ഒന്നാം എന്‍.ഡി.എ. സര്‍ക്കാര്‍ ഭരണത്തിലേറി അധികം വൈകാതെ ‘ബീഫ്’ വാര്‍ത്തകളില്‍ ചൂടുള്ള വിഷയമായി. ബീഫ് നിരോധിക്കണമെന്നും പാടില്ലെന്നുമുള്ള ചർച്ചകളിലേക്ക് സമൂഹത്തെയാകെ ചുരുക്കാൻ അവർക്കായി. രാജ്യത്തെ റോഡുകള്‍ മുതല്‍ യൂണിവേഴ്‌സിറ്റികള്‍ വരെ വലിയ പ്രതിഷേധങ്ങളുടെ അരങ്ങുകളായി. പശുവിന്റെ പേരില്‍ ആള്‍ക്കൂട്ട കൊലപാതകങ്ങള്‍ സ്ഥിരം സംഭവമായി. ബി.ജെ.പി. അഴിച്ചുവിട്ട ‘പശു രാഷ്ട്രീയം’, നാനാത്വത്തിലെ ഏകത്വത്തിലും സാഹോദര്യത്തിലും സഹവര്‍ത്തിച്ചിരുന്ന ഒരു ജനതയെ ഭിന്നിപ്പിക്കുന്നതിലേക്കെത്തിച്ചു. ഭിന്നിപ്പിലേക്കെത്താനുള്ള ചരിത്ര പശ്ചാത്തലങ്ങളും ഒട്ടനവധിയാണ്. തങ്ങള്‍ തുറന്നുവിട്ട ഭൂതം ഒടുവില്‍ തങ്ങള്‍ക്ക് തന്നെ വിനയാകുമെന്ന നിലയിലെത്തിയപ്പോഴാണ് ബി.ജെ.പി. നേതാക്കള്‍ക്ക് മാറിച്ചിന്തിക്കേണ്ടി വന്നത്. സാമ്പത്തിക കാരണങ്ങളും ഇതിന് പിന്നിലുണ്ടാകാം. ഇത്തരം കാര്യങ്ങളില്‍ ഇപ്പോള്‍ മൃദുസമീപനമാണെങ്കിലും പൂര്‍ണമായി പശു രാഷ്ട്രീയം ഉപേക്ഷിക്കാന്‍ ബി.ജെ.പിക്ക് കഴിഞ്ഞിട്ടില്ല. ബി.ജെ.പി. ഭരിക്കുന്ന സംസ്ഥാനങ്ങളില്‍ ആളുകള്‍ എന്ത് കഴിക്കണം, എന്ത് കഴിക്കരുത് എന്ന് തീരുമാനിക്കാനുള്ള അവകാശം ഹിന്ദുത്വ സംഘടനകള്‍ ഏറ്റെടുത്തിരിക്കുകയാണ്. ഒരുപടി കൂടി കടന്ന് എന്ത് വില്‍ക്കണം, വില്‍ക്കരുത് എന്നു കൂടി അവര്‍ പറയുന്നു.
നവരാത്രിയോടനുബന്ധിച്ച് ഒമ്പത് ദിവസം കശാപ്പുശാലകള്‍ അടച്ചിടണമെന്ന് കഴിഞ്ഞ ഏപ്രിലിലാണ് സൗത്ത് ഡെല്‍ഹി മുന്‍സിപ്പല്‍ കോര്‍പ്പറേഷനും ഗാസിയാബാദ് ജില്ലാ ഭരണകൂടവും അറിയിപ്പ് പുറത്തുവിടുന്നത്. ഗാസിയാബാദില്‍ കുറച്ച് വര്‍ഷങ്ങള്‍ക്ക് മുമ്പ് നവരാത്രി കാലത്ത് ‘നോണ്‍-വെജ്’ ഭക്ഷണം കഴിക്കുന്നതിന് നിരോധനം പോലുമുണ്ടായിരുന്നു. ഇത്തരം നിരോധനങ്ങള്‍ക്ക് യാതൊരു നിയമസാധുതയുമില്ലെങ്കിലും കുറച്ച് വര്‍ഷങ്ങളായി ഈ സ്ഥിതി തുടരുകയാണ്. പശ്ചിമബംഗാളിലും മറ്റും നവരാത്രി കാലത്ത് മാംസം കഴിക്കരുതെന്ന ആഹ്വാനത്തിനെതിരേ വലിയ പ്രതിഷേധങ്ങളാണ് നടന്നത്.
