റിക്രൂട്ട്മെന്റ് കരാര്‍ ഒപ്പിടാന്‍ ഇന്‍ഷൂറന്‍സ് വേണം
നിയമം പ്രാബല്യത്തില്‍ വരുന്നതോടെ ഇന്‍ഷൂറന്‍സ് ഇല്ലാതെ ഗാര്‍ഹിക തൊഴിലാളികളുമായുള്ള റിക്രൂട്ട്മെന്റ് കരാര്‍ ഉണ്ടാക്കാനാവില്ല. തൊഴിലുടമയും ഗാര്‍ഹിക തൊഴിലാളിയും തമ്മിലുള്ള അന്തിമ കരാര്‍ തയ്യാറാക്കുന്ന സമയത്ത് ഇന്‍ഷൂറന്‍സ് കവറേജിനെ കുറിച്ച് ഇരു വിഭാഗങ്ങളെയും റിക്രൂട്ട്മെന്റ് സ്ഥാപനം അറിയിക്കണം. തൊഴിലുടമയുടെയും തൊഴിലാളിയുടെയും അവകാശങ്ങള്‍ പൂര്‍ണമായി സംരക്ഷിക്കപ്പെടുന്ന രീതിയിലായിരിക്കും ഇന്‍ഷൂറന്‍സ് പദ്ധതി നടപ്പില്‍ വരുത്തുക. രാജ്യത്തെ തൊഴില്‍ കമ്പോളത്തില്‍ സുപ്രധാന വഴിത്തിരിവാകുന്ന നിയമഭേദഗതി നടപ്പില്‍ വരുത്തുന്നതിനു മുമ്പുള്ള അവസാന മിനുക്കുപണികളിലാണ് അധികൃതര്‍.
പദ്ധതി സൗദി സെന്‍ട്രല്‍ ബാങ്കുമായി സഹകരിച്ച്
സൗദി സെന്‍ട്രല്‍ ബാങ്കുമായി സഹകരിച്ചാണ് നുഷ്യവിഭവ സാമൂഹിക വികസന മന്ത്രാലയം ഇന്‍ഷൂറന്‍സ് പദ്ധതി നടപ്പിലാക്കുക. ഇതിന്റെ ഭാഗമായി ഗാര്‍ഹിക തൊഴിലാളി റിക്രൂട്ട്‌മെന്റിന് പ്രത്യേകമായുള്ള മുസാനിദ് പ്ലാറ്റ്‌ഫോമിനെ ഇന്‍ഷൂറന്‍സ് കമ്പനികളുമായി ബന്ധിപ്പിക്കുന്ന നടപടികളും പുരോഗമിക്കുകയാണ്. എങ്കില്‍ മാത്രമേ തൊഴില്‍ കരാറിനെ ഇന്‍ഷൂറന്‍സുമായി ബന്ധിപ്പിക്കുക സാധ്യമാവുകയുള്ളൂ എന്നതിനാലാണിത്. ഇന്‍ഷൂറന്‍സ് എടുക്കണമെന്ന നിയമം തുടക്കത്തില്‍ താല്‍പര്യമുള്ളവര്‍ മാത്രം ഉപയോഗപ്പെടുത്തിയാല്‍ മതിയാവും എന്നായിരുന്നു നേരത്തേ ഉണ്ടായിരുന്ന റിപ്പോര്‍ട്ട്. എന്നാല്‍ ഇത് തൊഴില്‍ കരാറുമായി ബന്ധപ്പെടുത്തിയ പശ്ചാത്തലത്തില്‍ എല്ലാവര്‍ക്കും പോളിസി എടുക്കല്‍ നിര്‍ബന്ധമാവുമെന്നാണ് കണക്കുകൂട്ടല്‍.
തൊഴിലാളികളുടെ അവകാശങ്ങള്‍ സംരക്ഷിക്കപ്പെടും
പുതിയ ഇന്‍ഷൂറന്‍സ് പദ്ധതി നിിലവില്‍ വരുന്നതോടെ രാജ്യത്തെ ഗാര്‍ഹിക തൊഴിലാളികളുടെ അവകാശ സംരക്ഷണത്തില്‍ വലിയ നാഴികക്കല്ലായി അത് മാറുമെന്നാണ് ഈ മേഖലയിലുള്ളവരുടെ വിലയിരുത്തല്‍. റിക്രൂട്ട്മെന്റ് കരാര്‍ പ്രകാരമുള്ള വേതനം നല്‍കുന്നതില്‍ തൊഴിലുടമ വീഴ്ച വരുത്തുന്ന പക്ഷം തൊഴിലാളിക്ക് അര്‍ഹമായ ശമ്പള കുടിശ്ശിക നല്‍കാന്‍ ഇന്‍ഷൂറന്‍സ് കമ്പനി ബാധ്യസ്ഥമായിരിക്കും. അതോപോലെ തൊഴിലുടമയുടെ മരണം, ശമ്പളം നല്‍കാനുള്ള സാമ്പത്തിക ശേഷി ഇല്ലാതാവല്‍ തുടങ്ങിയ കാരണങ്ങളാല്‍ ശമ്പളം മുടങ്ങിയാലും ഇന്‍ഷൂറന്‍സ് കമ്പനിയില്‍ നിന്ന് അത് ലഭ്യമാകും. തൊഴിലാളിക്ക് അപകടം സംഭവിച്ച് ശാശ്വതമോ ഭാഗികമയോ ആയ ഭിന്നശേഷിത്വം ഉണ്ടാകുന്ന പക്ഷവും നഷ്ടപരിഹാരത്തിനായി ഇന്‍ഷൂറന്‍സ് കമ്പനിയെ സമീപിക്കാവുന്നതാണ്.
