സ്‌പോണ്‍സറെ വേണ്ട; സൗദിയില്‍ ദീര്‍ഘ, ഹ്രസ്വകാല വിദ്യാഭ്യാസ വിസകള്‍ അനുവദിക്കും

പുതിയ ദീര്‍ഘകാല വിസ വിദ്യാര്‍ഥികള്‍ക്കും ഗവേഷകര്‍ക്കും വിദഗ്ധര്‍ക്കും അക്കാദമിക് പഠനത്തിനും ഗവേഷണ സന്ദര്‍ശനത്തിനും പ്രയോജനം ചെയ്യും. വിദ്യാര്‍ഥികള്‍, ഗവേഷകര്‍, വിസിറ്റിങ് ട്രെയിനികള്‍ എന്നിവര്‍ക്ക് ഭാഷാ പഠനം, പരിശീലനം, ഹ്രസ്വ പ്രോഗ്രാമുകളിലെ പങ്കാളിത്തം, വിദ്യാര്‍ഥി എക്‌സ്‌ചേഞ്ച് പ്രോഗ്രാമുകള്‍ എന്നിവയ്ക്കായി ഹ്രസ്വകാല വിസ ഉപയോഗിക്കാം.

സമ്മേളനത്തിന്റെ തുടക്കത്തില്‍, സൗദി അറേബ്യയും സൗഹൃദ രാജ്യങ്ങളിലെ നേതാക്കളും അവരുടെ പ്രതിനിധികളും തമ്മില്‍ നടന്ന സമീപകാല ചര്‍ച്ചകളില്‍ രാജ്യാന്തര രംഗത്തെ നിലവിലെ സംഭവവികാസങ്ങള്‍ വിഷയമായിരുന്നു. ഇതുസംബന്ധിച്ച് മന്ത്രിസഭ വിശദീകരിച്ചു. ദീര്‍ഘകാല, ഹ്രസ്വകാല വിദ്യാഭ്യാസ വിസ ഉടമകളെ സ്‌പോണ്‍സര്‍ വ്യവസ്ഥയില്‍ നിന്ന് ഒഴിവാക്കും.

അതേസമയം, സൗദി മന്ത്രിസഭയിലെ വന്‍ അഴിച്ചുപണിയുടെ ഭാഗമായി കിരീടാവകാശിയും പ്രതിരോധ മന്ത്രിയുമായ മുഹമ്മദ് ബിന്‍ സല്‍മാന്‍ രാജകുമാരനെ പുതിയ പ്രധാനമന്ത്രിയായി തെരഞ്ഞെടുത്തു. ഇതുമായി ബന്ധപ്പെട്ട് ഉത്തരവ് സല്‍മാന്‍ രാജാവ് പുറത്തിറക്കി. ഇതുവരെ ഭണാധികാരി തന്നെയായിരുന്നു പ്രധാനമന്ത്രിപദവും വഹിച്ചിരുന്നത്. ഈ കീഴ്‌വഴക്കം മാറ്റിയാണ് കിരീടാവകാശിയെ പ്രധാനമന്ത്രിയായി പ്രഖ്യാപിച്ചിരിക്കുന്നത്. അതേസമയം, സല്‍മാന്‍ രാജാവ് പങ്കെടുക്കുന്ന മന്ത്രിസഭാ യോഗങ്ങള്‍ തുടര്‍ന്നും അദ്ദേഹത്തിന്റെ തന്നെ അധ്യക്ഷതയില്‍ ചേരുമെന്ന് ഔദ്യോഗിക വൃത്തങ്ങള്‍ അറിയിച്ചു.

നിലവിലെ പ്രതിരോധ മന്ത്രി കൂടിയായ മുഹമ്മദ് സല്‍മാന്‍ പ്രധാനമന്ത്രിയായി അവരോധിക്കപ്പെട്ട പശ്ചാത്തലത്തില്‍ പുതിയ പ്രതിരോധ മന്ത്രിയായി ഖാലിദ് ബിന്‍ സല്‍മാന്‍ രാജകുമാരനെ നിയമിച്ചു. ഇതുവരെ ഇദ്ദേഹം ഡെപ്യൂട്ടി പ്രതിരോധ മന്ത്രിയായിരുന്നു. വിദ്യാഭ്യാസ മന്ത്രിയായി യൂസുഫ് ബിന്‍ അബ്ദുല്ല അല്‍ ബുനയ്യാനെ നിയമിച്ചിട്ടുണ്ട്. അസിസ്റ്റന്റ് പ്രതിരോധ മന്ത്രിയായി ത്വലാല്‍ അല്‍ ഉതൈബിയെയും നിയമിച്ചു.

Also Read: സാങ്കല്‍പ്പികമായി മോട്ടോര്‍ സൈക്കിള്‍ ഓടിക്കണം; വിദ്യാര്‍ഥിയെ ബസ് സ്‌റ്റോപ്പില്‍ തടഞ്ഞുവെച്ച് റാഗിങ്, പരാതി



മറ്റു സുപ്രധാന വകുപ്പുകള്‍ കൈയ്യാളുന്ന മന്ത്രിമാരുടെ പദവികളില്‍ മാറ്റങ്ങളൊന്നുമുണ്ടായിട്ടില്ല. ഊര്‍ജ മന്ത്രിയായി അബ്ദുല്‍ അസീസ് ബിന്‍ സല്‍മാന്‍ രാജകുമാരനും വിദേശ മന്ത്രിയായി ഫൈസല്‍ ബിന്‍ ഫര്‍ഹാന്‍ രാജകുമാരനും ആഭ്യന്തര മന്ത്രിയായി അബ്ദുല്‍ അസീസ് ബിന്‍ സൗദ് രാജകുമാരനും നാഷണല്‍ ഗാര്‍ഡ് മന്ത്രിയായി അബ്ദുല്ല ബിന്‍ ബന്ദര്‍ രാജകുമാരനും ധനമന്ത്രിയായി മുഹമ്മദ് അല്‍ ജദ്ആനും മാനവശേഷി, സാമൂഹിക വികസന മന്ത്രിയായി എന്‍ജിനീയര്‍ അഹ്മദ് അല്‍ റാജിഹിയും ഹജ്ജ്, ഉംറ മന്ത്രിയായി ഡോ. തൗഫീഖ് അല്‍ റബീഅയും തുടരും.

Read Latest Gulf News and Malayalam News