സ്റ്റാൻ സ്വാമിയ്ക്കെതിരെയുള്ളത് ഗുരുതര കുറ്റങ്ങള്‍; ‘മനുഷ്യാവകാശം സംരക്ഷിക്കാൻ ഇന്ത്യ പ്രതിജ്ഞാബദ്ധം’: കേന്ദ്രം

ന്യൂഡൽഹി: യുഎൻ മനുഷ്യാവകാശ സംഘടന ഉള്‍പ്പെടെ നിരവധി അന്താരാഷ്ട്ര ഏജൻസികള്‍ വിമര്‍ശനമുന്നയിച്ചതിനു പിന്നാലെ മനുഷ്യാവകാശ പ്രവര്‍ത്തകൻ സ്റ്റാൻ സ്വാമിയുടെ മരണത്തിൽ വിശദീകരണവുമായി കേന്ദ്രസര്‍ക്കാര്‍. സ്റ്റാൻ സ്വാമി നിയമനടപടികളുടെ ഭാഗമായാണ് ജയിലിലായതെന്ന് കേന്ദ്ര വിദേശകാര്യമന്ത്രാലയം വ്യക്തമാക്കി.



ഫാ. സ്റ്റാൻ സ്വാമിയുടെ മരണത്തിൽ ദുഖവും അസ്വസ്ഥതയുമുണ്ടെന്നും രവിചാരണ കൂടാതെ 84കാരനായ വൈദികനെ തടവിലാക്കിയത് അംഗീകരിക്കാനാകില്ലെന്നും യുഎൻ മനുഷ്യാവകാശ സംഘടന വ്യക്തമാക്കിയിരുന്നു. കൂടാതെ ഇത്തരത്തിൽ തടവിൽ പാര്‍പ്പിച്ചിരിക്കുന്നവരെ വിട്ടയയ്ക്കണമെന്നും യുഎൻഎച്ച്ആര്‍സി ആവശ്യപ്പെട്ടു. ഇതിനു പിന്നാലെയാണ് കേന്ദ്രവിദേശകാര്യ മന്ത്രാലയത്തിൻ്റെ വിശദീകരണം.

Also Read: ശിവഗിരി മുൻ മഠാധിപതി സ്വാമി പ്രകാശാനന്ദ അന്തരിച്ചു

ഫാദര്‍ സ്റ്റാൻ സ്വാമിയ്ക്കെതിരെ ചുമത്തിയിട്ടുള്ളത് ഗുരുതരമായ കുറ്റങ്ങളാണെന്ന് കേന്ദ്രം വ്യക്തമാക്കി. ഈ കുറ്റങ്ങളുടെ ഗൗരവം നിമിത്തമാണ് രാജ്യത്തെ കോടതികള്‍ സ്റ്റാൻ സ്വാമിയ്ക്ക് ജാമ്യം നിഷേധിച്ചത്. ഇന്ത്യ മനുഷ്യാവകാശങ്ങള്‍ സംരക്ഷിക്കാൻ പ്രതിജ്ഞാബദ്ധമാണെന്നും കേന്ദ്രതലത്തിലും സംസ്ഥാനങ്ങളിലും മനുഷ്യാവകാശ കമ്മീഷനുകള്‍ പ്രവര്‍ത്തിക്കുന്നുണ്ടെന്നും വിദേശകാര്യ മന്ത്രാലയം അറിയിച്ചു. കൂടാതെ രാജ്യത്ത് സ്വതന്ത്രമായ നീതിന്യായ വ്യവസ്ഥയാണുള്ളതെന്നും അവര്‍ പ്രസ്താവനയിൽ കുറിച്ചു.

Also Read: കൊളംബിയയെ ഷൂട്ടൗട്ടില്‍ വീഴ്ത്തി അര്‍ജന്റീന; രക്ഷകനായി മാര്‍ട്ടിനെസ്, ഇനി ഫൈനൽ

തിങ്കളാഴ്ച രാവിലെയാണ് ജെസ്യൂട്ട് വൈദികനും മനുഷ്യാവകാശ പ്രവര്‍ത്തകനുമായ ഫാദര്‍ സ്റ്റാൻ സ്വാമി അന്തരിച്ചത്. ഭീമ കൊറേഗാവ് കേസുമായി ബന്ധപ്പെട്ട് യുഎപിഎ ചുമത്തപ്പെട്ട് തടവിലായ അദ്ദേഹം മുംബൈയിലെ സ്വകാര്യ ആശുപത്രിയിൽ വെച്ചാണ് മരിച്ചത്. ആരോഗ്യപ്രശ്നങ്ങള്‍ അലട്ടിയിരുന്ന അദ്ദേഹത്തിൻ്റെ ജാമ്യാപേക്ഷ കോടതി പരിഗണിക്കാനിരിക്കേയാണ് മരണം സംഭവിച്ചത്.