കുവൈറ്റ് ചുട്ടുപൊള്ളുന്നു; വിജനമായി തെരുവുകള്‍

കുവൈറ്റ് സിറ്റി: തുടര്‍ച്ചയായ ദിവസങ്ങളില്‍ താപനില 50 ഡിഗ്രിക്ക് മുകളിലായതോടെ കുവൈറ്റ് ചുറ്റുപൊള്ളുന്നു. ശക്തമായ ചൂടില്‍ ദിവസങ്ങളായി ആളുകള്‍ വീടുകളില്‍ നിന്ന് പുറത്തിറങ്ങാന്‍ മടിച്ചതോടെ കുവൈറ്റിന്റെ തെരുവുകള്‍ വിജനമായി. ആളുകള്‍ തെരുവില്‍ നിന്നൊഴിഞ്ഞതിനെ തുടര്‍ന്ന് കുവൈറ്റിലെ റെസ്‌റ്റൊറന്റുകളും മാര്‍ക്കറ്റുകളും ഏറെക്കുറെ അടഞ്ഞുകിടക്കുകയാണിപ്പോള്‍. തൊഴിലാളികള്‍ക്ക് പുറത്തിറങ്ങാന്‍ സാധിക്കാത്ത സാഹചര്യത്തില്‍ നിര്‍മാണ മേഖല പൂര്‍ണമായും സ്തംഭിച്ചിരിക്കുകയായിരുന്നുവെന്നും പ്രാദേശിക മാധ്യമങ്ങള്‍ റിപ്പോര്‍ട്ട് ചെയ്തു.



Also Read: കൊവിഡ് പോരാട്ടം; ടാക്‌സി ഡ്രൈവര്‍മാരെയും ആദരിച്ച് ദുബായ്

തണലിടങ്ങളില്‍ 53 ഡിഗ്രിയും നേരിട്ട് സൂര്യപ്രകാശം നേരിട്ട് പതിക്കുന്ന പുറംപ്രദേശങ്ങളില്‍ 70 ഡിഗ്രിക്കു മുകളിലുമാണ് താപനിലയെന്നാണ് സാമൂഹ്യ മാധ്യമ ഉപയോക്താക്കള്‍ ചൂണ്ടിക്കാട്ടുന്നത്.

കഴിഞ്ഞ മാസം ലോകത്ത് ഏറ്റവും കൂടുതല്‍ താപനില രേഖപ്പെടുത്തിയ ആദ്യ 11 പ്രദേശങ്ങളില്‍ എട്ടെണ്ണവും കുവൈറ്റിലായിരുന്നു. ആഗോള കാലാവസ്ഥാ നിരീക്ഷണ വെബ്‌സൈറ്റായ എല്‍ഡൊറാഡോ വെതറിന്റെ റിപ്പോര്‍ട്ട് പ്രകാരമാണിത്. ജൂണ്‍ 23 ലെ റിപ്പോര്‍ട്ട് പ്രകാരം കുവൈറ്റിലെ നുവൈസീബ് പ്രദേശത്താണ് ലോകത്തെ ഏറ്റവും കൂടുതല്‍ ചൂട് അനുഭവപ്പെട്ടത്.

53 ഡിഗ്രി സെല്‍ഷ്യസായിരുന്നു ബുധനാഴ്ചത്തെ ഇവിടത്ത് താപനില. തൊട്ടു താഴെ 49.7 ഡിഗ്രിയുമായി കുവൈറ്റിലെ തന്നെ ജഹ്‌റ പ്രദേശവും 49.2 ഡിഗ്രി സെല്‍ഷ്യസുമായി സുലൈബിയ്യ മേഖലയുമാണ്. ഇറാഖിലെ അമാറ, കുവൈറ്റിലെ മുത്രിബ എന്നിവയാണ് തൊട്ടടുത്ത സ്ഥാനങ്ങളില്‍. 49 ഡിഗ്രിയാണ് ഇവിടത്തെ താപനില. കുവൈറ്റിലെ തന്നെ അന്താരാഷ്ട്ര വിമാനത്താവളം (48.8), അബ്ദാലി (48.7), ഇറാഖിലെ ബസറ എയര്‍പോര്‍ട്ട് (48.6) തുടങ്ങിയവയാണ് തൊട്ടുപിറകില്‍.