Sumayya P | Samayam Malayalam | Updated: 08 Jul 2021, 09:42:36 AM
സര്‍ക്കാര്‍ ഏജന്‍സികളുടെ ഓപ്പറേഷന്‍- മെയിന്റനന്‍സ് കരാറുകാര്‍ക്കുള്ള സ്വദേശിവല്‍ക്കരണ മാര്‍ഗനിര്‍ദ്ദേശങ്ങള്‍ പ്രകാരം, എഞ്ചിനീയറിംഗ്- സ്‌പെഷ്യലൈസ്ഡ് ജീവനക്കാര്‍ക്ക് 8,400 റിയാലായിരിക്കും ഏറ്റവും കുറഞ്ഞ വേതനം
റിയാദ്: രാജ്യത്ത് സ്വദേശിവല്‍ക്കരണം ശക്തിപ്പെടുത്തുന്നതിന്റെ ഭാഗമായി സര്‍ക്കാര്‍ ഏജന്‍സികള്‍ നല്‍കുന്ന വിവിധ തൊഴില്‍ മേഖലകളില്‍ സൗദി ജീവനക്കാര്‍ക്കുള്ള മിനിമം വേതനം പ്രഖ്യാപിച്ച് സൗദി മനുഷ്യ വിഭവ ശേഷി സാമൂഹ്യ വികസന മന്ത്രാലയം. മികച്ച ശമ്പളം വാഗ്ദാനം ചെയ്ത് വിവിധ ജോലികളിലേക്ക് സ്വദേശി യുവാക്കളെ ആകര്‍ഷിക്കുകയാണ് ഇതിലൂടെ ലക്ഷ്യമിടുന്നത്.
പ്രവൃത്തി പരിചയത്തിന് അനുസരിച്ച് ശമ്പളവും കൂടും
ഇതുപ്രകാരം ഓപ്പറേഷന്‍, മെയിന്റനന്‍സ് എന്നീ മേഖലകളിലെ സീനിയര്‍ മാനേജര്‍മാര്‍ക്ക് 9000 റിയാല്‍ മിനിമം വേതനം നല്‍കണമെന്ന് തൊഴില്‍ മന്ത്രാലയം ആവശ്യപ്പെട്ടു. ഇവരുടെ പ്രവൃത്തി പരിചയം വര്‍ധിക്കുന്നതിന് അനുസരിച്ച് ശമ്പളവും കൂടുമെന്നും സൗദി വാര്‍ത്താ ഏജന്‍സി അറിയിച്ചു. സര്‍ക്കാര്‍ ഏജന്‍സികളുടെ ഓപ്പറേഷന്‍- മെയിന്റനന്‍സ് കരാറുകാര്‍ക്കുള്ള സ്വദേശിവല്‍ക്കരണ മാര്‍ഗനിര്‍ദ്ദേശങ്ങള്‍ പ്രകാരം, എഞ്ചിനീയറിംഗ്- സ്‌പെഷ്യലൈസ്ഡ് ജീവനക്കാര്‍ക്ക് 8,400 റിയാലായിരിക്കും ഏറ്റവും കുറഞ്ഞ വേതനം. അതേസമയം അഡ്മിനിസ്‌ട്രേറ്റീവ് മേഖലകളില്‍ ജോലി ചെയ്യുന്നവരാണെങ്കില്‍ 7000 റിയാല്‍ മിനിമംവേതനം നല്‍കണം.
