പ്രിയ വർഗീസ് വിധി: അക്കാദമിക് ഡെപ്യുട്ടേഷനും ചില പ്രശ്നങ്ങളും

2018 – ലെ യു ജി സി ചട്ടം പ്രകാരം സർവകലാശാലകളിലെ അസ്സോസിയേറ്റ് പ്രൊഫസർ തസ്തികയിലേക്കുള്ള യോഗ്യതാ മാണ്ഡങ്ങൾ ഇപ്രകാരമാണ് നിർവ്വചിച്ചിരിക്കുന്നത്: “”A minimum of eight years of experience of teaching and / or research in an academic / research position equivalent to that of Assistant Professor in a University, College or Accredited Research Institution/industry with a minimum of seven publications in the peer reviewed/UGC listed journals and a total research score of Seventy Five (75) as per the criteria given in the Appendix III, Table 2.”

Read More: എന്താണ് ഡോ. ജോസഫ് സ്കറിയയുടെ/പ്രിയ വർഗീസിന്റെ യോഗ്യത?

അപ്പോൾ കണ്ണൂർ യൂണിവേഴ്‌സിറ്റി കേസിലെ പ്രധാന വിഷയം പ്രിയ വർഗീസിന് ‘അധ്യാപന പരിചയമോ/ ഗവേഷണ പരിചയമോ ഉണ്ടോ എന്നതാണ്. പരാതിക്കാരുടെ പ്രധാന വാദമാകാട്ടെ പി എച്ച് ഡി ഗവേഷണകാലം അധ്യാപന പരിചയമായി കണക്കാക്കാൻ കഴിയില്ല എന്നതുമാണ്. രസകരമായ വസ്തുത എന്തെന്നാൽ സജീവ സർവീസിൽ ഉള്ളവരുടെ അവധി അല്ലാതെയുള്ള പി എച്ച് ഡി കാലയവിലെ ഗവേഷണപരിചയവും അധ്യാപന/ഗവേഷണ എക്സ്പീരിയൻസായി പരിഗണിക്കുമെന്ന് 2018 ചട്ടം പറയുന്നുണ്ട്. അതിങ്ങനെയാണ്: “The period of time taken by candidates to acquire M.Phil. and/or Ph.D. Degree shall not be considered as teaching/research experience to be claimed for appointment to the teaching positions. Further the period of active service spent on pursuing Research Degree simultaneously with teaching assignment without taking any kind of leave shall be counted as teaching experience for the purpose of direct recruitment/promotion.” തർജ്ജമ: ‘”എം.ഫിൽ./അല്ലെങ്കിൽ പി.എച്ച്.ഡി. ബിരുദം കരസ്ഥമാക്കാൻ ഉദ്യോഗാർത്ഥികൾ എടുക്കുന്ന കാലയളവ്, അദ്ധ്യാപക തസ്തികകളിലേക്കുള്ള നിയമനത്തിന് ക്ലെയിം ചെയ്യേണ്ട അധ്യാപന/ഗവേഷണ എക്സ്പീരിയൻസ് ആയി കണക്കാക്കില്ല. സർവ്വീസ് കാലയളവിൽ, അവധികളൊന്നുമില്ലാതെയുള്ള ടീച്ചിങ് അസൈൻമെന്റോടു കൂടി ചെലവിട്ട ഗവേഷണകാലത്തെ നേരിട്ടുള്ള റിക്രൂട്ട്‌മെന്റ്/പ്രമോഷനുള്ള അധ്യാപനപരിചയമായി കണക്കാക്കാം.”

എന്നാൽ ഒരു കൂട്ടർ ഇതിലെ ആദ്യ ഭാഗം മാത്രമാണ് ആധികാരികമായി ഉയർത്തിക്കാട്ടുന്നത്. സർവ്വീസിൽ ഇല്ലാത്തതും റെഗുലർ അല്ലാതെ പി എച്ച് ഡി ചെയ്തവരുമായ ഉദ്യോഗാർത്ഥികളുടെ ഗവേഷണ കാലയളവിനെ അദ്ധ്യാപന/ഗവേഷണ പരിചയമായി കണക്കാക്കില്ല എന്നാണ് മുകളിൽ ഉദ്ധരിച്ച പാരഗ്രാഫിലെ ആദ്യഭാഗം പറയുന്നത് എന്നത് ശരി തന്നെ. എന്നാൽ അസിസ്റ്റന്റ് പ്രൊഫസർ തസ്തികകളിലേക്ക് അപേക്ഷിക്കുന്ന പുതിയ ഉദ്യോഗാർത്ഥികളെയാണ് ഇവിടെ ഉദ്ദേശിച്ചിരിക്കുന്നത് എന്ന് വ്യക്തം. സജീവമായി സർവീസിൽ ഉള്ളവർക്ക് ഇത് ബാധകമല്ല എന്ന് തന്നെ ആണ് യു ജി സി ചട്ടം. ലീവെടുക്കാതെ സർവീസിലിരുന്ന് അധ്യാപന രീതിയിൽ ഗവേഷണം പൂർത്തിയാക്കാനെടുക്കുന്ന സമയം പരിചയമായി കണക്കാക്കാം എന്നാണ് യു ജി സി പറയുന്നത്. ഡോ. പ്രിയയെ നീക്കി റാങ്ക് ലിസ്റ്റ് പുനക്രമീകരിക്കണം എന്ന ഹരജിക്കാരന്റെ ആവശ്യം കോടതി നിരാകരിച്ചതും ഇവിടെ ഓർക്കണം.