എന്നാല്‍ ഇപ്പോള്‍ ബീഫിനെയും മറ്റു മാംസങ്ങളെയും വിട്ട് ഹലാല്‍ ഭക്ഷണത്തിന് പിന്നാലെയാണ് ഹിന്ദുത്വ സംഘടനകള്‍. ദീപാവലി ആഘോഷങ്ങളില്‍ ഹലാല്‍ ലേബലിലുള്ള ഭക്ഷണ പദാര്‍ത്ഥങ്ങള്‍ ബഹിഷ്‌കരിക്കണമെന്ന ആഹ്വാനവുമായി കര്‍ണാടകയില്‍ തീവ്ര ഹിന്ദുത്വ സംഘടനകളായ ഹിന്ദു ജനജാഗ്രത സമിതി, ശ്രീരാമ സേനയും രംഗത്തെത്തിയിരിക്കുകയാണ്. ഹലാല്‍, നോണ്‍ ഹലാല്‍ എന്ന് വേര്‍തിരിച്ചു ഹോട്ടലുകളില്‍ ഭക്ഷണം വിളമ്പണമെന്നാണ് ഇവരുടെ ആവശ്യം. ആഗോള തലത്തില്‍ ഹോട്ടല്‍ ശൃംഖലകളുള്ള കെ.എഫ്.സി., മക്ഡോണാള്‍ഡ്സ് എന്നിവയുടെ കര്‍ണാടകയിലുള്ള കേന്ദ്രങ്ങള്‍ക്ക് മുന്‍പിലാണ് ഹലാല്‍ ഭക്ഷണമെന്ന ആവശ്യവുമായി പ്രതിഷേധം സംഘടിപ്പിച്ചത്. ഇന്ത്യയില്‍ ഹോട്ടലുകളില്‍ അമുസ്ലിമുകള്‍ക്ക് ഹലാല്‍ ഭക്ഷണം നല്കരുതെന്നാണ് ഇവര്‍ ആവശ്യപ്പെടുന്നത്. ‘ഹലാല്‍ ഫ്രീ ദീപാവലി’ എന്ന പേരിലാണ് ഈ പ്രതിഷേധങ്ങള്‍.
ഹലാല്‍ ഫ്രീ ദീപാവലിക്ക് ആഹ്വാനം ചെയ്ത ശ്രീരാമസേനാ മേധാവി പ്രമോദ് മുത്തലിക് വിചിത്രമായ വാദങ്ങളാണ് ഉന്നയിക്കുന്നത്. മുസ്ലിം കച്ചവടക്കാരില്‍ നിന്ന് പൂജാ സാധനങ്ങള്‍ വാങ്ങുന്നത് ഹിന്ദു സംസ്‌കാരത്തിനും പാരമ്പര്യത്തിനും എതിരാണെന്ന് മുത്തലിക് പറയുന്നു. മതങ്ങള്‍ സൗഹാര്‍ദ്ദപരമായ മൂല്യങ്ങള്‍ ഉയര്‍ത്തിപ്പിടിക്കുന്ന ഭരണഘടനയുള്ള രാജ്യത്ത് ഇത്തരം പ്രസ്താവനകള്‍ വര്‍ഗീയ ധ്രുവീകരണത്തിനു മാത്രമാണ് വഴിവെക്കുക.
