ഏത് പ്രായക്കാരെയും കൊണ്ടുവരാം
എന്നാല്‍ ഹയ്യാ വിത്ത് മീ (1+3) വൗച്ചറിലൂടെ അപേക്ഷിക്കുന്ന ടിക്കറ്റ് ഇല്ലാത്ത ആരാധകര്‍ക്ക് പ്രായപരിധിയില്ല. ഏത് പ്രായത്തിലുള്ള ഫുട്‌ബോള്‍ പ്രേമികള്‍ക്കും ഇങ്ങനെ ഖത്തറിലേക്കു വരാം. ഇങ്ങനെ വരുന്നവര്‍ക്ക് പാസ്‌പോര്‍ട്ട് കൈവശമുണ്ടായിരിക്കണം എന്നതാണ് നിബന്ധനകളിലൊന്ന്. ടൂര്‍ണമെന്റിനിടെ അവര്‍ ഖത്തറില്‍ എവിടെ താമസിക്കും എന്ന കാര്യവും വ്യക്തമാക്കണം. ഹയ്യാ വിത്ത് മീ (1+3) ഫീച്ചര്‍ പ്രയോജനപ്പെടുത്തുന്നതിന്, അംഗീകൃത ഹയ്യ കാര്‍ഡ് ഉടമകള്‍ ഹയ്യാ കാര്‍ഡ് വെബ്‌സൈറ്റിലെ എന്റെ ഹയ്യ (മൈ ഹയ്യാ) തിരഞ്ഞെടുത്ത് ‘ആക്ഷന്‍’ ക്ലിക്ക് ചെയ്യണം. അതിനു ശേഷം എനിക്കൊപ്പം ഹയ്യ (ഹയ്യാ വിത്ത് മി) എന്നത് തിരഞ്ഞെടുക്കുക. അങ്ങനെ തെരഞ്ഞെടുത്താല്‍ മൂന്ന് വൗച്ചര്‍ കോഡുകള്‍ കാണാന്‍ കഴിയും. ടിക്കറ്റ് ഇല്ലാത്ത അപേക്ഷകര്‍ക്ക് വേണ്ടിയുള്ളതാണ് ഈ മൂന്ന് വൗച്ചര്‍ കോഡുകള്‍.
ഒരാള്‍ക്ക് 500 റിയാല്‍ ഫീസ് നല്‍കണം
അതിനു ശേഷം ഹയ്യാ വിത്ത് മീ (1+3) അപേക്ഷകന്‍ ഹയ്യ കാര്‍ഡിനായി അപേക്ഷ നല്‍കണം. വെബ്‌സൈറ്റില്‍ പ്രവേശിച്ച ശേഷം അപേക്ഷക വിഭാഗത്തില്‍ (ആപ്ലിക്കന്റ് കാറ്റഗറി) നിന്ന് ‘ഹയ്യ വിത്ത് മി വൗച്ചര്‍’ തിരഞ്ഞെടുക്കുക. അതിനു ശേഷം ഹയ്യാ കാര്‍ഡ് ഉടമകള്‍ക്ക് നേരത്തേ നല്‍കപ്പെട്ടിട്ടുള്ള വൗച്ചര്‍ കോഡ് നല്‍കുക, ‘എന്റെ വൗച്ചര്‍ സാധൂകരിക്കുക’ എന്നത് തിരഞ്ഞെടുത്ത് നിബന്ധനകള്‍ അംഗീകരിക്കുക. അതിനുശേഷം നല്‍കിയ വിവരങ്ങളെല്ലാം പരിശോധിച്ച ശേഷം സബ്മിറ്റ് ബട്ടന്‍ ക്ലിക്ക് ചെയ്യുന്നതോടെ അപേക്ഷ നല്‍കുന്ന നടപടി പൂര്‍ത്തിയാവും. ഓരോ ഹയ്യാ വിത്ത് മീ (1+3) അപേക്ഷകനും 500 റിയാല്‍ ഫീസ് നല്‍കണം. ഇത് പിന്നീട് തിരികെ ലഭിക്കുന്നല്ല. എന്നാല്‍ 12 വയസ്സിന് താഴെയുള്ള കുട്ടികള്‍ക്ക് ഫീസ് ബാധകമല്ല.
