സിബിഐ ഓഫീസർ ചമഞ്ഞു; ബ്രിക്സിൽ മോദിയ്ക്കൊപ്പമുണ്ടായിരുന്ന അഭിഭാഷകൻ ആൾമാറാട്ടത്തിന് അറസ്റ്റിൽ

കൊൽക്കത്ത: സിബിഐ ഓഫീസറായി ആള്‍മാറാട്ടം നടത്തിയ ബംഗാള്‍ അഭിഭാഷകൻ അറസ്റ്റിൽ. കൊൽക്കത്ത ഹൈക്കോടതിയിലെ അഭിഭാഷകനായ സനാതന്‍ റായ് ചൗധരിയെ ആണ് ഇപ്പൊ പോലീസ് അറസ്റ്റ് ചെയ്തിരിക്കുന്നത്.



2018 ൽ ജോഹന്നാസ്ബർഗിൽ നടന്ന പത്താമത് ബ്രിക്സ് ഉച്ചകോടിയിൽ താൻ പങ്കെടുത്തതായി പോലീസ് ചോദ്യം ചെയ്യലിൽ വെളിപ്പെടുത്തി. പ്രധാനമന്ത്രി നരേന്ദ്ര മോദിയും അന്ന് നടന്ന ഉച്ചകോടിയിൽ പങ്കെടുത്തിരുന്നു.

വ്യാജരേഖ ചമയ്ക്കൽ, സര്‍ക്കാര്‍ ജോലിക്കാരനായി ആൾമാറാട്ടം, ഗൂഡാലോചന എന്നീ കുറ്റങ്ങള്‍ക്കാണ് പോലീസ് കേസെടുത്തിരിക്കുന്നത്.

ബംഗാൾ സർക്കാരിന്റെ സ്റ്റാൻഡിങ് കോൺസലാണെന്ന് അവകാശപ്പെട്ടിരുന്ന പ്രതി നീല ബീക്കൺ ലൈറ്റ് ഘടിപ്പിച്ച കാറിലാണ് സ്ഥിരമായി യാത്ര ചെയ്തിരുന്നതെന്ന് പോലീസ് പറയുന്നു. സിബിഐ സ്‌പെഷ്യൽ കോൺസലാണെന്ന അവകാശവാദവുമായി ഇയാൾ സമൂഹമാധ്യമങ്ങളിൽ പ്രത്യക്ഷപ്പെട്ടിരുന്നു.

ആൾമാറാട്ടത്തിന് പുറമേ വ്യാജ രേഖ ചമച്ചെന്നും ഭൂമി തട്ടിയെടുക്കാൻ ക്രമിനൽ ഗൂഢാലോചന നടത്തിയെന്നുമുള്ള ആരോപണങ്ങളും ഇയാൾക്കെതിരെ ഉയരുന്നുണ്ട്.

ഐഎഎസ് ഉദ്യോഗസ്ഥനായി ആൾമാറാട്ടം നടത്തിയ ദേബാഞ്ജൻ ദേബ് എന്നയാളെ ദിവസങ്ങൾക്ക് മുൻപ് കൊൽക്കത്ത പോലീസ് പിടികൂടിയിരുന്നു. പിന്നാലെയാണ് സമാനമായ സംഭവമുണ്ടാായത്.

സംസ്ഥാനത്ത് നടത്തിയ വ്യാജ വാക്‌സിനേഷൻ ക്യാമ്പുമായി ബന്ധപ്പെട്ടാണ് ഇയാളെ അറസ്റ്റ് ചെയ്തത്. തുടർന്ന് കേസിൽ എട്ട് പേരെ കൂടി പോലീസ് പിടികൂടി. ഇതിന് പിന്നാലെയാണ് സിബിഐ ഉദ്യോഗസ്ഥനായി ആൾമാറാട്ടം നടത്തിയയാളും പിടിയിലാവുന്നത്.

സംഭവത്തിൽ കൊൽക്കത്ത പോലീസിന്റെ പ്രത്യേക അന്വേഷണ സംഘം ഇക്കാര്യം അന്വേഷിക്കുന്നുണ്ട്. പ്രധാന പ്രതി ഡെബഞ്ചൻ ദേബ് ഉൾപ്പെടെ ഒൻപത് പേരെ ഇതുവരെ അറസ്റ്റ് ചെയ്തിട്ടുണ്ട്.