ഹലാല്‍ എന്ന അറബി വാക്കിന്റെ അര്‍ത്ഥം മതപരമായി അനുവദിക്കപ്പെട്ടത് എന്നാണ്. മുസ്ലിം മതത്തില്‍ അനുവദനീയമായ മൃഗങ്ങളുടെ മാംസം മതം അനുശാസിക്കുന്ന രീതിയില്‍ കശാപ്പു ചെയ്യുന്നതാണ് ഹലാല്‍. ഹലാല്‍ ഭക്ഷണമാണെന്ന സാക്ഷ്യപത്രത്തോടെ മാത്രമാണ് മുസ്ലിം രാഷ്ട്രങ്ങളിലേക്ക് ഭക്ഷണപദാര്‍ത്ഥങ്ങള്‍ കയറ്റി അയക്കുക. വ്യത്യസ്ത മതങ്ങള്‍ക്കിടയില്‍ വിശ്വാസങ്ങള്‍ ആചാരങ്ങള്‍ എന്നിവയുമായി ബന്ധപ്പെട്ട് കഴിക്കാന്‍ പറ്റുന്നതും അല്ലാത്തതുമായ ഭക്ഷണങ്ങള്‍ സ്വാഭാവികമായും ഉണ്ടാകും. മറ്റു സെമറ്റിക് മതങ്ങളുടെ ഭക്ഷണ രീതികള്‍ പരിശോധിച്ചാല്‍ ഇത്തരത്തിലുള്ള സമാനത കാണാന്‍ സാധിക്കും. എന്നിട്ടും ഹലാല്‍ ഫ്രീ ദീപാവലി എന്ന മുദ്രാവാക്യം മാത്രം ഉയര്‍ത്തികൊണ്ടു വരുന്നതിന്റെ പിന്നിലെ ലക്ഷ്യം എന്തായിരിക്കും? ബീഫ് നിരോധനത്തില്‍ നിന്ന് ഹലാല്‍ ഫ്രീ ഭക്ഷണത്തിലേക്ക് ഇവരെ എത്തിച്ചത് എന്താണ്?
‘ബൃഹദ് ബെംഗളൂരു മഹാനഗര പാലികെ’ (ബിബിഎംപി)യുടെ റിപ്പോര്‍ട്ട് അനുസരിച്ച് ബെംഗളൂരുവില്‍ മാത്രം 3000 കശാപ്പ് ശാലകളുണ്ട്. കശാപ്പ് കച്ചവടക്കാരില്‍ ഏറെയും മുസ്ലിങ്ങളും പിന്നാക്ക വിഭാഗത്തില്‍പ്പെട്ടവരുമാണ്. ഒരാഴ്ചയില്‍ ഏകദേശം ഒരു ലക്ഷം രൂപ വരെയാണ് ഇവരുടെ വരുമാനം.
തീവ്ര ഹിന്ദു സംഘടനകളുടെ ആഹ്വാനത്തിന് സര്‍ക്കാര്‍ വഴങ്ങിയാല്‍, കച്ചവടക്കാര്‍ക്ക് ഏകദേശം 3 കോടി രൂപയുടെ നഷ്ടമുണ്ടാക്കുമെന്നാണ് പറയുന്നത്. ഇത്തരം സ്റ്റാളുകളില്‍ ദിവസവേതനത്തിന് ജോലി ചെയ്തുവരുന്ന സാധാരണ തൊഴിലാളികളെയായിരിക്കും ഇത് പ്രതിസന്ധിയിലാക്കുക. മറ്റുള്ളവരുടെ വിശ്വാസങ്ങളെ മുന്‍നിര്‍ത്തി സാമ്പത്തികമായി മുസ്സീം വിഭാഗത്തെ പ്രതിരോധത്തിലാക്കാനാണ് ഇത്തരം തീവ്ര ഹിന്ദു സംഘടനകള്‍ ലക്ഷ്യമിടുന്നതെന്നത് ഇതിലൂടെ വ്യക്തമാണ്.
കര്‍ണാടക മുന്‍ ഉപമുഖ്യമന്ത്രിയും ബി.ജെ.പിയുടെ മുതിര്‍ന്ന നേതാവുമായ ഈശ്വരപ്പയും ഇവിടത്തെ തീവ്ര ഹിന്ദുത്വവാദികളുടെ ഹലാല്‍ വിരുദ്ധ ഉൽപ്പന്ന കാമ്പയിനിനെ പിന്തുണച്ച് രംഗത്തെത്തിയിരുന്നു. ദീപാവലിയും മറ്റു ഉത്സവങ്ങളും എല്ലാ വിഭാഗം ആളുകളുടെയും ഉത്സവമായി കണ്ട് ഒത്തൊരുമിച്ച് ആഘോഷിക്കേണ്ട ഇടത്താണ് ഒരു മതത്തെ മാറ്റിനിര്‍ത്തി ഇത്തരത്തിലുള്ള വിദ്വേഷങ്ങള്‍ പ്രചരിപ്പിക്കുന്നത്.
