ഡോളര്‍ കടത്ത്: ശിവശങ്കര്‍ ആറാം പ്രതി, സ്വപ്‌നയുടെ ലോക്കറില്‍ ഉണ്ടായിരുന്ന പണം ശിവശങ്കറിന്‍റേത്

സ്വര്‍ണക്കടത്തു കേസ് പ്രതി സ്വപ്‌ന സുരേഷിന്റെ ബാങ്ക് ലോക്കറില്‍ ഉണ്ടായിരുന്നത് ശിവശങ്കറിന്റെ പണം ആയിരുന്നെന്നും കസ്റ്റംസ് കുറ്റപത്രത്തില്‍ പറയുന്നു. ലൈഫ് മിഷന്‍ പദ്ധതിയില്‍ ലഭിച്ച കമ്മിഷനാണ് ലോക്കറില്‍ ഉണ്ടായിരുന്നത്. യുഎഇ കോണ്‍സുലേറ്റ് മുന്‍ ഉദ്യോഗസ്ഥന്‍ ഖാലിദ് മുഹമ്മദ് അല്‍ ഷൗക്രിയാണ് ഒന്നാം പ്രതി. സരിത്ത്, സ്വപ്‌ന സുരേഷ്, സന്ദീപ്, സന്തോഷ് ഈപ്പന്‍, എം ശിവശങ്കര്‍ എന്നിവരാണ് മറ്റുപ്രതികള്‍.

ഡോളര്‍ കടത്തില്‍ ശിവശങ്കര്‍ ആയിരുന്നു മുഖ്യ ആസൂത്രകനെന്നും ഡോളര്‍ കടത്ത് മറച്ചുവെച്ചെന്നും കുറ്റപത്രത്തില്‍ പറയുന്നു. അന്വേഷണ സംഘം സാമ്പത്തിക കുറ്റകൃത്യങ്ങള്‍ പരിഗണിക്കുന്ന പ്രത്യേക കോടതിയില്‍ കുറ്റപത്രം സമര്‍പ്പിച്ചു. ലൈഫ് മിഷന്‍ ഇടപാടില്‍ ശിവശങ്കറിന് ഒരു കോടി രൂപ കമ്മിഷന്‍ കിട്ടിയതായി കുറ്റപത്രത്തില്‍ പറയുന്നുണ്ട്. സ്വപ്‌നയുടെ ലോക്കറിലെ തുക ശിവശങ്കറിന് കിട്ടിയ കമ്മിഷനാണ്. കോണ്‍സുലേറ്റ് വഴിയുള്ള ഇടപാടുകള്‍ ശിവശങ്കര്‍ അറിഞ്ഞിരുന്നതായും കുറ്റപത്രത്തില്‍ പറയുന്നു. കേസില്‍ ആകെ 40 പേജുകളുള്ള കുറ്റപത്രമാണ് കസ്റ്റംസ് കോടതിയില്‍ സമര്‍പ്പിച്ചിരിക്കുന്നത്.

Also Read: Abortion Law :അവിവാഹിതരായ സ്ത്രീകള്‍ക്കും നിയമപരമായ ഗര്‍ഭഛിദ്രം; സുപ്രധാന വിധിയുമായി സുപ്രിംകോടതി

വിമാനത്താവളത്തിലെ നയതന്ത്ര ബാഗേജ് വഴി സ്വര്‍ണം കടത്തിയ കേസിലെ പ്രതികളായ സ്വപ്‌ന സുരേഷ് ഉള്‍പ്പെടുത്തിയവരുമായുള്ള അടുപ്പം ചീഫ് സെക്രട്ടറിതല അന്വേഷണ സമിതി കണ്ടെത്തിയതിനെ തുടര്‍ന്ന് 2020 ജൂലൈ 17 നാണ് ഐടി പ്രിന്‍സിപ്പല്‍ സെക്രട്ടറി കൂടി ആയിരുന്ന ശിവശങ്കറെ സസ്‌പെന്‍ഡ് ചെയ്തത്. 2022 ജനുവരിയില്‍ ശിവശങ്കറിനെ സര്‍വീസില്‍ തിരിച്ചെടുത്തു.