വൈദ്യുതിക്കൊപ്പം കടലല്‍ ജലത്തില്‍ നിന്ന് കുടിവെള്ളവും; ഖത്തറിലെ ഉമ്മുല്‍ ഹലൂം പ്ലാന്റ് വികസിപ്പിച്ചു

ദോഹ: വൈദ്യുതിയോടൊപ്പം പവര്‍ പ്ലാന്റില്‍ ഉപയോഗിക്കുന്ന കടല്‍ വെള്ളം ശുദ്ധീകരിച്ച് കുടിവെള്ളം ലഭ്യമാക്കുന്ന ഖത്തറിലെ ഉമ്മുല്‍ ഹലൂല്‍ പവര്‍ പ്ലാന്റ് പദ്ധതി കൂടുതല്‍ വികസിപ്പിച്ചു. നിലവിലുള്ള പ്ലാന്റിന്റെ ശേഷി വന്‍തോതില്‍ വര്‍ധിപ്പിക്കുന്ന ഉം ഹലൂല്‍ കമ്പനിയുടെ വികസന പദ്ധതി പ്രധാനമന്ത്രിയും ആഭ്യന്തര മന്ത്രിയുമായ ശെയ്ഖ് ഖാലിദ് ബിന്‍ ഖലീഫ ബിന്‍ അബ്ദുല്‍ അസീസ് അല്‍താനി, ഊര്‍ജ മന്ത്രി സഅദ് ശെരീദ അല്‍ കഅബി എന്നിവരുടെ സാന്നിധ്യത്തില്‍ കമ്മീഷന്‍ ചെയ്തു.



രാജ്യത്തിന്റെ വൈദ്യുതി, കുടിവെള്ള സ്വയം പര്യാപ്തതയില്‍ വന്‍ മുന്നേറ്റമാണ് പ്ലാന്റിന്റെ വികസനത്തിലൂടെ സാധ്യമായിരിക്കുന്നതെന്ന് പ്രധാനമന്ത്രി പറഞ്ഞു. രാജ്യത്തെ വൈദ്യുതി ആവശ്യത്തിന്റെ 30 ശതമാനവും കടല്‍ വെള്ളം ശുദ്ധീകരിച്ച ഡീസാലിനേറ്റഡ് വെള്ളത്തിന്റെ 40 ശതമാനവും നല്‍കുന്നത് ഉമ്മുല്‍ ഹലൂല്‍ പവര്‍ സ്റ്റേഷന്‍ ആണ്. വികസനത്തിനത്തോടെ പ്ലാന്റിന്റെ കടല്‍വെള്ള ശുദ്ധീകരണ ശേഷി പ്രതിദിനം 61.4 ദശലക്ഷം ഗാലന്‍ വര്‍ധിച്ചു. ഇതോടെ 2,520 മെഗാവാട്ട് വൈദ്യുതിയും 197.9 ദശലക്ഷം ഗാലന്‍ ശുദ്ധജലവും ഉല്‍പ്പാദിപ്പിക്കാനുള്ള ശേഷിയാണ് പ്ലാന്റ് കൈവരിച്ചിരിക്കുന്നത്.

Also Read: സ്‌പോണ്‍സറെ തലക്കടിച്ച് കൊലപ്പെടുത്തിയ പ്രവാസി ഡ്രൈവര്‍ അറസ്റ്റില്‍

കൊവിഡ് ഉയര്‍ത്തിയ വെല്ലുവിളികള്‍ക്കിടയിലും പ്ലാന്റിന്റെ വികസന പദ്ധതി വിജയകരമായി പൂര്‍ത്തീകരിക്കാനാത് അഭിമാനകരമായ നേട്ടമാണെന്ന് ഊര്‍ജ മന്ത്രി അഭിപ്രായപ്പെട്ടു. ആഗോള തലത്തില്‍ സാമ്പത്തിക മേഖലയില്‍ വലിയ വെല്ലുവിളികള്‍ കൊവിഡ് ഉയര്‍ത്തിയെങ്കിലും അവയൊക്കെ മറികടക്കാന്‍ സധിച്ചെന്നും അദ്ദേഹം പറഞ്ഞു. പവര്‍ പ്ലാന്റില്‍ കൂളിംഗിനായി ഉപയോഗിക്കുന്ന വെള്ളമാണ് ഉപ്പ് വിമുക്തമാക്കി കുടിവെള്ളമാക്കി മാറ്റുന്നത്.