ഹിമാചല്‍ പ്രദേശ് മുന്‍ മുഖ്യമന്ത്രി വീരഭദ്ര സിങ് അന്തരിച്ചു

ഷിംല: ഹിമാചല്‍ പ്രദേശ് മുന്‍ മുഖ്യമന്ത്രിയും മുതിര്‍ന്ന കോണ്‍ഗ്രസ് നേതാവുമായ വീരഭദ്ര സിങ് അന്തരിച്ചു. 87 വയസായിരുന്നു. ദീര്‍ഘകാലമായി അസുഖബാധിതനായിരുന്ന വീരഭദ്ര സിങ് ഇന്ന് പുലര്‍ച്ചെ നാല് മണിയോടെ ഷിംലയിലെ ഇന്ദിരാഗാന്ധി മെഡിക്കല്‍ കോളേജില്‍ വെച്ചാണ് മരിച്ചത്. മുൻ മുഖ്യമന്ത്രിയോടുള്ള ആദരസൂചകമായി സംസ്ഥാനത്ത് മൂന്ന് ദിവസം ദുഃഖാചരണം പ്രഖ്യാപിച്ചിട്ടുണ്ട്.



വീരഭദ്ര സിങ്ങിന്‍റെ മരണവാർത്ത ഇന്ദിരാഗാന്ധി മെഡിക്കൽ കോളേജ് സൂപ്രണ്ട് ഡോ. ജനക് രാജാണ് പുറത്തുവിട്ടത്. മുൻ മുഖ്യമന്ത്രി തീവ്രപരിചരണ വിഭാഗത്തിൽ ചികിത്സയിലായിരുന്നെന്നും അദ്ദേഹം വ്യക്തമാക്കി. നേരത്തെ കൊവിഡ് ബാധയെത്തുടർന്ന് ഇദ്ദേഹത്തെ ആശുപത്രിയിൽ പ്രവേശിപ്പിച്ചിരുന്നു. പിന്നീട് രോഗമുക്തനാവുകയും ചെയ്തു.

Also Read : നമ്പി നാരായണൻ്റെ അറസ്റ്റ് തെളിവില്ലാതെ; കേസിൽ അന്താരാഷ്ട്ര ഗൂഢാലോചന പരിശോധിക്കുമെന്ന് സിബിഐ



രണ്ട് മാസത്തിനിടയിൽ രണ്ട് തവണയാണ് വീരഭദ്ര സിങ് കൊവിഡ് ബാധിതനായത്. ഏപ്രിൽ 12 നായിരുന്നു അദ്ദേഹത്തിന് ആദ്യം കൊവിഡ് ബാധിച്ചത്. തുടർന്ന് ഏതാനും ദിവസങ്ങൾ ഛണ്ഡീഗഡിലെ ആശുപത്രിയിൽ ചികിത്സയിലായിരുന്നു. പിന്നീട് ജൂൺ 11 നും കൊവിഡ് സ്ഥിരീകരിച്ചു.

Also Read : വീണ്ടും പുകയുന്നു ഫസൽ വധക്കേസ്; വൈകിയെത്തിയ നീതിയെന്ന് ജയരാജൻ



ഒമ്പത് തവണ എംഎല്‍എയും അഞ്ചു തവണ എംപിയുമായിട്ടുള്ള വീരഭദ്ര സിങ് ആറ് തവണയാണ് ഹിമാചല്‍ പ്രദേശിന്‍റെ മുഖ്യമന്ത്രി പദത്തിലെത്തിയത്. ഭാര്യ പ്രതിഭ സിങും മകന്‍ വിക്രമാദിത്യ സിങും രാഷ്ട്രീയത്തിൽ സജീവമാണ്.