പ്രവാസികളെ പരമാവധി കുറയ്ക്കാന്‍ പദ്ധതി
ഇത്തരം കരാറുകള്‍ക്ക് ടെണ്ടര്‍ നല്‍കുന്ന സമയത്ത് തന്നെ ഓരോ ജോലിക്കും മിനിമം ശമ്പളം എത്രയാണെന്നതിനെ കുറിച്ചുള്ള വ്യക്തമായ ധാരണ അവര്‍ക്ക് നല്‍കണം. ടെണ്ടര്‍ സമയത്ത് വ്യവസ്ഥ ചെയ്തതു പ്രകാരം കരാറുകാര്‍ ശമ്പളം നല്‍കുന്നുണ്ടോ എന്ന കാര്യം ഉറപ്പുവരുത്തണമെന്നും മന്ത്രാലയം വ്യക്തമാക്കി. യോഗ്യതയുടെയും പ്രവൃത്തി പരിചയത്തിന്റെയും അടിസ്ഥാനത്തില്‍ ആറു വിഭാഗങ്ങളായി തിരിച്ചാണ് ഓപറേഷന്‍- മെയിന്റനന്‍സ് തസ്തികകളില്‍ കൃത്യമായ ശമ്പളം തീരുമാനിക്കുക. അടിസ്ഥാന ശമ്പളം വര്‍ധിക്കുന്നതോടെ കരാര്‍ ജോലികളില്‍ നിന്ന് പരമാവധി പ്രവാസി തൊഴിലാളികളുടെ എണ്ണം കുറയ്ക്കാനും പകരം സ്വദേശികളെ നിയമിക്കാനുമാണ് സൗദി തൊഴില്‍ മന്ത്രാലയം പദ്ധതിയിടുന്നത്.
സ്വദേശിവല്‍ക്കരണം കൂടുതല്‍ മേഖലകളിലേക്ക്
സര്‍ക്കാര്‍ ഏജന്‍സികള്‍ക്ക് നല്‍കുന്ന കരാറുകളില്‍ സ്വദേശികളുടെ എണ്ണം പരമാവധി ശക്തിപ്പെടുത്തണമെന്ന് സൗദി തൊഴില്‍ മന്ത്രി അഹ്മദ് അല്‍ റാജിഹി നേരത്തേ ബന്ധപ്പെട്ടവര്‍ക്ക് നിര്‍ദ്ദേശം നല്‍കിയിരുന്നു. ഇതിന്റെ അടിസ്ഥാനത്തിലാണ് ഉയര്‍ന്ന മിനിമം വേതനം നിശ്ചയിച്ച് കൂടുതല്‍ സൗദികളെ തൊഴില്‍ കമ്പോളത്തിലേക്ക് ആകര്‍ഷിക്കാന്‍ അധികൃതര്‍ തീരുമാനിച്ചത്. ഇതിനു പുറമെ, സൗദിയില്‍ റിയല്‍ എസ്റ്റേറ്റ് അടക്കം ആറ് മേഖലകളില്‍ കൂടി സ്വദേശിവല്‍ക്കരണം നടപ്പിലാക്കാന്‍ കഴിഞ്ഞ ദിവസം മന്ത്രാലയം തീരുമാനിച്ചിരുന്നു. ലീഗല്‍ കണ്‍സല്‍ട്ടന്‍സി, ഡ്രൈവിംഗ് സ്‌കൂള്‍, റിയല്‍ എസ്റ്റേറ്റ്, സിനിമാ വ്യവസായം, കസ്റ്റംസ് ക്ലിയറന്‍സ്, സാങ്കേതിക- എഞ്ചിനീയറിംഗ് മേഖലകളിലാണ് പുതുതായി സ്വദേശിവല്‍ക്കരണം നടപ്പിലാക്കുന്നതെന്ന് മാനവ വിഭവശേഷി സാമൂഹിക വികനസന മന്ത്രി അഹമ്മദ് അല്‍ റാജിഹി അറിയിച്ചു. പദ്ധതി നടപ്പിലാവുന്നതോടെ ഈ മേഖലകളില്‍ ജോലി ചെയ്യുന്ന 40,000ത്തോളം പ്രവാസികള്‍ക്ക് ജോലി നഷ്ടമാവുമെന്നാണ് കണക്കാക്കപ്പെടുന്നത്.
Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
ഏറ്റവും പുതിയ വാർത്തകൾ അതിവേഗം അറിയാൻ Samayam Malayalam ഫേസ്ബുക്ക് പേജ് ലൈക്ക് ചെയ്യൂ
Web Title : saudi ministry of human resources announced minimum salary for men and women working in senior management in this sector in public
Malayalam News from malayalam.samayam.com, TIL Network
