മാസ്ക് ധരിക്കില്ലെന്ന് 30 വിദ്യാർഥികൾ; അമേരിക്കന്‍ എയര്‍ലൈന്‍സ് വിമാനം വൈകിയത് ഒരു ദിവസം

വാഷിങ്ടണ്‍: മാസ്‌ക് ധരിക്കാൻ കൗമാരക്കാർ വിസമ്മതിച്ചതോടെ അമേരിക്കന്‍ എയര്‍ലൈന്‍സ് വിമാനം വൈകിയത് ഒരു ദിവസം. നോര്‍ത്ത് കരോളിനയില്‍ നിന്ന് ബഹാമാസിലേക്കുള്ള വിമാനമാണ് ഒരു ദിവസത്തോളം വൈകി സർവീസ് നടത്തിയത്. തിങ്കളാഴ്ച വൈകീട്ട് ആരംഭിച്ച നാടകീയ സംഭവങ്ങളാണ് വിമാനം വൈകുന്നതിന് കാരണമായതെന്ന് പ്രാദേശിക മാധ്യമങ്ങളെ ഉദ്ധരിച്ച് വാർത്താ ഏജൻസിയായ എഎഫ്പിയാണ് റിപ്പോർട്ട് ചെയ്തത്.



തിങ്കളാഴ്ച വൈകിട്ട് യാത്ര പുറപ്പെടേണ്ടിയിരുന്ന വിമാനമാണ് നാടകീയ സംഭവങ്ങളെത്തുടർന്ന് ചൊവ്വാഴ്ച രാവിലെ ടേക്ക് ഓഫ് ചെയ്യുന്നത്. വിമാനം യാത്രയ്ക്കൊരുങ്ങേണ്ട സമയത്ത് ചില സാങ്കേതിക തടസങ്ങൾ ഉണ്ടായിരുന്നു. മണിക്കൂറുകൾക്ക് ശേഷം ഇവ പരിഹരിച്ച് വിമാനം യാത്രയ്ക്ക് സജ്ജമായപ്പോഴാണ് വിദ്യാർഥികൾ പ്രശ്നം സൃഷ്ടിക്കുന്നത്.

Also Read : ഇസ്ലാം വിരുദ്ധ വീഡിയോയുടെ പേരിൽ 16കാരിയ്ക്ക് വധഭീഷണി; ഫ്രാൻസിൽ 11 പേര്‍ക്ക് തടവ്

എല്ലാ യാത്രക്കാരും മാസ്‌ക് ധരിക്കണമെന്ന് വിമാനക്കമ്പനി കര്‍ശന നിർദേശം നൽകിയിട്ടുണ്ടെങ്കിലും ഒരു സംഘം ഇത് പരിഗണിക്കാതെ ഇരിക്കുകയായിരുന്നു. ഇത് വിമാനജീവനക്കാരും കൗമാരക്കാരും തമ്മില്‍ വാക്കേറ്റത്തിലേക്ക് എത്തുകയും ചെയ്തു. വിദ്യാർഥികൾ വിമാനത്തിനുള്ളിൽ നിന്ന് ബഹളം ഉണ്ടാക്കുകയും മോശമായി പെരുമാറുകയും ചെയ്തെന്നാണ് റിപ്പോർട്ട്.

Also Read : വാരാന്ത്യത്തിൽ അമേരിക്കയിൽ 400 വെടിവെപ്പുകൾ; കൊല്ലപ്പെട്ടത് 150 പേർ



ബോസ്റ്റണിലെ ഹൈ സ്‌കൂള്‍ വിദ്യാര്‍ത്ഥികളായ 30 പേരാണ് വിമാനത്തില്‍ പ്രശ്‌നമുണ്ടാക്കിയത്. ഒരു രാത്രിമുഴുവൻ എയർപോർട്ടിൽ കഴിഞ്ഞതിന് ശേഷമാണ് മാസ്‌ക് ധരിക്കാന്‍ യുവാക്കള്‍ സമ്മതിച്ചത്. ഇതോടെയാണ് വിമാനം പറന്നുയരുന്നത്. സംഭവവുമായി ബന്ധപ്പെട്ട് പോലീസ് ആരെയും അറസ്റ്റ് ചെയ്തിട്ടില്ല.