നാളെ എല്‍ഡിഎഫ് എംഎല്‍എ തങ്ങളെ കുത്തിക്കൊന്നാല്‍ നിയമസഭയുടെ പ്രിവിലേജ് കിട്ടുമോ? വിഡി സതീശൻ

തിരുവനന്തപുരം: നിയമസഭ കയ്യാങ്കളി കേസ് പിൻവലിക്കാനുള്ള സർക്കാർ നീക്കത്തിനെതിരെ രൂക്ഷവിമർശനവുമായി പ്രതിപക്ഷ നേതാവ് വിഡി സതീശൻ. സഭയില്‍ ക്രിമിനല്‍ പ്രവര്‍ത്തനം നടത്തിയാല്‍ വിചാരണ നേരിടണം. കേസ് പിന്‍വലിക്കാന്‍ ഗവണ്‍മെന്‍റിനെ അനുവദിച്ചാല്‍ നാളെ ഒരു എല്‍ഡിഎഫ് എംഎല്‍എ തങ്ങളെ ആരെയെങ്കിലും കുത്തിക്കൊന്നാല്‍ നിയമസഭയുടെ പ്രിവിലേജ് കിട്ടുമോയെന്നും അദ്ദേഹം ചോദിച്ചു.



ഇന്ത്യയില്‍ ഒരു കോടതിയും സര്‍ക്കാരിന്‍റെ നിയമപരമല്ലാത്ത ആവശ്യം അംഗീകരിക്കുമെന്ന് തോന്നുന്നില്ലെന്നും പ്രതിപക്ഷ നേതാവ് പറഞ്ഞു. നിയമസഭാ കയ്യാങ്കളി കേസിൽ സപ്രീംകോടതിൽ സർക്കാർ ഉന്നയിച്ച വാദങ്ങളോടുള്ള പ്രതികരണമെന്നോണമാണ് വിഡി സതീശന്‍റെ വാക്കുകൾ. നിയമസഭയ്ക്ക് അകത്ത് സംസാരിക്കുന്ന കാര്യങ്ങളുടെ പേരിൽ കേസെടുക്കാൻ പാടില്ല എന്നതാണ് അംഗങ്ങൾക്കുള്ള പ്രിവിലേജ്. എന്നാൽ നിയമസഭയിലോ പാർലമെന്‍റിലോ ക്രിമിനൽ കുറ്റം ചെയ്താൽ അതിലെങ്ങനെയാണ് ഇളവ് ലഭിക്കുകയെന്നും അദ്ദേഹം ചോദിച്ചു.

Also Read : പിഎസ് ശ്രീധരൻ പിള്ള ഗോവ ഗവർണ്ണർ; ഡോ. ഹരി ബാബു കമ്പംപാട്ടി മിസോറാമിലെ പുതിയ ഗവർണർ



നിയമസഭയുടെ പൊതുസ്വത്ത് നശിപ്പിച്ചത് നിയമവിരുദ്ധമായ കാര്യമാണെന്നും, അത് ക്രിമിനല്‍ കുറ്റമാണെന്നും പ്രതിപക്ഷ നേതാവ് ചൂണ്ടിക്കാട്ടി. പൊതുസ്വത്ത് നശിപ്പിക്കുന്നത് ക്രിമിനല്‍ കുറ്റമല്ല, അതിന് പ്രിവലേജുണ്ട് എന്ന് കോടതി തീരുമാനിച്ചാല്‍ നാളെ, ഒരാളെ കുത്തിക്കൊന്നാല്‍ ആ പ്രിവിലേജ് കിട്ടുമോയെന്നും വിഡി സതീശൻ ചോദിച്ചതായി മാതൃഭൂമി റിപ്പോർട്ട് ചെയ്തു.

‘കോൺഗ്രസല്ല ബിജെപി, അച്ചടക്കലംഘനം നടത്തിയാൽ നടപടി’: വിവാദങ്ങൾക്കിടെ മുന്നറിയിപ്പുമായി സുരേന്ദ്രൻ

കെഎം മാണിയുമായി ബന്ധപ്പെട്ട വിവാദങ്ങൾക്ക് വിജയരാഘവൻ നൽകിയ മറുപടിയോട് പ്രതികരിച്ച സതീശൻ കെഎം മാണിയേക്കുറിച്ചും അദ്ദേഹത്തിന്‍റെ കുടുംബത്തെക്കുറിച്ചും ഉന്നയിച്ച ഗുരുതരവും അവഹേളനപരവുമായ ആരോപണം പിന്‍വലിച്ച് മാപ്പ് പറയാന്‍ സിപിഎം സംസ്ഥാന സെക്രട്ടറി തയ്യാറുണ്ടോയെന്നും ചോദിച്ചു. സ്വന്തം പിതാവിനെ സുപ്രീം കോടതിയില്‍ അപമാനിച്ചതിനും അവഹേളിച്ചതിനു് ജോസ് കെ മാണി നടപടി സ്വീകരിക്കട്ടെയെന്നും പ്രതിപക്ഷ നേതാവ് പറഞ്ഞു.