തടി (weight)പലരും സൗന്ദര്യ പ്രശ്നമായി കാണുമ്പോഴും ഇത് ആരോഗ്യപ്രശ്നമാണ് എന്നതും കൂടി ഒരു യാഥാര്ത്ഥ്യമാണ്. തടി വരുത്തുന്ന രോഗങ്ങള് ചില്ലറയല്ല. പല രോഗങ്ങള്ക്കും മൂലകാരണം തടി തന്നെയാണ്. ആരോഗ്യകരമായ ശരീരഭാരം നില നിര്ത്തിയാല് തന്നെ പല ആരോഗ്യ പ്രശ്നങ്ങള്ക്കും സ്വാഭാവികമായി പരിഹാരമാകും. സ്ത്രീകളും പുരുഷന്മാരും ഒരു പ്രായം കഴിഞ്ഞാല് തടിയ്ക്കുന്നത് സ്വാഭാവികമാണ്. ശരീരപ്രവര്ത്തനങ്ങളില് വരുന്ന മാറ്റങ്ങളാണ് കാരണമാകുന്നതും. ഈ രണ്ടു ഗണവും എടുത്തു കഴിഞ്ഞാല് പുരുഷന്മാരേക്കാള് തടിയ്ക്കാനുള്ള പ്രവണത കൂടുതല് സ്ത്രീകള്ക്കാണെന്നതാണ് വാസ്തവം. പലര്ക്കും തടി കൂടാനുള്ള കാരണങ്ങളെക്കുറിച്ച് അറിയുകില്ലതാനും. സ്ത്രീകളെ തടിപ്പിയ്ക്കുന്ന ചില പ്രത്യേക കാരണങ്ങളുണ്ട്. ചിലതെങ്കിലും നാം പോലും കരുതാത്ത ചിലതും.

​ഹോര്‍മോണ്‍ പ്രക്രിയകള്‍​

പുരുഷന്മാരെ അപേക്ഷിച്ച് സ്ത്രീകളില് ഹോര്മോണ് പ്രക്രിയകള് കൂടുതലതാണ്. ഗര്ഭം, പ്രസവം, ആര്ത്തവം, മെനോപോസ് എന്നിവയെല്ലാം തന്നെ ഹോര്മോണ് പ്രക്രിയകള് ഉള്ക്കൊള്ളുന്നതാണ്. ഇതില് ആര്ത്തവമൊഴികെ ഗര്ഭ, പ്രസവാവസ്ഥകള് സ്ത്രീകളെ പൊതുവേ തടിപ്പിയ്ക്കും. ഹോര്മോണ് വ്യതിയാനങ്ങള് ഒരു കാരണമാണ്. ഇതല്ലാതെ ഈ സമയത്ത് നാം തന്നെ വരുത്തുന്ന തെറ്റുകളാണ് മറ്റൊരു കാര്യം. ഗര്ഭകാലത്ത് രണ്ടുപേര്ക്ക് വേണ്ട ഭക്ഷണം കഴിയ്ക്കണം എന്ന് പൊതുവേ പലരും പറഞ്ഞു കേള്ക്കാറുണ്ട്. കുഞ്ഞിന്റെ ആരോഗ്യത്തെ കരുതി പലരും ഈ സമയത്ത് വലിച്ചു വാരി ഭക്ഷണം കഴിയ്ക്കും. ഇത് അമ്മയുടെ ശരീരം കൂടുതല് തടിയ്ക്കാന് ഇടയാക്കും. ഇതു പോലെ തന്നെയാണ് പ്രസവശേഷവും. പ്രസവ ശുശ്രൂഷയെന്ന പേരില് അനാവശ്യ ഭക്ഷണങ്ങള് കഴിയ്ക്കാനുള്ള പ്രവണത കൂടുതലാണ്. അമ്മയുടേയും കുഞ്ഞിന്റേയും ആരോഗ്യത്തെ കരുതിയാണ് ഇതെല്ലാം ചെയ്യുന്നതെങ്കിലും ഇത് അമ്മയുടെ ശരീരം തടിപ്പിച്ച് അനാരോഗ്യ പ്രശ്നങ്ങള് വരുത്തി വയ്ക്കുകയാണ് ചെയ്യുന്നത്.