ഹയ്യാ കാര്‍ഡ് ലഭിക്കാന്‍ താമസം ബുക്ക് ചെയ്യണം
അംഗീകൃത ഹയ്യാ കാര്‍ഡുള്ള അന്താരാഷ്ട്ര ആരാധകരുടെ അപേക്ഷകള്‍ സ്വീകരിക്കപ്പെടുന്ന മുറയ്ക്ക് അവര്‍ക്ക് ഇമെയില്‍ വഴി ഖത്തറിലേക്കുള്ള എന്‍ട്രി പെര്‍മിറ്റ് ലഭിക്കും. ഹയ്യാ കാര്‍ഡ് ഉള്ളവര്‍ക്ക് ഫുട്‌ബോള്‍ സ്റ്റേഡിയങ്ങളിലേക്കുള്ള പ്രവേശനവും ടൂര്‍ണമെന്റ് വേളയില്‍ സൗജന്യ പൊതുഗതാഗതവും നിരവധി മറ്റ് ആനുകൂല്യങ്ങളും ലഭിക്കും. ഹയ്യാ കാര്‍ഡിനായി അപേക്ഷിക്കുമ്പോള്‍ ഖത്തറില്‍ എത്തിയാല്‍ എവിടെ താമസിക്കും എന്നതിന്റെ വിശദാംശങ്ങള്‍ നിര്‍ബന്ധമായും നല്‍കണം. അല്ലാത്ത പക്ഷം ഹയ്യാ കാര്‍ഡ് അപേക്ഷ സ്വീകരിക്കപ്പെടുകയില്ല. ഖത്തറിലെ താമസം ബുക്ക് ചെയ്തിരിക്കുന്നത് ഖത്തര്‍ അക്കോമഡേഷന്‍ ഏജന്‍സി വഴിയാണോ അതോ ഒരു മൂന്നാം കക്ഷിയിലൂടെയോ ആണോ എന്ന കാര്യവും അപേക്ഷയില്‍ വ്യക്തമാക്കണം.
താമസിക്കാന്‍ വൈവിധ്യമായ സംവിധാനങ്ങള്‍
ക്രൂയിസ് കപ്പലുകളിലെ മുറികള്‍, അപ്പാര്‍ട്ട്‌മെന്റുകള്‍, വില്ലകള്‍, ഹോട്ടലുകള്‍, ഫാന്‍ വില്ലേജുകള്‍ എന്നിവയുള്‍പ്പെടെ ഫുട്‌ബോള്‍ ആരാധകര്‍ക്ക് താസമിക്കുന്നതിനായി വൈവിധ്യമാര്‍ന്ന സൗകര്യങ്ങളാണ് ഖത്തര്‍ അക്കോമഡേഷന്‍ ഏജന്‍സി ഒരുക്കിയിരിക്കുന്നത്. രണ്ടു പേര്‍ക്ക് താമസിക്കാവുന്ന മുറിക്ക് 80 ഡോളറാണ് ഒരു ദിവസത്തെ ചുരുങ്ങിയ വാടക. വരും ആഴ്ചകളില്‍ ഇതുമായി ബന്ധപ്പെട്ട കൂടുതല്‍ വിവരങ്ങളും കൂടുതല്‍ ഓപ്ഷനുകളും പോര്‍ട്ടലില്‍ പ്രസിദ്ധീകരിക്കും. അതിനാല്‍ എല്ലാവരും പോര്‍ട്ടല്‍ പരിശോധിക്കുന്നത് തുടരണമെന്നും അധികൃതര്‍ അറിയിച്ചു. ഹോട്ടലുകള്‍, റൂം ബുക്കിംഗ് വെബ്‌സൈറ്റുകള്‍ തുടങ്ങി മൂന്നാം കക്ഷികള്‍ വഴിയും താമസസൗകര്യം ബുക്ക് ചെയ്യാനുള്ള സൗകര്യവും ലഭ്യമാണ്.
