മോഡലിങിനായി വിളിച്ചു, പിന്നാലെ ഭീഷണി; 14കാരിയായ കരാട്ടെ താരം മരിച്ച നിലയിൽ

കൊൽക്കത്ത: ഓൺലൈനിൽ വന്ന ഭീഷണിയ്ക്ക് പിന്നാലെ 14കാരിയായ കരാട്ടെ താരത്തെ വീട്ടിൽ മരിച്ച നിലയിൽ കണ്ടെത്തി. ദേശീയ തലത്തിൽ ചില കരാട്ടേ ടൂര്‍ണമെൻ്റുകളിൽ ഉള്‍പ്പെടെ പങ്കെടുത്തിട്ടുള്ള പശ്ചിമ ബംഗാള്‍ സ്വദേശിനിയായ പാമല അധികാരിയാണ് മരിച്ചത്.



ഹൗറയിൽ എട്ടാം ക്ലാസ് വിദ്യാര്‍ഥിനിയായ പെൺകുട്ടിയെ ഒരു യുവാവ് ഭീഷണിപ്പെടുത്തിയിരുന്നതായാണ് പോലീസ് പറയുന്നത്. യുവാവുമായി പെൺകുട്ടിയ്ക്ക് അടുപ്പമുണ്ടായിരുന്നു. എന്നാൽ യുവാവിൻ്റെ ഭീഷണി താങ്ങാനാകാതെ കുട്ടി ആത്മഹത്യ ചെയ്യുകയായിരുന്നുവെന്നും പോലീസ് പറഞ്ഞു. വീട്ടിൽ കിടപ്പുമുറിയിൽ തൂങ്ങി നിൽക്കുന്ന നിലയിലായിരുന്നു മൃതദേഹം.

യുവാവിൻ്റെ ഭീഷണി ഇനിയും താങ്ങാൻ കഴിയില്ലെന്നും അതിനാൽ ജീവനൊടുക്കുകയാണെന്നും കാണിച്ച് പെൺകുട്ടി എഴുതിയതെന്നു കരുതുന്ന ഒരു ആത്മഹത്യാക്കുറിപ്പും പോലീസ് കണ്ടെത്തിയിട്ടുണ്ട്. തിങ്കളാഴ്ച രാവിലെ കണ്ടെത്തിയ മൃതദേഹം പോലീസ് പോസ്റ്റ്മോര്‍ട്ടത്തിനായി അയച്ചെന്നാണ് ന്യൂസ് 18 റിപ്പോര്‍ട്ട് ചെയ്തത്. കുട്ടിയുടെ മൊബൈൽ ഫോണിൻ്റെ പാസ്‍‍വേഡ് കൈയിൽ എഴുതിയിരുന്നതായും റിപ്പോര്‍ട്ടിൽ പറയുന്നു.

Also Read: നമ്പി നാരായണൻ്റെ അറസ്റ്റ് തെളിവില്ലാതെ; കേസിൽ അന്താരാഷ്ട്ര ഗൂഢാലോചന പരിശോധിക്കുമെന്ന് സിബിഐ

പെൺകുട്ടിയെ ഭീഷണിപ്പെടുത്തിയ യുവാവിനു വേണ്ടി പോലീസ് അന്വേഷണം തുടങ്ങിയിട്ടുണ്ട്. ഇയാള്‍ക്കെതിരെ നിലവിൽ ആത്മഹത്യാ പ്രേരണയ്ക്കാണ് കേസെടുത്തിട്ടുള്ളത്.

Also Read: ജ്യോതിരാദിത്യ സിന്ധ്യയ്ക്ക് വ്യോമയാനം; മൻസുക് മാണ്ഡവ്യക്ക് ആരോഗ്യം; മന്ത്രിമാരും വകുപ്പുകളും

തൻ്റെ ചിത്രങ്ങളും വീഡിയോകളും പാമല സോഷ്യൽ മീഡിയ പ്ലാറ്റ്ഫോമുകളിൽ അപ്‍‍ലോഡ് ചെയ്യുന്നതു പതിവായിരുന്നുവെന്നാണ് കുടംംബം പറയുന്നത്. ചിലര്‍ മോഡലിങിനായും കുട്ടിയെ ക്ഷണിച്ചിരുന്നു. അടുത്തിടെ മോഡലിങ് ജോലിയുമായി ബന്ധപ്പെട്ടാണ് യുവാവ് പെൺകുട്ടിയെ സോഷ്യൽ മീഡിയ വഴി ബന്ധപ്പെടുന്നത്. തുടര്‍ന്ന് ഇക്കാര്യം ചര്‍ച്ച ചെയ്യാനായി അവര്‍ നേരിൽ കാണുകയും ചെയ്തു. ഇരുവരും തമ്മിൽ അടുത്തിടപഴകുന്ന ചില ചിത്രങ്ങളും യുവാവ് പകര്‍ത്തിയിരുന്നു. എന്നാൽ യുവാവിൻ്റെ അഭ്യര്‍ഥന പെൺകുട്ടി നിരസിച്ചതോടെ ഈ ചിത്രങ്ങള്‍ ഉപയോഗിച്ച് ഇയാള്‍ ഭീഷണിപ്പെടുത്തുകയായിരുന്നുവെന്നാണ് കുടുംബം ആരോപിക്കുന്നത്.