തർക്കം തുടങ്ങിയിട്ട് 100 വർഷം
കേരളത്തിലെ സുറിയാനി പാരമ്പര്യമുള്ള ക്രൈസ്തവസഭകളായ യാക്കോബായ സുറിയാനി ക്രിസ്ത്യാനി സഭ എന്ന യാക്കോബായ സഭയും മലങ്കര ഓർത്തഡോക്സ് സുറിയാനിസഭ എന്ന ഓർത്തഡോക്സ് സഭയും തമ്മിലുള്ള തർക്കമാണ് ഒരു നൂറ്റാണ്ട് പിന്നിട്ടിടടും തുടരുന്നത്. ആഗോള സുറിയാനി ഓർത്തഡോക്സ് സഭയുടെ ഭാഗമാണ് കേരളത്തിലെ യാക്കോബായ സഭയെങ്കിൽ കേരളം കേന്ദ്രീകരിച്ച് പ്രവർത്തിക്കുന്ന ഒരു സ്വതന്ത്രസഭയാണ് ഓർത്തഡോക്സ് സഭ. 1958ലും 1995ലും തർക്കം തീർപ്പാക്കിയിരുന്നെങ്കിലും മധ്യകേരളത്തിലടക്കമുള്ള പല പള്ളികളുടെയും നിയന്ത്രണമാണ് തർക്കം മുന്നോട്ടു കൊണ്ടുപോകുന്നത്. പള്ളികളുടെ നിയന്ത്രണവും സ്വയംഭരണവും സംബന്ധിച്ച് കേസുകൾ തുട‍ർച്ചയായി കോടതിയിലെത്തുന്നതിനിടയിലാണ് സംസ്ഥാന സ‍ർക്കാരിൻ്റെ മധ്യസ്ഥതയിൽ ച‍ർച്ചയ്ക്ക് വഴിയൊരുങ്ങിയത്.
ചീഫ് സെക്രട്ടറിയുടെ നേതൃത്വത്തൽ ചർച്ച
ചീഫ് സെക്രട്ടറി വി പി ജോയിയുടെ നേതൃത്വത്തിലാണ് ഇരുവിഭാഗവുമായും സർക്കാർ ഈ ആഴ്ച ചർച്ച നടത്തിയത്. എന്നാൽ രണ്ടാം വട്ട ച‍‍ർച്ചയിലും സഭകൾ വഴങ്ങാതെ വന്നതോടെ ചർച്ച പരാജയപ്പെട്ടു. ഇനി സഭകളുമായി ചർച്ചയില്ലെന്നാണ് സംസ്ഥാന സർക്കാർ വ്യക്തമാക്കുന്നത്. ഓർത്തഡോക്സ് സഭയെ പ്രതിനിധീകരിച്ച് സുന്നഹദോസ് സെക്രട്ടറി ഡോ. യൂഹാനോൻ മാർ ക്രിസോസ്റ്റമോസ്, വൈദിക ട്രസ്റ്റി ഫാ. ഡോ. സജി അമയിൽ മലങ്കര അസോസിയേഷൻ സെക്രട്ടറി ബിജു ഉമ്മൻ തുടങ്ങിയവരാണ് ച‍ർച്ചയ്ക്ക് എത്തിയത്. യാക്കോബായ സഭയ്ക്കു വേണ്ടി മെട്രോപോലിറ്റൻ ട്രസ്റ്റി ജോസഫ് മാർ ഗ്രിഗോറിയോസ്, യൂഹാനോൻ മാർ മിലിത്തിയോസ്, വൈദിക ട്രസ്റ്റി സ്ലീബാ പോൾ തുടങ്ങിയവരും എത്തി. ചീഫ് സെക്രട്ടറിയ്ക്കു പുറമെ ആഭ്യന്തര അഡീഷണൽ ചീഫ് സെക്രട്ടറി വി വേണു, നിയമ സെക്രട്ടരി വി ഹരി നായർ എന്നിവരും പങ്കെടുത്തിരുന്നു. മുൻപ് ബിജെപി നേതൃത്വവും പ്രധാനമന്ത്രി നരേന്ദ്ര മോദിയും സഭാത‍ർക്കം പരിഹരിക്കുന്നതിനായി ഇടപെട്ടിരുന്നെങ്കിലും ഫലം കണ്ടിരുന്നില്ല.
വിധി നടപ്പാക്കണമെന്ന് ഓർത്തഡോക്സ് വിഭാഗം
2017ൽ പള്ളികളുടെ നിയന്ത്രണം സംബന്ധിച്ച് സുപ്രീം കോടതി വിധി ഓർത്തഡോക്സ് സഭയ്ക്ക് അനുകൂലമായിരുന്നു. ചർച്ച പരാജയപ്പെട്ട സാഹചര്യത്തിൽ, ഇനി ചർച്ചയുടെ പേരു പറഞ്ഞ് കോടതി വിധി നടപ്പാക്കുന്നത് താമസിപ്പിക്കരുത് എന്നാണ് ഓർത്തഡോക്സ് വിഭാഗത്തിൻ്റെ വാദം. സുപ്രീം കോടതി വിധി രാജ്യത്തിൻ്റെ നിയമമാണെന്നും വിധി നടപ്പാക്കിയേ തീരൂ എന്നും സഭ വ്യക്തമാക്കി. സുപ്രീം കോടതി അന്തിമവിധിയാണ് പുറപ്പെടുവിച്ചതെങ്കിലും ജനാധിപത്യ സർക്കാരിനെ മാനിക്കുന്നതു കൊണ്ടാണ് മൂന്ന് തവണ ച‍ർച്ചയ്ക്ക് എത്തിയതെന്നും അവർ വ്യക്തമാക്കി. സുപ്രീം കോടതി വിധി അട്ടിമറിച്ചുള്ള നിയമം നി‍ർമിക്കാൻ സ‍ർക്കാരിനു കഴിയില്ലെന്നും യാക്കോബായ വിഭാഗവും ഇത് മനസസിലാക്കണമെനനും അവർ ആവശ്യപ്പെട്ടു.
നിയമനിർമാണം വേണമെന്ന് യാക്കോബായ സഭ
അതേസമയം, കോടതി വിധി നേരത്തെ തന്നെ എതിരാണെന്ന തിരിച്ചടി നേരിടുന്ന യാക്കോബായ വിഭാഗം ചർച്ച പരാജയപ്പെട്ടതോടെ വീണ്ടും പ്രതിസന്ധിയിലായി. ഒരു നൂറ്റാണ്ടിലധികം നീളുന്ന തർക്കം പരിഹരിക്കേണ്ടത് നിയമനി‍ർമാണത്തിലൂടെയാണെന്ന് അവർ ആവശ്യപ്പെട്ടു. നിയമനിർമാണം ആകാമെന്ന് സു്പ്രീം കോടതി തന്നെ വ്യകതമാക്കിയിട്ടുണ്ടെന്നും ഇരുസഭകൾക്കും സ്വത്തുക്കൾ വീതം വെച്ച് വഴി പിരിയാൻ അവസരമൊരുക്കുകയാണ് വേണ്ടതെനനും യാക്കോബായ സഭ ആവശ്യപ്പട്ടു.