ഭക്ഷണത്തില്‍ മന്ത്രിച്ചൂതുന്ന മുസ്ലീം പുരോഹിതന്റെ വീഡിയോ പങ്കു വെച്ച് കേരളത്തില്‍ ബിജെപി ഹലാല്‍ വിവാദത്തിന് വഴി വെച്ചിരുന്നു. കാസര്‍കോട് നിന്നുള്ള ഒരു വീഡിയോയാണ് ഹലാല്‍, താലിബാന്‍ ആരോപണങ്ങളുമായി ബി.ജെ.പി. പ്രചരിപ്പിച്ചത്. ബി.ജെ.പി. സംസ്ഥാന അധ്യക്ഷന്‍ കെ. സുരേന്ദ്രനും ഇത് സംബന്ധിച്ച് ഫേസ്ബുക്ക് കുറിപ്പ് പങ്കുവെച്ചിരുന്നു.
ലക്നൗ ലുലുമാളില്‍ ഒരു സംഘം ആളുകള്‍ നിസ്‌കരിക്കുന്ന വീഡിയോ സാമൂഹ്യമാധ്യമങ്ങളില്‍ പ്രചരിച്ചപ്പോള്‍ വലിയ വിവാദങ്ങള്‍ക്ക് വഴി വെച്ചിരുന്നു. ഇതേ തുടര്‍ന്ന് വലതുപക്ഷ സംഘടനായ അഖില ഭാരത ഹിന്ദു മഹാസഭയുടെ പ്രവര്‍ത്തകര്‍ മാളില്‍ നിസ്‌കരിക്കാന്‍ അനുവദിച്ചാല്‍ സുന്ദരകാണ്ഡം വായിക്കുമെന്ന് മുദ്രാവാക്യവുമായെത്തിയത് അധികൃതരെ പ്രതിരോധത്തിലാക്കി. നിസ്‌കരിക്കുന്ന വിഡിയോയ്ക്ക് പുറമേ വിവേചനപരമായ തൊഴില്‍ നിയമങ്ങളാണ് മാളില്‍ നടക്കുന്നതെന്നും, ലൗ ജിഹാദ് തുടങ്ങി മറ്റു ആരോപണങ്ങളും മാളിനെ കുറിച്ച് ഹിന്ദു സംഘടനകള്‍ പ്രചരിപ്പിച്ചു കൊണ്ടേയിരുന്നു.
എന്നാല്‍ മാളിലെ അധികൃതര്‍ പുറത്ത് വിട്ട സി.സി.ടി.വി ദൃശ്യങ്ങളില്‍ നിന്ന് നിസ്‌കരിക്കുകയായിരുന്നില്ല ഇവരുടെ ഉദ്ദേശ്യമെന്ന് വ്യക്തമായി. ഇവര്‍ മാളുമായി ബന്ധപ്പെട്ടവരല്ലെന്നും അധികൃതര്‍ സൂചിപ്പിക്കുന്നുണ്ട്. നിസ്‌കാരത്തെ കുറിച്ച് കൃത്യമായ ധാരണ ഇല്ലത്താവരാണ് മാളിലെത്തിയതെന്ന് അഡിഷണല്‍ ഡെപ്യൂട്ടി പോലീസ് കമ്മീഷണര്‍ രാജേഷ് കുമാര്‍ ശ്രീവാസ്തവയും പറഞ്ഞു.
