’സ്വപ്നം കാണാന്‍ ചെലവില്ലല്ലോ’
താന്‍ പ്രതീക്ഷിക്കുന്ന ഒരു ലോകകപ്പ് പോരാട്ടത്തിന്‍റെ സാധ്യതയെക്കുറിച്ച് ക്ലബ്ബിലെ സഹതാരമായ ബ്രസീലിയന്‍ ഫുട്‌ബോളര്‍ കാസെമിറോയുമായി താന്‍ ഇടയ്ക്കിടെ തമാശ പറയാറുണ്ടെന്നും റൊണാള്‍ഡോ പറഞ്ഞു. ”ഇത് ലോകകപ്പാണ്, ലോകത്തിലെ ഏറ്റവും ബുദ്ധിമുട്ടുള്ള മത്സരമാണിത്. എന്നിരുന്നാലും അത്തരമൊരു ഫൈനല്‍ ഞാന്‍ സ്വപ്നം കാണുന്നു. എനിക്കറിയാം അത് കഠിനമായിരിക്കുമെന്ന്. ബുദ്ധിമുട്ടേറിയതായിരിക്കുമെന്ന്. എന്നാല്‍, സ്വപ്നം കാണാന്‍ ചെലവില്ലല്ലോ’- അദ്ദേഹം വ്യക്തമാക്കി. അതേസമയം, തന്നെ സംബന്ധിച്ചിടത്തോളം ഏറ്റവും പ്രധാനപ്പെട്ട കാര്യം ലോകകപ്പില്‍ കളിക്കുക എന്നതാണ്. എന്‍റെ അഭിപ്രായത്തില്‍, ഒരുപക്ഷേ എക്കാലത്തെയും മികച്ച ലോകകപ്പായിരിക്കും ഇത്. നമുക്ക് കാത്തിരുന്നു കാണാമെന്നും മുന്‍ റയല്‍ മാഡ്രിഡ് താരം കൂട്ടിച്ചേര്‍ത്തു.
റൊണാള്‍ഡ് റെക്കോഡ് മറികടക്കുമോ?
191 മത്സരങ്ങളില്‍ നിന്ന് 117 ഗോളുകള്‍ നേടിയ പോര്‍ച്ചുഗല്‍ താരം അന്താരാഷ്ട്ര ഫുട്‌ബോളിലെ ടോപ് സ്‌കോറര്‍ കൂടിയാണ്. 2003 ഓഗസ്റ്റില്‍ അരങ്ങേറ്റം കുറിച്ച അദ്ദേഹം, ലൂയിസ് ഫിഗോ, റൂയി കോസ്റ്റ എന്നിവര്‍ക്കു ശേഷം പോര്‍ച്ചുഗല്‍ ടീമിന്‍റെ പുനരുജ്ജീവനത്തിന് നേതൃത്വം നല്‍കിയ താരം കൂടിയാണ്. അതേസമയം, ലോകകപ്പില്‍ ഏഴ് ഗോളുകള്‍ നേടിയ റൊണാള്‍ഡോ, പോര്ച്ചുഗലിന്റെ ഇതാഹസ താരമായ യൂസേബിയോയുടെ ഒമ്പത് ഗോളുകളെന്ന റെക്കോഡ് ഈ ലോകകപ്പില്‍ തനിക്ക് മറികടക്കാന്‍ കഴിയുമെന്ന പ്രതീക്ഷയിലാണ്.
ആദ്യ മത്സരം 24ന് ഘാനയ്‌ക്കെതിരേ
‘വലിയ വെല്ലുവിളിയാണത്. യൂസേബിയോയെ ഞാന്‍ വളരെയധികം ബഹുമാനിക്കുന്നു. എല്ലാ പോര്‍ച്ചുഗീസുകാരും ഹൃദയത്തില്‍ സൂക്ഷിക്കുന്ന താരമാണ് അദ്ദേഹം. അവിശ്വസനീയമായ ഒരു വ്യക്തിത്വത്തിന്റെ ഉടമയാണ് അദ്ദേഹം. എന്നാല്‍ അദ്ദേഹത്തിന്റെ റെക്കോര്‍ഡ് മറികടക്കാന്‍ നിങ്ങള്‍ക്ക് കഴിയുമെങ്കില്‍ യുസേബിയോ ആകാശത്ത് നിന്ന് അത് സന്തോഷത്തോടെ ആസ്വദിക്കും എന്ന് ഞാന്‍ കരുതുന്നു. അദ്ദേഹത്തിന്റെ റെക്കോര്‍ഡ് മറികടക്കാന്‍ അദ്ദേഹം എനിക്ക് ഭാഗ്യം നല്‍കുമെന്നാണ് പ്രതീക്ഷയെന്നും അഞ്ചാമത്തെ ലോകകപ്പില്‍ പങ്കെടുക്കുന്ന റൊണാള്‍ഡോ കൂട്ടിച്ചേര്‍ത്തു. നവംബര്‍ 24ന് 974 സ്റ്റേഡിയത്തില്‍ ഘാനയ്ക്കെതിരെയാണ് പോര്ച്ചുഗലിന്റെ ആദ്യ മത്സരം. നവംബര്‍ 28 ന് ലുസൈല്‍ സ്റ്റേഡിയത്തില്‍ ഗ്രൂപ്പ് എച്ചിലെ മറ്റൊരു ടീമായ ഉറുഗ്വേയെ നേരിടും. തുടര്‍ന്ന് എഡ്യൂക്കേഷന്‍ സിറ്റി സ്റ്റേഡിയത്തില്‍ കൊറിയയോട് കൊമ്പുകോര്‍ക്കും.