​ഹൈപ്പോതൈറോയ്ഡ്​

സ്ത്രീകളില് ഹോര്മോണ് പ്രശ്നങ്ങള് കാരണമുണ്ടാകുന്ന അവസ്ഥകളാണ് തൈറോയ്ഡും പിസിഒഡിയുമെല്ലാം. ഇന്നത്തെ കാലത്ത് ഇവ കൂടുതലുമാണ്. പുരുഷന്മാരെ അപേക്ഷിച്ച് സ്ത്രീകളിലാണ് തൈറോയ്ഡ് പോലുള്ള അവസ്ഥകള് കൂടുന്നത്. ഇതില് തന്നെ ഹൈപ്പോതൈറോയ്ഡ് കൂടുതലാണ്. ഇത് സ്ത്രീകളെ തടിപ്പിയ്ക്കുന്നു. ഇതു പോലെയാണ് പിസിഒഡിയും. ഇതും സ്ത്രീകളെ തടിപ്പിയ്ക്കാന് കാരണമാകുന്ന ഒരു രോഗാവസ്ഥ തന്നെയാണ്. മറ്റ് കാരണങ്ങളില്ലാതെ തടി വര്ദ്ധിയ്ക്കുന്നുവെങ്കില് ഇത്തരം രോഗങ്ങളെ കുറിച്ചു കൂടി ചിന്തിയ്ക്കേണ്ടതുണ്ട്. ഇതു പോലെ ഹോര്മോണ് വ്യത്യാസങ്ങള് കാരണം മെനോപോസ് ശേഷം സ്ത്രീകള് തടിയ്ക്കുന്നത് സാധാരണയാണ്. അതുവരെ ഈസ്ട്രജന് എന്ന സ്ത്രീ ഹോര്മോണ് ശരീരത്തിലെ കൊഴുപ്പ് നീക്കാന് സഹായിക്കും. അപചയ പ്രക്രിയ ശക്തിപ്പെടുത്തിയാണ് ഇത് ചെയ്യുന്നത്. എന്നാല് മെനോപോസ് ശേഷം ഈസ്ട്രജന് കുറയുന്നു. ഇത് തടിയായി ശരീരത്തില് പ്രത്യക്ഷപ്പെടും.

​ഭക്ഷണം ​

മറ്റൊരു കാര്യം വീട്ടിലെ സ്ത്രീകള് വരുത്തുന്ന തെറ്റ് തന്നെയാണ്. ഭക്ഷണം കളയാന് പാടില്ലെന്നത് സത്യം തന്നെയാണ്. എന്നു കരുതി മറ്റുള്ളവര്, പ്രത്യേകിച്ച് കുട്ടികളും മറ്റും ബാക്കി വയ്ക്കുന്ന ഭക്ഷണങ്ങളും വീട്ടില് ബാക്കി വരുന്നതുമെല്ലാം ആവശ്യമില്ലാതെ കഴിയ്ക്കുന്ന പല സ്ത്രീകളുമുണ്ട്. ഭക്ഷണം കളയാന് പാടില്ലന്നത് വാസ്തവമാണെങ്കിലും നമ്മുടെ ശരീരം വേസ്റ്റ് ബാസ്ക്കറ്റ് അല്ലെന്നത് കൂടി നാം ഓര്ക്കണം. ഭക്ഷണം ബാക്കി വരാതിരിയ്ക്കാനുള്ള വഴികള് നോക്കുക.

​വ്യായാമം ​

വ്യായാമക്കുറവാണ് പലപ്പോഴും സ്ത്രീകളുടെ തടി അനിയന്ത്രിതമായി കൂടാനുളള മറ്റൊരു കാരണം. പലരും വീട്ടുജോലികള്ക്കുള്ളില് സമയം കണ്ടെത്താനാകാതെ വ്യായാമം മാറ്റി വയ്ക്കുന്നു. ചിലരാകട്ടെ, ഇഷ്ടം പോലെ വീട്ടുജോലികളുണ്ടല്ലോ, ഇത് വ്യായാമമാണല്ലോ എന്ന ഗണത്തില് പെടുത്തി മറ്റ് വ്യായാമം ചെയ്യാറില്ല. എന്നാല് വീട്ടുജോലികള് വ്യായാമ ഗണത്തില് പെടുത്താന് പറ്റില്ലെന്നാണ് വിദഗ്ധാഭിപ്രായം. വ്യായാമത്തിനായി വേറെ സമയം കണ്ടെത്തുക തന്നെ വേണം. ദിവസവും ചുരുങ്ങിയത് അര മണിക്കൂറെങ്കിലും.

​സ്‌ട്രെസ്, ടെന്‍ഷന്‍​

പുരുഷന്മാരെ അപേക്ഷിച്ച് ഒരുപാട് കാര്യങ്ങള് ഒരേ സമയം കൈകാര്യം ചെയ്യുന്നവരാണ് സ്ത്രീകള്. ഇത് ഇവര്ക്കുള്ള കഴിവുമാണ്. അതേ സമയം ഇത് സ്ത്രീകള്ക്ക് സ്ട്രെസ്, ടെന്ഷന് (tension)പോലുള്ളവ നല്കുന്നു. ഒരേ സമയം വീട്ടുജോലികളും ഓഫീസ് ജോലികളും മുന്നോട്ടു കൊണ്ടുപോകേണ്ടി വരുന്നതും കുട്ടികളുടെ കാര്യത്തില് കൂടുതല് ശ്രദ്ധ വയ്ക്കേണ്ടി വരുന്നതുമെല്ലാം തന്നെ സ്ട്രെസ് കാരണമാകുന്നു. സ്ട്രെസ് വരുത്തുന്ന ഹോര്മോണ് പ്രശ്നങ്ങള് തടി വയ്ക്കാന് കാരണവുമാകുന്നു. പിന്നൊന്ന് ചിന്താഗതിയുടെ പ്രശ്നമാണ്. വിവാഹശേഷം, കുട്ടികളുണ്ടായ ശേഷം ഇനി എന്ത് സൗന്ദര്യം എന്നു ചിന്തിയ്ക്കുന്നവര് ധാരാളമുണ്ട്. ഈ ചിന്താഗതി ആദ്യം മാറ്റണം. ആരോഗ്യവും സൗന്ദര്യവും പരസ്പരം ബന്ധപ്പെട്ടു കിടക്കുന്നവെന്നത് പ്രധാനമാണെന്നോര്ക്കുക.