ഈ നിസ്‌കാരവുമായി ബന്ധപ്പെട്ടുള്ള മതസ്പര്‍ദയും വിദ്വേഷ പ്രസംഗങ്ങളും രാജ്യത്തിനകത്ത് അങ്ങോളമിങ്ങോളം ദിവസങ്ങള്‍ നീണ്ട ചര്‍ച്ചകള്‍ക്ക് വഴിവെച്ചപ്പോള്‍ പ്രശ്‌നങ്ങളുണ്ടാക്കാന്‍ ശ്രമിക്കുന്നവര്‍ക്കെതിരെ ക്രിമിനല്‍ നടപടി സ്വീകരിക്കണമെന്ന് സര്‍ക്കാര്‍ ഉത്തരവിടുകയാണ് ഉണ്ടായത്.
ഹിന്ദുത്വ അജണ്ടകള്‍ പ്രാബല്യത്തില്‍ വരുത്തുക എന്ന ലക്ഷ്യം വെച്ച് പ്രവര്‍ത്തിക്കുന്ന ബി.ജെ.പി. പ്രതിനിധാനം ചെയ്യുന്ന സര്‍ക്കാര്‍ മുഖ്യമന്ത്രിക്ക് ലുലു മാളിനു വേണ്ടി ഇത്തരമൊരു ഉത്തരവ് ഇറക്കേണ്ടി വന്നിട്ടുണ്ടെങ്കില്‍ അതിനു പിന്നില്‍ മറ്റു വാണിജ്യ സ്ഥാപിത താല്പര്യങ്ങളുണ്ടാകുമെന്ന് സ്വാഭാവികളെയും അനുമാനിക്കാം. ഇന്ത്യയില്‍ കുത്തകകളില്‍ നിന്ന് ഏറ്റവുമധികം സംഭാവന കൈപ്പറ്റുന്നത് ബി.ജെ.പിയാണെന്നുള്ള റിപ്പോര്‍ട്ടുകള്‍ നേരത്തെ പുറത്തു വന്നിട്ടുള്ളതാണ്. ആഗോള തലത്തില്‍ തന്നെ തല ഉയര്‍ത്തി നില്‍ക്കുന്ന സാമ്പത്തിക ഭീമന്മാരുടെ പട്ടികയില്‍ ഉള്‍പ്പെട്ട ലുലു ഗ്രൂപ്പിനു വേണ്ടി ബി.ജെ.പി. മുഖ്യമന്ത്രി ഇത്തരമൊരു ഇടപെടല്‍ നടത്തിയത് വെറുതെയായിരിക്കില്ലെന്ന് സാരം.
വിദ്വേഷ പ്രസംഗങ്ങള്‍ നടത്തുന്നവര്‍ക്കെതിരെ മതം നോക്കാതെ കേസെടുക്കണമെന്ന് സുപ്രീം കോടതി ഇടക്കാല ഉത്തരവിടുകയുണ്ടായി. പരാതിക്ക് കാത്തുനില്ക്കാതെ സ്വമേധയാ കേസ് എടുക്കണമെന്നാണ് ഡല്‍ഹി, ഉത്തരാഖണ്ഡ്, ഉത്തര്‍ പ്രദേശ് സര്‍ക്കാരുകളോടാണ് സുപ്രീം കോടതി ആവശ്യപ്പെട്ടത്. ഉത്തരവില്‍ കോടതി നിരീക്ഷിച്ച കാര്യങ്ങള്‍ പ്രാധാന്യമര്‍ഹിക്കുന്നതാണ്. മതനിരപേക്ഷ രാജ്യമെന്ന നിലയില്‍, ഇന്ത്യയില്‍ വ്യത്യസ്ത മതവിഭാഗങ്ങള്‍ക്ക് സൗഹാര്‍ദ്ദപരമായി ജീവിക്കാന്‍ കഴിയില്ലെങ്കില്‍ സാഹോദര്യം സാധ്യമല്ലെന്ന് കോടതി ചൂണ്ടിക്കാട്ടുന്നുണ്ട്. ഇന്ത്യയില്‍ മുസ്ലിം വിഭാങ്ങള്‍ക്കെതിരെ നടക്കുന്ന വിദ്വേഷ പ്രസംഗങ്ങളില്‍ അടിയന്തര ഇടപെടലാവശ്യപ്പെട്ട് ഷഹീന്‍ അബ്ദുല്ല നല്‍കിയ ഹര്‍ജിയിലാണ് സുപ്രീം കോടതിയുടെ ഈ ഇടക്കാല ഉത്തരവ്. മുസ്ലിം വിഭാഗത്തെ ലക്ഷ്യമാക്കിയുള്ള കുറ്റകൃത്യങ്ങളില്‍ നിഷ്പക്ഷ അന്വേഷണം നടത്താന്‍ കേന്ദ്ര- സംസ്ഥാന സര്‍ക്കാരുകള്‍ക്ക് കോടതി നിര്‍ദേശം നല്‍കണമെന്നാണ് ഹര്‍ജിയില്‍ ആവശ്യമുണ്ടായിരുന്നത്.