കരാറില്‍ പറഞ്ഞ ജോലികള്‍ മാത്രമേ ചെയ്യിക്കാവൂ
രാജ്യത്തെ ഗാര്‍ഹിക തൊഴിലാളി റിക്രൂട്ട്മെന്റ് നിയമം അനുസരിച്ച് കരാറില്‍ പറഞ്ഞ ജോലികള്‍ മാത്രമേ തൊഴിലാളിയെ കൊണ്ട് ചെയ്യിക്കാവൂ എന്ന് വ്യവസ്ഥയുണ്ട്. അതേസമയം, അനിവാര്യ ഘട്ടങ്ങളില്‍ മറ്റു ജോലികള്‍ ചെയ്യിക്കാന്‍ അനുവാദമുണ്ടായിരിക്കും. എന്നാല്‍ കരാറില്‍ പറഞ്ഞ ജോലിയുമായി ഒരു തരത്തിലും ബന്ധപ്പെടാത്ത ജോലികള്‍ അത്യാവശ്യ സന്ദര്‍ഭങ്ങളില്‍ പോലും ചെയ്യാന്‍ തൊഴിലാളിയെ നിര്‍ബന്ധിക്കരുത്. തൊഴിലാളിയുടെ അഭിമാനത്തിന് ക്ഷതം ഏല്‍പ്പിക്കുന്നതോ ശരീരത്തിന് ഹാനികരമായതോ അപകടം പിടിച്ചതോ ആയ ജോലികള്‍ ചെയ്യിക്കുന്നതിലും വിലക്കുണ്ട്.
ചുരുങ്ങിയത് ഒന്‍പത് മണിക്കൂര്‍ വിശ്രമം അനുവദിക്കണം
ഹിജ്‌റ വര്‍ഷപ്രകാരമുള്ള അറബി മാസത്തിന്റെ അവസാനത്തിലാണ് തൊഴിലാളിക്ക് ശമ്പളം നല്‍കേണ്ടതെന്നും നിയമം വ്യവസ്ഥ ചെയ്യുന്നുണ്ട്. തൊഴിലാളിയുടെ ശമ്പളം ബാങ്ക് അക്കൗണ്ടിലേക്ക് നല്‍കുന്നതിന് പകരം കാഷായോ ചെക്കായോ ആണ് നല്‍കുന്നതെങ്കില്‍ അതിനുള്ള രേഖ സൂക്ഷിക്കണമെന്നും വ്യവസ്ഥയുണ്ട്. പ്രതിദിനം ചുരുങ്ങിയത് ഒന്‍പത് മണിക്കൂര്‍ വിശ്രമം അനുവദിക്കണം. താമസിക്കാനും വിശ്രമിക്കാനും അനുയോജ്യമായ ഇടം നല്‍കാനും തൊഴിലുടമയ്ക്ക് ബാധ്യതയുണ്ട്. തൊഴിലുടമയ്‌ക്കെതിരേ തൊഴിലാളി പരാതി നല്‍കുന്ന പക്ഷം നേരിട്ടോ ദൂതന്‍ മുഖേനയോ ഇതുമായി ബന്ധപ്പെട്ട പരാതി പരിഹാര കമ്മിറ്റി മുമ്പാകെ തൊഴിലുടമ ഹാജരാവണമെന്നും നിയമം വ്യക്തമാക്കുന്നു.
തൊഴിലുടമയുടെ അവകാശങ്ങള്‍ക്കും സംരക്ഷണം
അതേസമയം, തൊഴിലുടമയുടെ അവകാശങ്ങളും സംരക്ഷിക്കപ്പെടുന്ന രീതിയിലാണ് പുതിയ ഇന്‍ഷൂറന്‍സ് പദ്ധതി നടപ്പിലാക്കാനിരിക്കുന്നതെന്നും റിപ്പോര്‍ട്ടില്‍ പറയുന്നു. കരാര്‍ കാലയളവില്‍ ഗാര്‍ഹിക തൊഴിലാളി തൊഴിലുടമയുടെ വീട്ടില്‍ നിന്ന് ഓടിപ്പോവുകയോ രോഗ ബാധിതരാവുകയോ മരണപ്പെടുകയോ ചെയ്യുന്ന പക്ഷം തൊഴിലുടമയ്ക്ക് നഷ്ടപരിഹാരം ലഭിക്കും. റിക്രൂട്ട്മെന്റ് നിയമ പ്രകാരം കരാറില്‍ പറഞ്ഞ ജോലികള്‍ കുറ്റമറ്റ രീതിയില്‍ ചെയ്യാന്‍ തൊഴിലാളികള്‍ ബാധ്യസ്ഥരാണ്. ന്യായമായ കാരണങ്ങളില്ലാതെ തൊഴില്‍ ചെയ്യുന്നതില്‍ നിന്ന് വിട്ടുനില്‍ക്കാന്‍ പാടില്ല. കുടുംബത്തിന്റെ അഭിമാനവും സ്വകാര്യതയും കാത്തുസൂക്ഷിക്കുന്ന രീതിയില്‍ മാത്രമേ വീട്ടുജോലിക്കാര്‍ പെരുമാറാന്‍ പാടുള്ളൂ. ഇസ്ലാമിക മൂല്യങ്ങളും രാജ്യത്തെ നിയമങ്ങളും പാലിക്കാന്‍ ജോലിക്കാര്‍ ബാധ്യസ്ഥരാണെന്നും നിയമം വ്യക്തമാക്കുന്നുണ്ട്.
