.

സംസ്ഥാന ഇന്റലിജന്‍സിന്റെ കണക്ക് പ്രകാരം, കേരളത്തില്‍ പിഎഫ്‌ഐയില്‍ നേരിട്ട് സജീവമായി പ്രവര്‍ത്തിക്കുന്ന അര ലക്ഷത്തിലേറെ പേരുണ്ട്. അനുബന്ധ സംഘടനകളില്‍ പ്രവര്‍ത്തിക്കുന്നവര്‍ ഇതിനു പുറമെയാണ്.

രാജ്യത്ത് പോപ്പുലര്‍ ഫ്രണ്ട് ഓഫ് ഇന്ത്യ ഉള്‍പ്പെടെയുള്ളയുള്ള എട്ട് സംഘടനകള്‍ക്കാണ് രാജ്യത്ത് നിരോധനം ഏര്‍പ്പെടുത്തിയത്. റിഹാബ് ഇന്ത്യാ ഫൗണ്ടേഷന്‍, കാമ്പസ് ഫ്രണ്ട് ഓഫ് ഇന്ത്യ, ഓള്‍ ഇന്ത്യ ഇമാംസ് കൗണ്‍സില്‍, എന്‍സിഎച്ച്ആര്‍ഒ, നാഷണല്‍ വുമണ്‍സ് ഫ്രണ്ട്, ജൂനിയര്‍ ഫ്രണ്ട്, എംപവര്‍ ഇന്ത്യാ ഫൗണ്ടേഷന്‍ എന്നീ സംഘടനകളെയാണ് കേന്ദ്ര ആഭ്യന്തര മന്ത്രാലയം നിരോധിച്ചത്.

Also Read: ബിനോയ് കോടിയേരിക്കെതിരായ ബലാത്സംഗക്കേസ് ഒത്തുതീർപ്പാക്കി, യുവതിക്ക് 80 ലക്ഷം നൽകിയെന്ന് റിപ്പോർട്ട്



രാജ്യസുരക്ഷ, ക്രമസമാധാനം എന്നിവ കണക്കിലെടുത്താണ് കേന്ദ്ര സര്‍ക്കാരിന്റെ ഈ നടപടി. എട്ട് സംഘടനകള്‍ക്ക് അഞ്ച് വര്‍ഷത്തെ നിരോധനമാണ് ഉള്ളതെങ്കില്‍ രാജ്യത്ത് എന്നന്നേക്കുമായി നിരോധിക്കപ്പെട്ട മറ്റ് സംഘടനകള്‍ ഇന്ത്യയിലുണ്ട്. കേന്ദ്ര ആഭ്യന്തര മന്ത്രാലയം പുറത്തുവിട്ട കണക്ക് പ്രകാരം 55 സംഘടനകളെയാണ് ഇന്ത്യയില്‍ നിരോധിച്ചിട്ടുള്ളത്.



Read Latest Kerala News and Malayalam News