ഭരണഘടനയിലെ മൗലിക കര്‍ത്തവ്യങ്ങള്‍ പറയുന്നത് ശാസ്ത്രീയ കാഴ്ചപ്പാട് വളര്‍ത്തിയെടുക്കണമെന്നാണ്. ഇത് ഇരുപത്തൊന്നാം നൂറ്റാണ്ടാണ്. എന്നാല്‍ മതത്തിന്റെ പേരില്‍ നമ്മള്‍ എവിടെ എത്തി നില്‍ക്കുന്നുവെന്നും, ഇത് പരിതാപകരമാണെന്നും, ഹര്‍ജി പരിഗണിച്ച ബെഞ്ചിന്റെ അധ്യക്ഷനായ ജസ്റ്റിസ് കെ.എം. ജോസഫ് പറഞ്ഞു. ഒരു സമുദായത്തിനെതിയുള്ള പരാമര്‍ശങ്ങള്‍ മാത്രമാണ് കോടതിയില്‍ വന്നിരിക്കുന്നത്. ആരെയും ലക്ഷ്യം വെക്കാനുള്ള സ്ഥാപനമായി സുപ്രീം കോടതിയെ കണക്കാകാനാകില്ല. ഇത്തരം പ്രസ്താവനകള്‍ ആര് നടത്തിയാലും അപലപനീയമാണെന്നും ബഞ്ചിലെ അംഗമായ ഋഷികേശ് റോയും അഭിപ്രായപ്പെട്ടു.
ഇത്തരം ഹിന്ദു തീവ്ര സംഘടനകളുടെ മതസ്പർദ്ധ വളർത്തുന്ന പ്രചരണങ്ങൾക്ക് ഒളിഞ്ഞും, തെളിഞ്ഞുമുള്ള ബിജെപി നേതാക്കളുടെ പിന്തുണ വേണ്ടുവോളമുണ്ട്. ബിജെപി രാഷ്ട്രീയ മുതലെടുപ്പ് നടത്താൻ ഇത്തരം തീവ്ര ഹിന്ദുത്വ സംഘടനകളെ കൂട്ടുപിടിക്കുന്നു എന്നത് ഇതിലൂടെ വ്യക്തമാണ്. അതേസമയം ഇത്തരം പ്രചരണങ്ങൾ കുത്തക സ്ഥാപനങ്ങളെ പ്രതിസന്ധിയിലാക്കുമ്പോൾ അവിടെ ബിജെപിക്ക് നയം മാറ്റേണ്ടി വരുന്നു. കുത്തക മുതലാളിമാരെയോ, കമ്പനികളെയോ വിഷയം ബാധിക്കുമ്പോൾ അവർക്ക് അനുകൂലമായ നിലപാട് ബിജെപി സർക്കാർ എടുക്കന്നത് കാണാം. മാത്രമല്ല ഒരു മതവിഭാഗത്തെ മാത്രം മുൻനിർത്തി ഇത്തരം വിദ്വേഷ പ്രചരണങ്ങൾക്കെതിരെ മതനിരപേക്ഷ ഇന്ത്യ എന്നറിയപ്പെടുന്ന രാജ്യത്തിൻറെ പ്രധാനമന്ത്രി പ്രതികരിക്കാത്തത് ഇത്തരം സംഘർഷഭരിത അന്തരീഷം സൃഷ്ടിക്കുന്നവർക്കുള്ള മൗനാനുവാദം കൂടിയാണ്.