വിധിപ്പകർപ്പ് ഇത് വരെ പൂർണമായും ലഭിച്ചിട്ടില്ലാത്തതിനാൽ പൂർണമായും ഒരു നിലപാടിൽ ഏത്താൻ വിദഗ്ദർ മടിക്കുന്നുണ്ട്. ലൈവ് ലോയെ ഉദ്ധരിച്ച് നിയമ വിദഗ്ദൻ ഗോപകുമാർ മുകുന്ദൻ ചൂണ്ടി കാണിക്കുന്ന ചില കാര്യങ്ങൾ ശ്രദ്ധേയമാണ് “പ്രിയ ആക്ടിവ് സർവീസിൽ ആയിരുന്നോ? അവർ ലീവ് എടുത്തിരുന്നോ? ഇതൊക്കെ വ്യക്തമാകണം. മറ്റൊന്നു കൂടിയുണ്ട്. ഈ Director of Student Services, coordinator of the National Services Scheme എന്നീ കാലങ്ങൾ എങ്ങനെയാണു കണക്കാക്കുന്നത്? കോടതിക്ക് ഈ അവ്യക്തതയുണ്ട് എന്നു വ്യക്തം. നിങ്ങൾ എങ്ങനെയാണ് ഡോ. പ്രിയയുടെ യോഗ്യത കണക്കാക്കിയത് എന്നതായിരുന്നു ചോദ്യം. അപ്പോൾ സർവ്വകലാശാല പറഞ്ഞത് ഞങ്ങൾ ഇതു സംബന്ധിച്ച് അധിക സത്യവാങ്മൂലം നൽകാം എന്നായിരുന്നു. ഇത് വളരെ വളരെ പ്രസക്തമാണ്. അതിനു കോടതി സമയം നൽകിയില്ല. പകരം നിങ്ങൾ ആലോചിച്ചു തീരുമാനിക്കൂ എന്നു പറഞ്ഞിരിക്കുന്നു. ജ. ദേവൻ രാമചന്ദ്രൻ ആ അധിക സത്യവാങ്മൂലം കൂടി സ്വീകരിച്ചു തീരുമാനം പറയുകയായിരുന്നു വേണ്ടത് എന്ന തോന്നലാണ് എന്നിക്കുള്ളത്. ഇപ്പോൾ തീരുമാനിക്കാനുള്ള അവകാശം സർവ്വകലാശാലയിലെ competent authority-ക്കു നൽകുകയാണ് കോടതി ചെയ്തിരിക്കുന്നത്.”

‘അധ്യാപന പരിചയമെന്നത് കെട്ടുകഥയല്ലെന്നും എൻ.എസ്.എസ് കോ ഓഡിനേറ്റർ എന്ന നിലയിൽ കുഴിവെട്ടുമ്പോൾ നിർദേശം നൽകുന്നത് അധ്യാപന പരിചയമാകില്ലെന്നും’ ഇന്നലെ ജസ്റ്റിസ് ദേവൻ രാമചന്ദ്രൻ വിധി പ്രസ്താവിക്കുമ്പോൾ പറഞ്ഞതായി ചില മാധ്യമങ്ങൾ റിപ്പോട്ട് ചെയ്തിരുന്നു. സംഗതി സത്യം ആണെങ്കിൽ എത്രമാത്രം മുന്വിധിയോടെയാണ്‌ കോടതി ഇത്തരം വിഷയങ്ങളെ സമീപിക്കുന്നത് എന്ന് വ്യക്തം. അധ്യാപകർ അവരുടെ തൊഴിലിന്റെ ഭാഗമായി ഡെപ്യുട്ടേഷനിൽ പോകുന്നത് ഒരു പുതിയ സംഭവമല്ല, ഡെപ്യുട്ടേഷൻ രണ്ടു തരത്തിലും ആവാം ഒന്നാമതായി അക്കാദമിക് രണ്ടാമത് നോൺ അക്കാദമിക്. അക്കാദമിക് ഡെപ്യുട്ടേഷൻ അധ്യാപന കാലമായി പരിഗണിച്ചില്ലെങ്കിൽ വലിയ വിഭാഗം അധ്യാപകർക്ക് സൃഷ്ടിക്കുന്ന പ്രതിസന്ധി ഭീകരമായിരിക്കും. പി എച്ച് ഡി അക്കാദമിക് ഡെപ്യുട്ടേഷന്റെ ഭാഗമായി കൂടെ ആണ് ചെയ്തു പോരുന്നത്, ആ കാലം സർവീസ് ആയി പരിഗണിക്കില്ലെന്ന് പറയുന്നത് ഒരു സിസ്റ്റത്തെയാകെ പ്രശ്നത്തിലാക്കും എന്ന് തീർച്ച.