Sumayya P | Lipi | Updated: 05 Jul 2021, 05:19:00 PM
കൊവിഡ് നിയന്ത്രണങ്ങളുടെ ഭാഗമായി കഴിഞ്ഞ വര്‍ഷം സൂഖ് വാഖിഫില്‍ മേള നടക്കാതിരുന്നതിനാല്‍ ഇത്തവണ വന്‍തോതില്‍ ഉല്‍പ്പന്നങ്ങള്‍ എത്തുമെന്നാണ് പ്രതീക്ഷ
ഹൈലൈറ്റ്:
- ഗുണനിലവാരമുള്ള ഈത്തപ്പഴം മാത്രമായിരിക്കും മേളയില്‍ അനുവദിക്കുക
- രുചിയും മണവും ഉണ്ടായിരിക്കണം
- കൃത്രിമമായി ഒന്നും ചേര്‍ക്കാന്‍ പാടില്ല
ദോഹ: ആറാമത് ഈത്തപ്പഴ മേളയ്ക്ക് ഖത്തറിന്റെ പൈതൃക വാണിജ്യ കേന്ദ്രമായ സൂഖ് വാഖിഫില്‍ അടുത്തയാഴ്ച്ച തുടക്കമാവും. രണ്ടാഴ്ച്ച നീളുന്ന മേളയില്‍ ഇത്തവണ 80ലേറെ ഫാമുകളില്‍ നിന്നുള്ള വ്യത്യസ്ത തരം ഈത്തപ്പഴങ്ങള്‍ വില്‍പ്പനയ്‌ക്കെത്തും.
ഈത്തപ്പഴം ഉള്‍പ്പെടെയുള്ള കാര്‍ഷിക മേഖലയെ സഹായിക്കുകയും പ്രാദേശിക ഈത്തപ്പഴ കര്‍ഷകര്‍ക്ക് ഗുണനിലവാരമുള്ള ഈത്തപ്പഴ ഉല്‍പ്പാദനത്തില്‍ പ്രോല്‍സാഹനം നല്‍കുകയും ചെയ്യുകയാണ് മഹര്‍ജാന്‍ റുത്വബ് എന്ന പേരില്‍ അറിയപ്പെടുന്ന മേളയിലൂടെ ലക്ഷ്യമിടുന്നത്. അതോടൊപ്പം പ്രാദേശിക കര്‍ഷകര്‍ക്ക് തങ്ങളുടെ ഉല്‍പ്പന്നങ്ങള്‍ക്ക് മികച്ച വിപണി കണ്ടെത്തി നല്‍കുകയെന്നതും മേളയുടെ ലക്ഷ്യമാണ്.
Also Read: 
വാക്‌സിനെടുക്കാത്തവര്‍ക്ക് പൊതു ഇടങ്ങളില്‍ പ്രവേശന വിലക്ക്; തീരുമാനം ഉടനെയെന്ന് സൗദി
കൊവിഡ് നിയന്ത്രണങ്ങളുടെ ഭാഗമായി കഴിഞ്ഞ വര്‍ഷം സൂഖ് വാഖിഫില്‍ മേള നടക്കാതിരുന്നതിനാല്‍ ഇത്തവണ വന്‍തോതില്‍ ഉല്‍പ്പന്നങ്ങള്‍ എത്തുമെന്നാണ് പ്രതീക്ഷിക്കുന്നതെന്ന് മുനിസിപ്പാലിറ്റി പരിസ്ഥിതി മന്ത്രാലയത്തിലെ കാര്‍ഷിക മാര്‍ഗനിര്‍ദേശക വിഭാഗം മേധാവി അഹ്മദ് അല്‍ യാഫിഈ പറഞ്ഞു.
മേളയ്‌ക്കെത്തുന്ന എല്ലാ വിഭാഗം ഉപഭോക്താക്കള്‍ക്കും അനുയോജ്യമായ രീതിയിലായിരിക്കും വിലനിലവാരമെന്ന് അദ്ദേഹം പറഞ്ഞു. ചൂട് കാലമായതിനാല്‍ വൈകീട്ട് നാലു മുതല്‍ രാത്രി 10 വരെയാണ് മേള നടക്കുകയെന്നും അദ്ദേഹം അറിയിച്ചു.
ഗുണനിലവാരമുള്ള ഈത്തപ്പഴം മാത്രമായിരിക്കും മേളയില്‍ അനുവദിക്കുക. ഈത്തപ്പഴം മൂപ്പെത്തിയതായിരിക്കണം, പ്രകൃതി ദത്തമായ രുചിയും മണവും ഉണ്ടായിരിക്കണം, കൃത്രിമമായി ഒന്നും ചേര്‍ക്കാന്‍ പാടില്ല തുടങ്ങിയ മാനദണ്ഡങ്ങള്‍ പാലിച്ചുകൊണ്ട് മാത്രമേ മേളയില്‍ പങ്കെടുക്കാനാവൂ.
ഖലസ്, അല്‍ ശിശി, അല്‍ കനീസി, ബര്‍ഹി, ഇറാഖി, സില്‍ജി, സുര്‍ഫി, നബ്ത് സെയ്ഫ്, അല്‍ സവാഫി, ഖുര്‍ദി തുടങ്ങി വിവിധ ഇനം പ്രാദേശിക ഈത്തപ്പഴങ്ങള്‍ മേളയില്‍ ലഭ്യമാവും. ഉന്നത ഗുണനിലവാരമുള്ള പ്രാദേശിക പച്ച ഈത്തപ്പഴം (റുതബ്) ആണ് മറ്റൊരു ആകര്‍ഷണം.
ലോകസഭയിൽ പുതിയ പ്രതിപക്ഷ നേതാവ് വരുമോ ?
Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
ഏറ്റവും പുതിയ വാർത്തകൾ അതിവേഗം അറിയാൻ Samayam Malayalam ഫേസ്ബുക്ക് പേജ് ലൈക്ക് ചെയ്യൂ
Web Title : 6th fresh local dates festival 2021 will begin in doha next week at souq waqif
Malayalam News from malayalam.samayam.com, TIL Network
